A d v e r t i s e m e n t With Us

ရေကြီးရေလျှံအန္တရာယ်နဲ့ အမျိုးသမီးများအတွက် အကာအကွယ်

ဇူလိုင်လ ၂၅ ရက်၊ ညနေ ၅ နာရီမှာ မြစ်ရေဟာ ရုတ်တရက် မြင့်တက်လာပြီး အိမ်ခြံဝန်းထဲကို တရိပ်ရိပ်နဲ့ ဝင်ရောက်လာရာကနေ အိမ်ထဲအထိပါ တဖြည်းဖြည်း ဝင်ရောက်လာပါတယ်။ အဲဒီလို အိမ်ထဲအထိ ရေဝင်လာချိန်မှာတော့ မနီလာတယောက် လန့်ဖျပ်ကာ ကလေးအတွက် လိုအပ်တဲ့ပစ္စည်းများနဲ့ အခြားအရေးကြီးပစ္စည်းများကို သိမ်းဆည်းပြီး ရေထဲကနေ ဖြတ်ကျော်ကာ ရေဘေးစခန်းရှိရာ ထွက်လာခဲ့ပါတော့တယ်။ ဘားအံမှာ နှစ်ပေါင်း ၃၀ ကျော်ကာလအတွင်း  ဒီလိုရေကြီးမှုကို တကြိမ်တခါမှ မကြုံဖူးဘူးလို့ မနီလာက ပြောပြပါတယ်။ ဒီရေကြီးမှုဟာ ကရင်ပြည်နယ်တဝှမ်းလုံးမှာ ဖြစ်ပွားခဲ့ပြီး ဘားအံမြို့အတွင်း ရေဘေးဒုက္ခသည်စခန်း ၁၆ ခုနဲ့ အမျိုးသမီးနဲ့ ကလေးငယ် ၇ ထောင်ကျော် အပါအဝင် ရေဘေးဒုက္ခသည်ပေါင်း ၁ သောင်းကျော် လာရောက်ခိုလှုံနေကြရတယ်လို့ သိရပါတယ်။ “ရေမကြီးခင်မှာ မိုးတွေ ဆက်တိုက်ရွာနေပေမယ့် ရေကြီးတဲ့ရက်က ညနေပိုင်းမှာ ရုတ်တရက် ခြံထဲ ရေတွေဝင်လာတာ ဘယ်လောက်မှ မကြာဘူး၊ အိမ်ထဲအထိဝင်လာတော့ ဒါ ပုံမှန်မဟုတ်ဘူးဆိုတာ သိလိုက်တယ်။ ကျမတို့နေတဲ့ရပ်ကွက်က တခါမှ ရေလျှံတာ၊ ရေကြီးတာ၊ မဖြစ်ဖူးဘူး” လို့ မနီလာက ဆိုပါတယ်။ အခုလို ရုတ်တရက် ရေကြီးတဲ့အချိန်ဟာ ညနေခင်းမှာ ဖြစ်တဲ့အတွက် ကံကောင်းပါတယ်။ ညသန်းခေါင်ချိန်ဖြစ်ရင် အသက်အန္တရာယ်နဲ့ ရင်ဆိုင်ရနိုင်တယ်လို့ သူက ပြောပါတယ်။ “အခု ကျမတို့အိမ်ဘက်မှာ ရေကျပေမယ့် ဘယ်အချိန် ရေပြန်ကြီးလာမလဲဆိုတာ ပြောလို့မရဘူး။ ဒါကြောင့် ရေဘေးကယ်ဆယ်ရေးစခန်းမှာပဲ ဆက်ရှိနေသေးတာ။ ဒီမှာတော့ ကျမတို့ အမျိုးသမီးတွေနဲ့ ကလေးငယ်တွေအတွက် ဒုက္ခမျိုးစုံရောက်ပါတယ်” လို့ သူက ဆက်ပြောပြတယ်။ “စခန်းမှာက စုပြီးနေရတာ။ အမျိုးသမီးနဲ့ ကလေးတွေအတွက် နေရာသီးသန့်မရှိဘူး။ အိမ်သာတွေလည်း