A d v e r t i s e m e n t With Us

လက်တု ၂ ဖက်ဖြင့် ပန်းချီစွမ်းရည်ပြနိုင်သူ (သို့) မသန်ပေမယ့် စွမ်းဆောင်နိုင်သူ (ရုပ်သံ)

“ခုနေချိန်မှာ တယောက်ယောက်က ကျနော့်ကို လက်နှစ်ဖက်လုံး အကောင်းအတိုင်း ပြန်ပေးမယ်ဆိုရင်တောင် ကျနော် ပြန်ယူဖြစ်မှာ မဟုတ်ဘူး။” ခုလိုပြောလိုက်သူကတော့ ကိုရီးယားနိုင်ငံသား ဆွတ်ခ်ချန်ဝူးဖြစ်ပြီး သူ့မှာ လက်နှစ်ဖက်စလုံးမရှိဘဲ အတုတပ်ဆင် အသုံးပြုနေရသူပါ။ ဒါပေမယ့် ဘဝကို အရှုံးမပေးဘဲ လက်တုနှစ်ဖက်ရော၊ ခြေထောက်တွေရော ခန္ဓာကိုယ်တခုလုံး အသုံးပြုကာ ပန်းချီအနုပညာစွမ်း ပြနိုင်သူတဦး ဖြစ်နေပါတယ်။ “ကျနော် အရာရာဟာ ဘယ်လိုလဲဆိုတာကို သိနေပါပြီ။ ဒီအနုပညာကို လုပ်ဆောင်ရတာ နှစ်သက်သဘောကျနေပါတယ်။” လွန်ခဲ့တဲ့ နှစ်ပေါင်း ၃၀ လောက်တုန်းကတော့ ဆွတ်ခ်ချန်ဝူးဟာ လျှပ်စစ်အင်ဂျင်နီယာတယောက် ဖြစ်ခဲ့ပါတယ်။ ဒါပေမယ့် ဗို့အား ၂ သောင်းကျော်အားနဲ့ ဓာတ်လိုက်ခံခဲ့ရပြီးနောက်မှာတော့ သူ့ရဲ့ ဒီအသက်မွေးဝမ်းကျောင်းဟာ ကြာရှည်မခံတော့ဘဲ သေလုမြောပါး ဖြစ်သွားခဲ့ရတာပါ။ ဒီမတော်တဆမှုကြောင့် သူ့ရဲ့ လက်နှစ်ဖက်လုံးနဲ့ ခြေချောင်းလေးနှစ်ချောင်းကို ဖြတ်ပစ်ခဲ့ရပါတယ်။ “ကျနော့်သားဟာ ကျနော် ဒီမတော်တဆမှုမဖြစ်ခင် သီတင်းပတ် ၆ ပတ်လောက်က မွေးဖွားခဲ့တာ။ ကျနော် သူ့အတွက် ဘာမှမလုပ်ပေးနိုင်ခဲ့ပါဘူး။ တရက်တော့ သူက ကျနေ်ာ့ကို ပန်းချီဆွဲပေးဖို့ ပြောလာတယ်။ အဲဒါနဲ့ ကျနော်က ငှက်ပုံတပုံ စဆွဲပေးဖြစ်ခဲ့တယ်။ အဲဒီကတည်းက ကျနော် ပန်းချီဆွဲဖြစ်ဖို့ အစပျိုးခဲ့တာပါပဲ။ အဲဒီတုန်းကတော့ သားကို လုပ်ပေးချင်တာပဲ ကျနော်သိခဲ့တာပါ။” အဲဒီနောက်တော့ တစစနဲ့ ဒါကိုလုပ်ချင်လာခဲ့ပြီး ပထမဆုံး အနုပညာအကယ်ဒမီ တခုဆီ ရောက်ခဲ့ချိန်မှာ သင်ပေးမယ့်ဆရာက သူ တခါမှ ခုလိုလက်နှစ်ဖက်စလုံးမရှိတဲ့ သူတွေကို မသင်ပေးဖူးဘူးလို့ ပြောတာကို ခံခဲ့ရပါတယ်။ လူတွေကလည်း သူ့အနေနဲ့ ဒါကို ဖြစ်အောင်လုပ်နိုင်မှာ မဟုတ်ဘူးလို့ ထင်ခဲ့ကြပေမယ့် ဆွတ်ခ်ချန်ဝူးကတော့ ဖြစ်အောင် လုပ်ပြနိုင်ခဲ့တာပါ။ သူဟာ တခြားသူတွေရော ဘယ်လိုကြိုးစားကြသလဲ ဆိုတာတွေကိုလည်း လေ့လာခဲ့ပြီး သင်ပေးမယ့် ဆရာတွေကို သူ ဇွဲမလျှော့ခင်အချိန်ထိ ဆက်ပြီး သင်ကြားပေးဖို့ ပြောဆိုထားခဲ့တယ်လို့ ဆိုပါတယ်။ ခုချိန်မှာတော့ သူဟာ နာမည်ကြီး လူသိများနေခဲ့ပြီဖြစ်ကာ ပြီးခဲ့တဲ့ ၂၀၁၄ ခုနှစ်၊ ဆိုချီ မသန်စွမ်း အိုလံပစ်အားကစားပြိုင်ပွဲမှာလည်း ဖျော်ဖြေခဲ့ရပါသေးတယ်။ မတော်တဆထိခိုက်မှု ကြုံတွေ့ရသူတွေဟာ ဆိုးဝါးတဲ့ အတိတ်တွေကိုပဲ ပြန်တွေးနေခဲ့ကြတာများပြီး တကယ်တော့ လက်ရှိ ပစ္စုပ္ပန်မှာ ဘာတွေဆက်ဖြစ်မလဲဆိုတာ ရင်ဆိုင်နိုင်ဖို့နဲ့ အခြေအနေမှန်ကို လက်ခံနိုင်ဖို့ လိုတယ်လို့ ဆွတ်ခ်ချန်ဝူးက ပြောပါတယ်။ “ဒီမတိုင်ခင်က ကျနော် ဘာလုပ်ခဲ့တယ်ဆိုတာက အရေးမကြီးပါဘူး။ ဒါက အသုံးမဝင်ပါဘူး။ အခုကစ ဘာလုပ်နိုင်မလဲဆိုတာကိုသာ တွေးရပါမယ်။” သူ့အနားမှာ ခုချိန်ထိ အရာရာ မညည်းညူဘဲ ရှိနေပေးတဲ့ ဇနီးဖြစ်သူကိုလည်း ကျေးဇူးတင်နေပြီး တနေ့မှာတော့ ကမ္ဘာအနှံ့ လျှောက်လည်ပြီး အနုပညာစွမ်းရည်တွေလည်း ပြချင်နေသေးတယ်လို့ ဆွတ်ခ်ချန်ဝူးက ပြောပါတယ်။

A d v e r t i s e m e n t With Us

More News
Up