မြင်းခြံစည်ပင်ရေပေးဝေစနစ် အရှုံးပေါ်သဖြင့် ပုဂ္ဂလိကကုမ္ပဏီထံလွှဲပြောင်း
1.4K
မြင်းခြံမြို့က မြို့ပေါ်ရပ်ကွက်တွေမှာ ရေပေးဝေရေးစနစ်ဟာ လစဉ်အရှုံး ပေါ်နေတာကြောင့် ရေပေးဝေဖြန့်ဖြူးဖို့ ပုဂ္ဂလိကကုမ္ပဏီတခုကို လွှဲပြောင်းလိုက်တယ်လို့ မြင်းခြံမြို့နယ် စည်ပင်သာယာရေးကော်မတီက သိရပါတယ်။
မြင်းခြံစည်ပင်သာယာရေးကော်မတီ ဥက္ကဋ္ဌ ဒေါက်တာဝင့်သူက “မြင်းခြံမှာ ၂၄ နာရီရေပေးဖို့ အဆင်မပြေဘူး၊ ရေပေးဝေရေးအတွက် ရေစင်ကြီး ၃ ခုရှိတယ်၊ ရေယိုတာတွေ ရေပိုက်လိုင်းဆွေးမြေ့တာတွေ ဖြစ်နေတာ၊ မြင်းခြံရေက ငံတဲ့အတွက် ပိုက်ပိတ်တာတွေ ဖြစ်ကုန်တယ်။ ရေကလည်း သန့်စင်မှုမရှိဘူး။ စည်ပင်အနေနဲ့က ရေကို နေ့တိုင်းမပေးနိုင်ဘူး နှစ်ရက်ခြား တခါကို ၁ နာရီလောက်ဘဲပေးနိုင်တယ်။ ပြီးတော့ လစဉ် ၁၅ သိန်းလောက် အရှုံးပေါ်နေတော့ မြို့ပေါ်ရေပေးဝေရေးအတွက် ပုဂ္ဂလိကကုမ္ပဏီကို လွှဲပြောင်းလိုက်တာပါ”လို့ ဒီဗွီဘီကို ပြောပါတယ်။
အဆိုပါ ရေပေးဝေရေးလုပ်ငန်းကို Chin Corp Myanmar ရဲ့ကုမ္ပဏီခွဲဖြစ်တဲ့ Aqua Pura ကုမ္ပဏီက ဖြန့်ဖြူးပေးသွားမှာလည်း ဖြစ်ပါတယ်။
Aqua Pura ကုမ္ပဏီ အကြီးတန်း ပရောဂျက်မန်နေဂျာ ဒေါ်သင်းမို့မို့အေးက "ကျမတို့ ကုမ္ပဏီ အနေနဲ့ ၂၀၁၆ ခုနှစ်က စစ်ကိုင်းတိုင်း မုံရွာမြို့မှာလည်း ချင်းတွင်းမြစ်ရေကိုသန့်စင်ပြီး ရေဖြန့်ဖြူးရေးကို လုပ်ဆောင်ခဲ့ပါတယ်။ မြင်းခြံမှာတော့ ဧရာဝတီမြစ်ရေကို သန့်စင်ပြီး မြင်းခြံမြို့ပေါ် ရပ်ကွက် (၂၀)နဲ့ စက်မှုဇုန်တွေကို ရောင်းချသွားမှာပါ။ အခု ရပ်ကွက်တွေကို ဆင်းပြီး စစ်တမ်းကောက်နေပါတယ်။ ပြည်သူတွေအနေနဲ့က စိတ်ဝင်စားမှုရှိပြီး လက်ခံကြပါ တယ်။ လူထုသဘောထား ကောက်ခံပြီးတာနဲ့ ၂၀၁၉ ခုနှစ်ထဲမှာ စတင်အကောင်အထည်ဖော် ဆောင်ရွက်သွားမှာပါ”လို့ ပြောပါတယ်။
အဆိုပါကုမ္ပဏီက ရေသန့်စင်ဖြန့်ဖြူးရာမှာ တရက်ကိုရေဂါလံ ၂ သန်း ဖြန့်ဖြူးပေးသွားမှာ ဖြစ်ပြီး၊ ရေမီတာတပ်ဆင်တာနဲ့ ဝန်ဆောင်မှုစရိတ် တအိမ်လျှင် ၁၃၀,၀၀၀ ကျပ် ကုန်ကျမှာဖြစ်ပြီး၊ WHO Standard အရည်အသွေးရှိမှာဖြစ်ကာ၊ ရေ (၁) ယူနစ်ကို ၆၀၀ ကျပ်နှုန်းနဲ့ ၂၄ နာရီရေဖြန့်ဖြူးသွားမယ်လို့ ကုမ္ပဏီက သိရပါတယ်။
ခုလို ပုဂ္ဂိလိကက ရေပေးဝေမယ့်အပေါ် မြင်းခြံမြို့ခံ ပြည်သူတဦးက "စည်ပင်ကပေးတဲ့ ရေယူထားတာ နှစ်ပေါင်းကြာပြီ။ ရေက မလာဘူး။ ခုပေးမှာက သန့်စင်တဲ့ရေဆိုတော့ ကောင်းပါတယ်။ သူတို့ကိုလည်း စောင့်ကြည့်သွားရမှာဘဲ၊ ပြည်သူလူထု အပေါ်မှာ တကယ်စေတနာရှိပြီး အပြောနဲ့အလုပ်ညီဖို့တော့ လိုမယ်”လို့ ပြောပါတယ်။
မြင်းခြံမြို့မှာ စက်မှုဇုန်နဲ့ မြို့ပေါ်ရပ်ကွက် ၂၀ ရှိပြီး၊ အိမ်ထောင်စုပေါင်း ၁၆၀၀၀ ကျော်ရှိကာ လူဦးရေ ၈ သောင်းကျော် နေထိုင်ကြတာလည်း ဖြစ်ပါတယ်။
သတင်း - ရီရီထွန်း ( မြင်းခြံ)
