ဘားအံအကျဉ်းထောင်မှ အကျဉ်းသား ၄၁ ဦး ထောင်ဖောက်ထွက်ပြေး၊ ၃ ဦး ပြန်မိ
1.3K
ဘားအံအကျဉ်းထောင်မှ ထောင်ကျအကျဉ်းသား ၄၁ ဦး ထောင်ဖောက်ထွက်ပြေးမှု ဖြစ်ပွားခဲ့ပြီး ၃ ဦးပြန်မိထားတယ်လို့ ဒီနေ့ နေ့လယ် ၁၂ နာရီခွဲခန့်က ပြည်နယ်ရဲတပ်ဖွဲ့မှူးကြီး အောင်မြတ်မိုးက ဒီဗွီဘီကို အတည်ပြု ပြောကြားပါတယ်။
မနက် ၈ နာရီ ၄၅ မိနစ်လောက်က အကျဉ်းသားတွေဟာ အကျဉ်းထောင်အတွင်းက ဓမ္မာရုံး တောင်ဘက်စိုက်ခင်းမှာ သန့်ရှင်းရေးလုပ်နေရာက ဓမ္မာရုံးရှေ့မှာ ရပ်နားထားတဲ့ အမှိုက်သယ်ယာဉ်မောင်းနှင်တဲ့ အကျဉ်းထောင်ဝန်ထမ်းကို ဆွဲချထိုးကြိတ်ပြီး မော်တော်ယဉ်ကို ယူဆောင်ကာ အကျဉ်းထောင်တံခါးတွေကို တိုက်ဖွင့်ပြီး ဘားအံ-လှိုင်းဘွဲ ကားလမ်းမကြီးမှ လှိုင်းဘွဲ့မြို့ဘက်ကို ထွက်ပြေးသွားခဲ့တာပါ။
ကရင်ပြည်နယ်ရဲတပ်ဖွဲ့ရုံး၊ ရဲမှူးကြီး အောင်မြတ်မိုးက “ထောင်ဖောက်ပြေးတာ မှန်တယ်။ ၄၁ ယောက်ပါ သွားတယ်။ လောလောဆယ် ရှာဖွေဆဲ။ အဲလောက်ပဲ ပြောနိုင်သေးတယ်။ တော်တော်ရှုပ်ထွေးနေလို့” လို့ ပြောပါတယ်။
ဘားအံမြို့၊ ဘားအံအကျဉ်းထောင်၊ ဒုတိယညွန်ကြားရေးမှူး၊ ခင်မောင်ဝင်းက “လောလောဆယ်တော့ ကျနော်တို့ စုံခုံဖွဲ့ စစ်ဆေးနေတယ်။ ၃ ယောက်တော့ ပြန်မိထားတယ်။ အသေးစိတ်ကတော့ ရုံးချုပ်ကို တင်ပြထားတယ်။ သူတို့ သတင်းထုတ်ပြန်ပါလိမ့်မယ်” လို့ ပြောပါတယ်။
ထောင်ဖောက်ထွက်ပြေးသွားတဲ့ ထောင်ကျအကျဉ်းသားတွေဟာ ပြစ်မှုမျိုးစုံနဲ့ အကျဉ်းကျနေသူတွေ ဖြစ်တယ်လို့ အကျဉ်းထောင် တာဝန်ရှိသူက ပြောပါတယ်။
အကျဉ်းထောင်ဖောက်မှုကြောင့် ထောင်ဝန်ထမ်း ၁ ဦး ဦးခေါင်းထိခိုက် ဒဏ်ရာရရှိခဲ့တဲ့ အတွက် ဘားအံဆေးရုံကြီးမှာ ဆေးကုသမှုခံယူနေရပါတယ်။ ဘားအံအကျဉ်းထောင်မှာ အကျဉ်းသား ထောင်ဖောက်ထွက်ပြေးမှု မကြာခဏ ဖြစ်ပွားနေတယ်လို့ ဒေသခံတွေက ပြောပါတယ်။
သတင်း - ရဲမင်းခေါင်
