တမူးတွင် အိန္ဒိယနိုင်ငံသားထံမှ ဘိန်းဖြူနှင့် စိတ်ကြွဆေးပြားများ ဖမ်းမိ
DVB
·
December 2, 2018
စစ်ကိုင်းတိုင်း တမူးမြို့နယ်မှာ အိန္ဒိယနိုင်ငံသားတယောက်ဆီကနေ စိတ်ကြွဆေးနဲ့ ဘိန်းဖြူ ကျပ်သိန်း ၁၀၀ ကျော်ဖိုး ဖမ်းမိခဲ့တယ်လို့ ရဲတပ်ဖွဲ့က ထုတ်ပြန်ပါတယ်။
၂၀၁၈ ခုနှစ် နိုဝင်ဘာလ ၃၀ ရက်၊ ညနေ ၆ နာရီလောက်က လုံခြုံရေးတပ်ဖွဲ့ဝင်တွေ လှည့်ကင်းဆောင်ရွက်နေတုန်း တမူးမြို့နယ်၊ ခါမ်းပတ်မြို့၊ ဘုက္ကန်ကျေးရွာအဝင် တမူး-ကလေး ကားလမ်းမှာ ဖမ်းမိခဲ့တာပါ။
တမူးမြို့ဘက်ကနေ ဘုက္ကန်ကျေးရွာဘက်ကို အိန္ဒိယနိုင်ငံသား အသက် ၅၈ နှစ်အရွယ် ပေါင်နဲမ်မောင်းနှင်လာတဲ့ ဆိုင်ကယ်ကို ရပ်တန့်စစ်ဆေးခဲ့ပါတယ်။
ဒီအခါ ဆာလာအိတ်ထဲမှာ ဖွဲတွေနဲ့ ရောထည့်လာတဲ့ ဆပ်ပြာခွက် ၁၅ ခွက်ထဲကနေ ဘိန်းဖြူ ၁၅၀ ဂရမ်(၁ ဂရမ်ကို ၆၀,၀၀၀ ကျပ်နှုန်းနဲ့ တန်ဖိုးကျပ် ၉၀ သိန်း)၊ 88/1 စာတမ်းပါ စိတ်ကြွဆေး အပြား ၁၀၀၀ (တပြားကို ၂,၀၀၀ ကျပ်နှုန်းနဲ့ တန်ဖိုးကျပ်သိန်း ၂၀)တို့ကို ဖမ်းမိခဲ့ပါတယ်။
ပေါင်နဲမ်ဟာ မဏိပူရ်ရပြည်နယ်၊ ချန်ဒရယ်ခရိုင်၊ ဆမ်ပေါ်ရွာမှာ နေထိုင်သူဖြစ်ပြီး သူ့ကို ခါမ်းပတ်နယ်မြေ ရဲစခန်းမှာ မူးယစ်ဆေးဝါးနဲ့ စိတ်ကိုပြောင်းလဲစေသော ဆေးဝါးများ ဆိုင်ရာဥပဒေပုဒ်မ ၁၉(က) နဲ့ အမှုဖွင့်စစ်ဆေးနေတယ်လို့ ရဲတပ်ဖွဲ့က ထုတ်ပြန်ထားပါတယ်။