မူဆယ်တွင် မြို့မပြည်သူ့စစ်အဖွဲ့ ပစ်ခတ်ခံရ၍ ၃ ဦးသေ၊ ၂ ဦး ဒဏ်ရာရ
နန်းမြနဒီ
·
December 3, 2018
ရှမ်းပြည်မြောက်ပိုင်း၊ မူဆယ်မြို့နယ်၊ ကျင်စန်းကျော့ကျေးရွာမှာ မနေ့ညက လုံခြုံရေးယူနေတဲ့ မြို့မပြည်သူ့စစ်အဖွဲ့ဝင် ၅ ဦးကို လက်နက်ကိုင်အဖွဲ့တဖွဲ့က ၀င်ရောက် ပစ်ခတ်သွားရာမှာ လူ ၃ ဦးသေဆုံးပြီး ၂ ဦး ဒဏ်ရာရသွားပါတယ်။
မူဆယ်မြို့နဲ့ ၉ မိုင်အကွာ တရုတ်-မြန်မာနယ်စပ် ကျင်စန်းကျော့ကျေးရွာအနီးမှာ မနေ့ည ၁၀ နာရီလောက်က ပြည်သူ့စစ်အဖွဲ့တွေ သေဆုံးဒဏ်ရာရကြောင်း သတင်းကြား သိတာနဲ့ သေဆုံး ဒဏ်ရာရသူတွေကို မူဆယ်ပြည်သူ့ဆေးရုံကြီးကို ပို့ဆောင် ပေးခဲ့တယ်လို့ မူဆယ်ဂရုဏာ လူမှုကူညီရေးအဖွဲ့ ဥက္ကဋ္ဌ ဦးသောင်းထွန်းက ဒီဗွီဘီကို ပြောပါတယ်။
“ပစ်ခတ်မှုဖြစ်တာကတော့ ည ၉ နာရီလောက်၊ ကျေးရွာလုံခြုံရေးယူနေတဲ့ မြို့မ ပြည်သူ့စစ်အဖွဲ့ကို အရပ်ဝတ်နဲ့ လက်နက်ကိုင်အဖွဲ့ဝင် ၃ ဦးက လာပစ်သွားတာတဲ့ခင်ဗျ။ ကျနော်တို့ အကြောင်းကြားချက်ရတာတော့ ည ၁၀ နာရီလောက်ရှိပြီ။ ၃ ယောက်သေတယ်။ ၂ ယောက် ဒဏ်ရာရတယ်။ မြို့မပြည်သူ့စစ်ကားရော၊ ကျနော်တို့ ဂရုဏာလူမှု ကူညီရေး အဖွဲ့ကားရော သေဆုံးဒဏ်ရာရသူတွေကို မူဆယ်ဆေးရုံ ပိ်ု့ပေးခဲ့ပါတယ် ”
အပစ်ခံရတဲ့ ပြည်သူ့စစ်အဖွဲ့ဝင်တွေဟာ အသက် ၂၀ ကျော်ဝန်းကျင် လူရွယ်တွေ ဖြစ်ပြီး ဒဏ်ရာရသူ ၂ ဦးအနက် တဦးက ပေါင်ကို သေနတ်ကျည် ၂ ချက်ထိကာ နောက်တဦးကတော့ နဖူးမှာ မှန်စ လာမှန်တဲ့ဒဏ်ရာရပြီး အသက်အန္တရာယ် စိုးရိမ်ဖွယ်တော့ မရှိဘူးလို့ ဆိုပါတယ်။
အဆိုပါ ကျင်စန်းကျော့ကျေးရွာအနီး လမ်းကြားတခုမှာ အရင်သီတင်းပတ်ကလည်း အမည်မသိ လက်နက်ကိုင်အဖွဲ့က ပြည်သူ့စစ် ၂ ဦးကို ပစ်ခတ် ဖမ်းဆီးခေါ်ဆောင်သွားပြီး ၁ သေဆုံးကာ ၁ ဦး ဒဏ်ရာရရှိခဲ့ပါတယ်။