အတူတူသုံးရတာ။ အားလုံးက ဒုက္ခသည်တွေဆိုတော့လည်း သည်းခံပြီးနေရတယ်” ကရင်ပြည်နယ်၊ မြို့နယ်များအတွင်း ရေမကြီးခင် ရက်တပတ်ခန့် မိုးသည်းထန်စွာ ရွာသွန်းကာ တောင်ကျရေများ ရုတ်တရက်ကျလာပြီး မြစ်ရေမြင့်တက်လာတာကြောင့် သြဂုတ်လဆန်းပိုင်းမှာ ရေလွှမ်းမိုးမှု ခံခဲ့ရတာပါ။ ညနေ ၅ နာရီကျော်ခန့်မှာ ရပ်ကွက်လမ်းထဲသို့ ရေများ စတင်ဝင်လာပြီး တဖြည်းဖြည်း နေအိမ်ခြံဝန်းထဲအထိ ဝင်လာတဲ့အတွက် ပုံမှန်ရေကြီးတာ မဟုတ်ဘူးလို့ သိရှိခဲ့ပြီး ပစ္စည်းများကို အမြန်သိမ်းဆည်း ထုပ်ပိုးထားလိုက်တယ်လို့ ဘားအံမြို့၊ မန်းဝင်းမောင်လမ်းမှာ နေထိုင်တဲ့ မခင်လေးက ပြောပြပါတယ်။ “ရေက တဖြည်းဖြည်းတက်လာနေတာ ခြံထဲမှာ ဒူးလောက်အထိ ဖြစ်လာတယ်။ ဒါကြောင့်  အရေးကြီးတဲ့ စာရွက်စာတမ်းတွေနဲ့ ပိုက်ဆံ၊ ကလေးပစ္စည်းတွေယူပြီး လူမှုကူညီရေးက လာခေါ်မယ့်ကားကို စောင့်နေတယ်။ ရေက ရုတ်တရက်ကြီး မြန်မြန်တက်လာတာ။ မျက်စိရှေ့မှာတင်များလာတာ” လို့ မခင်လေးက ပြောပါတယ်။ ဒီလို ရေတက်လာတဲ့အတွက် ရပ်ကွက်ထဲမှာ နေထိုင်သူများ ရေလွတ်ရာသို့ ထွက်ပြေးတိမ်းရှောင်ကြရာမှ တချို့က ရေဘေးကယ်ဆယ်ရေးစခန်း၊ တချို့က ရေလွတ်ရာ ဆွေမျိုးများအိမ်သို့ သွားရောက်ခိုလှုံကြတယ်လို့ သိရပါတယ်။ ယခင်က မြို့တွင်း အမြင့်ပိုင်းအထိ ရေတက်မှုမရှိခဲ့ဘဲ ဘားအံမြို့အနိမ့်ပိုင်း သံလွင်မြစ်နဲ့နီးတဲ့ ရပ်ကွက်များက နေအိမ်များမှာသာ နှစ်စဉ် ရေဝင်ရောက်မှုများ ရှိခဲ့တာဖြစ်ပါတယ်။ ယခုနှစ် ကရင်ပြည်နယ်နဲ့ မွန်ပြည်နယ် ရေကြီးရေလျှံမှုက စံချိန်တင်သွားပြီဖြစ်ကြောင်းနဲ့ အခုလို ရေကြီးမှုဘေးအန္တရာယ် ကြုံရပါက ကလေးငယ်များနဲ့ မိခင်များ၊ အမျိုးသမီးများက အခက်အခဲတွေ ပိုပြီးတွေ့ရတယ်လို့ ရေဘေးကယ်ဆယ်ရေးမှာ ကူညီနေတဲ့ နန့်မြင့်အောင်ကလည်း ပြောပြပါတယ်။ “တချို့က ဆွေမျိုးအိမ်၊ တချို့က ရေဘေးကယ်ဆယ်ရေး စခန်းတွေမှာ သွားနေကြတယ်။ စခန်းမှာ အားလုံးရောပြီး နေထိုင်ကြရတော့ အမျိုးသမီးတွေအတွက် ခက်ခဲတယ်။ မိုးဆက်တိုက်ရွာတော့ အဝတ်အစားတွေနဲ့ အမျိုးသမီး အသုံးအဆောင်တွေလည်း လိုအပ်တယ်” လို့ နန့်မြင့်အောင်က ဆိုပါတယ်။ ရေဘေးကယ်ဆယ်ရေးစခန်းကို ရောက်နေတဲ့ အမျိုးသမီးနဲ့ ကလေးသူငယ်များအတွက် အခက်အခဲများစွာ ရှိနေပြီး စခန်းမှာ ကျန်းမာရေးစောင့်ရှောက်မှုလည်း မရှိဘူးလို့ သူက ဆက်ပြောပါတယ်။ “မြို့နဲ့ဝေးတဲ့နေရာတွေ၊ အလှူရှင်တွေ အရောက်နည်းတဲ့ ဒေသတွေလည်း ရှိတယ်။ သူတို့တွေက အိမ်အောက်ထပ်မြုပ်ပြီး အပေါ်ထပ်မှာ နေရတာတွေရှိတယ်။ အဲဒီမှာဆို အပေါ့အလေး သွားစရာမရှိဘူး။ အိမ်ပေါ်ကနေ ကြုံရင် ကြုံသလို သွားကြတယ်။ အိမ်သာသွားရတာ အခက်ခဲဆုံးပါပဲ” လို့ နန့်မြင့်အောင်က ကြုံတွေ့နေတဲ့ အခက်အခဲများကို ဆက်ပြောပြတယ်။ နှစ်ပေါင်း ၃၀ ကျော်အတွင်း အခုကြုံရတဲ့ရေဘေးမှာ အလွန်ဆိုးဝါးပြီး အစိုးရအနေနဲ့ ကြိုတင်ပြင်ဆင်မှု အားနည်းခဲ့သလို ရေဘေးကယ်ဆယ်ရေးလုပ်ငန်းမှာ အမျိုးသမီးနဲ့ ကလေးငယ်များအတွက် ထည့်သွင်းစဉ်းစားမှုနဲ့ ဦးစားပေးဆောင်ရွက်မှုများ မရှိဘူးလို့လည်း နန့်မြင့်အောင်က ထပ်လောင်းပြောပါတယ်။ မြန်မာနိုင်ငံမှာ သဘာဝဘေးအန္တရာယ်တွေ ကြုံတွေ့လာပါက အမျိုးသမီးများနဲ့ ကလေးသူငယ်များအတွက် အရေးပေါ်အကူအညီများ ကြိုတင်စဉ်းစားပြီး စီစဉ်ဆောင်ရွက်ပေးမှုတွေ ရှိဖို့လိုတယ်လို့ ကရင်ပြည်နယ်အတွင်း ရေဘေးကယ်ဆယ်ရေး ဆောင်ရွက်နေသူများက ပြောကြပါတယ်။ “အစိုးရအနေနဲ့ ရေဘေးတွေဖြစ်လာရင် လုပ်ဆောင်ပေးနိုင်ဖို့ ကြိုတင်ပြင်ဆင်မှုတွေ အားနည်းပါတယ်။ အမျိုးသမီးနဲ့ ကလေးငယ်တွေအတွက် သီးသန့် ဘယ်လိုပြင်ဆင်သင့်သလဲ၊ ဘာတွေဆောင်ရွက်သင့်သလဲ ဆိုတာကို မသိဘူးလို့ ထင်ပါတယ်” လို့ ကရင်ပြည်နယ်၊ လှိုင်းဘွဲ့မြို့နယ်၊ ရေဘေးကယ်ဆယ်ရေး ကူညီဆောင်ရွက်နေတဲ့ နန့်နှင်းနှင်းက ဆိုပြန်ပါတယ်။ မြန်မာနိုင်ငံမှာ လွန်ခဲ့တဲ့တပတ်အတွင်း