ပြည်ထောင်စုအစိုးရအဖွဲ့ဝန်ကြီးအဖြစ် ဦးမင်းသူကို အမည်စာရင်းတင်
DVB
·
November 26, 2018
ပြည်ထောင်စုအစိုးရအဖွဲ့ဝန်ကြီးဌာန ပြည်ထောင်စုဝန်ကြီးအဖြစ် ဦးမင်းသူကို နိုဝင်ဘာ ၂၆ ရက် မနက်က ပြည်ထောင်စုလွှတ်တော်အစည်းဝေးမှာ တင်သွင်းလိုက်ပါတယ်။
ပြည်ထောင်စုအစိုးရအဖွဲ့ဝန်ကြီး ဦးသောင်းထွန်းကို ရင်းနှီးမြှပ်နှံမှုနဲ့ နိုင်ငံခြားစီးပွား ဆက်သွယ်ရေးဝန်ကြီးဌာန ပြည်ထောင်စုဝန်ကြီးအဖြစ်ပြောင်းလဲ ခန့်အပ်လိုက်တဲ့ အတွက် ၀န်ကြီးနေရာ လစ်လပ်နေတာပါ။
ဒါကြောင့် သမ္မတရုံးဝန်ကြီးဌာန ဒုဝန်ကြီး ဦးမင်းသူကို ပြည်ထောင်စုအစိုးရအဖွဲ့ ဝန်ကြီးဌာန ပြည်ထောင်စုဝန်ကြီးအဖြစ် ရာထူးတိုးမြှင့်ခန့်အပ်ဖို့ ပြည်ထောင်စုလွှတ်တော်မှာ အခုလို တင်ပြ တာဖြစ်ပါတယ်။
အသက် ၆၂ နှစ်အရွယ် ဦးမင်းသူ (ခ) မြင့်ဇော်ဟာ တောင်ကြီးမြို့ဇာတိဖြစ်ပြီး စစ်တက္ကသိုလ်ကနေ သိပ္ပံဘွဲ့နဲ့ ကာကွယ်ရေးပညာ မဟာဝိဇ္ဇာဘွဲ့တွေ ရရှိထားသူတဦးဖြစ်ပါတယ်။
သူ့ရဲ့ဇနီးဖြစ်သူ ဒေါ်လွင်မေသိန်းဟာ တရားရုံးချုပ်ရှေ့နေ တဦးဖြစ်ပြီး သမီးနှစ် ဦးဖြစ်တဲ့ မဟေမာမင်းသူနဲ့ မဝေမာမင်းသူတို့ကတော့ ကိုယ်ပိုင်လုပ်ငန်းတွေ လုပ်ကိုင်တယ်လို့ လွှတ်တော်မှာ ဖြန့်ချိထားတဲ့ ဦးမင်းသူရဲ့ ကိုယ်ရေးအကျဉ်းမှာ ဖော်ပြပါတယ်။
