ထိုင်ဝမ်တွင် လေထုညစ်ညမ်းမှု ယိုယွင်း၍ အာဏာရပါတီ ဝေဖန်ခံရ

ထိုင်ဝမ်ကျွန်းမှာ လေထုညစ်ညမ်းမှု အခြေအနေ ယိုယွင်းလာနေလို့ စွမ်းအင်မူဝါဒနဲ့ ပတ်သက်ပြီး လက်ရှိ အာဏာရ ဒီမိုကရက်တစ် တိုးတက်ရေးပါတီ (DPP) ဟာ ဝေဖန်ပြစ်တင်ခံနေရပါတယ်။ ထိုင်ဝမ်တောင်ပိုင်းနဲ့ အလယ်ပိုင်းမှာ လေထုအရည်အသွေးဟာ ဆောင်းရာသီအစမှာ စပြီး ယိုယွင်းခဲ့တာပါ။ တိုင်ပေနဲ့ ကောင်းရှုံမြို့နယ်တွေမှာ ဒေသခံ သဘာဝပတ်ဝန်းကျင် ကာကွယ်ရေး အုပ်စုတွေက ဆန္ဒပြခဲ့ကြပါတယ်။ ဆိုးရွားတဲ့မြူတွေကြောင့် တောင်ပိုင်းက ကျောင်းတချို့မှာ အခန်းပြင်ပ လှုပ်ရှားမှုတွေကို ပိတ်ပင်ခဲ့ရတာပါ။ မြူတွေဟာ ကားတွေနဲ့ ဆိုင်ကယ်တွေ အရေအတွက်များလို့ ဖြစ်ကြရတာလို့လည်း ပြောပါတယ်။ "ထိုင်ဝမ်မှာ လူ ၂၃ သန်းရှိပြီး ကားနဲ့ဆိုင်ကယ်လည်း ၂၃ သန်း ရှိနေတယ်။ စက်ရုံတွေနဲ့ ကျောက်မီးသွေးလောင်စာသုံး လျှပ်စစ်ဓာတ်အားပေး စက်ရုံတွေလည်း ရှိတယ်။ အားလုံးပေါင်းလိုက်တော့ လေထုညစ်ညမ်းစေတဲ့အရာ အများအပြားကို ထုတ်လွှတ်တော့တာပေါ့" လို့ ထိုင်ဝမ် သဘာဝပတ်ဝန်းကျင် တိုးတက်ရေး ဖောင်ဒေးရှင်းဥက္ကဋ္ဌ လာရီချန်းက ပြောပါတယ်။ ထိုင်ဝမ်အလယ်ပိုင်းနဲ့ တောင်ပိုင်းက လေထုညစ်ညမ်းမှုဖြစ်ရတဲ့ အရင်းအမြစ်က ရှုပ်ထွေးပါတယ်။ ဒါပေမယ့် ကျောက်မီးသွေး အများအပြားကို မီးရှို့နေတဲ့ လျှပ်စစ်ဓာတ်အားပေး စက်ရုံတွေက အကြီးဆုံး အရင်းအမြစ်အဖြစ် ဒေသခံတွေ ရှုမြင်ထားပါတယ်။

//
More News
Up