တိုင်းဒေသကြီးနဲ့ ပြည်နယ် ၈ ခုမှာ ရေကြီးရေလျှံမှု ဖြစ်ပွားခဲ့ပါတယ်။ ကရင်ပြည်နယ်၊ မွန်ပြည်နယ်၊ တနင်္သာရီတိုင်း၊ ပဲခူးတိုင်းတို့မှာ ရေကြီးမှုဒဏ်ကို အများဆုံးခံစားရပြီး ကယ်ဆယ်ရေးစခန်း စုစုပေါင်း ၃၄၁ ခု ဖွင့်လှစ်ခဲ့ရတယ်လို့ သဘာဝဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာန ထုတ်ပြန်ချက်အရ သိရပါတယ်။ “တချို့နေရာတွေဆိုရင် အကူအညီ မရောက်တာတွေ ရှိတယ်။ အကူအညီ လိုအပ်နေတဲ့ နေရာတွေ ကျန်နေသေးတယ်။ သွားရလာရတာ ခက်တယ်” လို့ နန့်နှင်းနှင်းက ပြောပါတယ်။ ကရင်ပြည်နယ်အတွင်း သံလွင်မြစ်ကြောင်းပေါ် ရေကာတာတည်ဆောက်မှု၊ သစ်တောပြုန်းတီးမှု၊ ကျောက်မီးသွေးတူးဖော်မှုတွေကြောင့် သဘာဝပတ်ဝန်းကျင် ပျက်စီးမှုများ တနှစ်ထက်တနှစ် ဆိုးရွားလာကာ မိုးရာသီရောက်တိုင်း အခုလို ရေဘေးအန္တရာယ် ကြုံရမှာကို  ဒေသခံများ စိုးရိမ်သောက ဖြစ်နေကြပါတယ်။ “ကျမတို့လှိုင်းဘွဲ့မှာ အဓိက တောင်ကျရေတွေပါ။ သစ်ပင်တွေ၊ သစ်တောတွေ၊ ပြုန်းတီးတော့  တောင်ကျရေက ရုတ်တရက်ဆင်းလာတာ အရမ်းမြန်တယ်။ ဒီမှာက နှစ်စဉ်ရေကြီးပေမယ့် ဒီလိုရေကြီးတာမျိုး တခါမှ မကြုံဖူးဘူး” လို့ နန့်နှင်းနှင်းက ဆိုပါတယ်။ သဘာဝဘေးအန္တရာယ် ကြုံလာတဲ့အခါ ကူညီကယ်ဆယ်သူများအနေနဲ့ အမျိုးသမီး အသုံးအဆောင်များ ထည့်သွင်းထောက်ပံ့တာရှိပေမယ့် အစိုးရနဲ့ လူမှုအဖွဲ့အစည်းများမှာတော့ ကျား၊ မ ရေးရာ အမြင်တွေ အားနည်းနေသေးတယ်လို့ သူက ဆက်ပြောပါတယ်။ “အလှူရှင်တွေအနေနဲ့ ပစ္စည်းတွေလာလှူရင် အမျိုးသမီးလစဉ်သုံးတွေ မမေ့ဖို့ပါပဲ။ ဒါက အရေးကြီးတယ်။ သူတို့အတွက် အရမ်းလိုအပ်တယ်” သဘာဝရေဘေးအန္တရာယ်နဲ့ ရင်ဆိုင်နေရတဲ့ ဒေသများမှာ အမျိုးသမီးနဲ့ ကလေးငယ်များအတွက် သွားလာမှု၊ နေထိုင်မှု၊ အခက်အခဲပေါင်းများစွာ ကြုံတွေ့နေရတယ်လို့ ကလေးသူငယ်နဲ့ အမျိုးသမီးများအရေးကို ကူညီနေတဲ့ ရုပ်ရှင်သရုပ်ဆောင် ခိုင်နှင်းဝေကလည်း ပြောပါတယ်။ “ကျမကတော့ အမျိုးသမီး အတွင်းခံတွေ၊ အမျိုးသမီး လစဉ်သုံးတွေ၊ ကလေးတွေအတွက် လိုအပ်တဲ့ အဝတ်အစားတွေ လှူခဲ့တယ်။ ယောက်ျားတွေထက် အမျိုးသမီးတွေက သွားလာနေထိုင်ရတာ ခက်ခဲတယ်၊ ပင်ပန်းတယ်၊ အမျိုးသမီး လစဉ်သုံးပစ္စည်းကတော့ တော်တော်လိုအပ်ပါတယ်” လို့ ခိုင်နှင်းဝေက ဆက်ပြောပါတယ်။ ရေဘေးကြုံတွေ့နေရတဲ့ အချို့ သက်ကြီးရွယ်အိုနဲ့ အမျိုးသမီးများဟာ စိတ်ဖိစီးမှုများ ခံစားနေရတဲ့အတွက် သူတို့ ခဏတာပျော်ရွှင်အောင်လည်း သွားရောက်စဉ်မှာ အစီအစဉ်လေးတွေ ပြုလုပ်ပေးသင့်တယ်လို့ ခိုင်နှင်းဝေက အကြံပြုပါတယ်။ “သူတို့အားမငယ်အောင်၊ စိတ်မညစ်အောင် လုပ်ပေးရမယ်။ တချို့ အသက်ကြီးသူတွေဆိုရင် ငိုနေကြတာ တွေ့ရတယ်” လို့ သရုပ်ဆောင် ခိုင်နှင်းဝေက ပြန်လည်ပြောပြခဲ့တာပါ။ အမျိုးသမီးနဲ့ ကလေးသူငယ်များအတွက် ရေဘေးအန္တရာယ် ဖြစ်ပွားတဲ့ ရေကြီးချိန်မှာသာမက ပြန်လည်ထူထောင်ရေး ဆောင်ရွက်ချိန်မှာလည်း အထူးထည့်သွင်း စဉ်းစားစရာများ ရှိပါတယ်လို့ အမျိုးသမီးအခွင့်အရေး ဆောင်ရွက်သူများက ပြောလိုက်ပါတယ်။ ကျား၊ မ ရေးရာ တန်းတူညီမျှရေးကွန်ရက် (GEN) မှ ၂၀၁၅ ခုနှစ်၊ ရေဘေးအန္တရာယ်နဲ့ ပတ်သက်ပြီး “မိုးစက်ငယ်လေးများ” ခေါင်းစဉ်နဲ့ လေ့လာသုံးသပ်မှု စာတမ်းတခုကို ကျား၊ မ အမြင်ရှုထောင့်မှ သုံးသပ်ရေးသား ထုတ်ဝေခဲ့ပါတယ်။ အဲဒီစာတမ်းမှာ အစိုးရနဲ့ ကယ်ဆယ်ရေးဆိုင်ရာ လူထုဖွံ့ဖြိုးရေး အဖွဲ့အစည်းများဟာ သဘာဝဘေးအန္တရာယ်ဆိုင်ရာ ကြိုတင်ပြင်ဆင်မှုများ၊ အရေးပေါ်တုံ့ပြန်မှုများမှာ ကျား၊ မ ရေးရာ အမြင်ရှုထောင့် ထည့်သွင်းပါဝင်စေရေး၊ အရေးပေါ်တုံ့ပြန်မှုများမှာ ကျား၊ မ ရေးရာ ဘတ်ဂျက်များ ကြိုတင်စီမံထားရှိစေရေး စတဲ့အချက်တွေ ပါဝင်တယ်လို့ သိရပါတယ်။ နန်းဆိုင်နွမ် (hiburma.net ဝက်ဘ်ဆိုက်မှ ပြန်လည်ဖော်ပြသည်။)

A d v e r t i s e m e n t With Us

More News
Up