နိုင်ငံတကာရာဇဝတ်မှုတရားရုံး ဆုံးဖြတ်ချက်ကို မြန်မာအစိုးရပယ်ချ

နိုင်ငံတကာရာဇဝတ်မှု တရားရုံး (အိုင်စီစီ) က မြန်မာနိုင်ငံကို တရားစီရင်ခွင့်ရှိတယ်ဆိုတာနဲ့ ပတ်သက်ပြီး ပယ်ချတယ်လို့ သမ္မတရုံးက မနေ့က ထုတ်ပြန်ပါတယ်။ စက်တင်ဘာ ၆ ရက်နေ့မှာ ICC က ဆုံးဖြတ်ချက်ကို ထုတ်ပြန်တာဖြစ်ပြီး ဒီဆုံးဖြတ်ချက်ဟာ ပွင့်လင်းမြင်သာမှုမရှိသလို လုပ်ဆောင်တဲ့စနစ် မမှန်ကန်ဘူးလို့ သမ္မတရုံးက တုံ့ပြန်ထားတာပါ။ ဒါနဲ့ ပတ်သက်ပြီးတော့လည်း မနေ့ညနေပိုင်းက နေပြည်တော် သမ္မတအိမ်တော်မှာ လုပ်တဲ့ သတင်းစာရှင်းလင်းပွဲမှာ ပြောခွင့်ရသူ ဦးဇော်ဌေးက “အခြားဥပဒေတွေပေါ့၊ ကုလသမဂ္ဂ ဥပဒေတွေနဲ့ နှိုင်းယှဉ်ပြီးတော့ချထားတဲ့ ဆုံးဖြတ်ချက်ဖြစ်တယ်။ အခု စီရင်ခွင့်ရှိတယ်လို့ ပြောလိုက်တာက အထောက်အထားတွေ ပြန်တင်ပြရဦးမှာ။ အဲဒီ အဆင့်တော့ မရောက်သေးဘူး။ အခု အဆင့်က မြန်မာနိုင်ငံကို အိုင်စီစီအနေနဲ့ စီရင်ခွင့်ရှိ၊ မရှိကို ဥပဒေကြောင်းအရ သူတို့ဆုံးဖြတ်တာဖြစ်တယ်” လို့ ပြောပါတယ်။ ဒီကိစ္စ အမျိုးသားညီညွတ်ရေးကို အခြေခံတုံ့ပြန်ဖို့နဲ့ စည်းစည်းလုံးလုံး ညီညီညွတ်ညွတ် မလုပ်နိုင်ရင် နောက်ဆုံး ဘာဖြစ်သွားမလဲဆိုတဲ့အထိ စဉ်းစားစေချင်လို့လည်း သူက ပြောပါတယ်။ မြန်မာအစိုးရအနေဟာ ရခိုင်ဒေသ လူတဦးတယောက်ကိုမှ နှင်ထုတ်တာ မရှိဘဲ ထွက်ပြေးသူတွေ ပြန်လာနိုင်ရေးအတွက် ဘင်္ဂလားဒေ့ရ်ှနဲ့ ပူးပေါင်းဆောင်ရွက်နေတယ်လို့လည်း သမ္မတရုံး ထုတ်ပြန်ချက်မှာ ဖော်ပြထားပါတယ်။ ဦးဇော်ဌေးက “ဒီမလာသေးခင်က ဘင်္ဂလားဒေ့ရှ် နိုင်ငံခြားရေးဝန်ကြီးက ပို့လိုက်တယ်။ ပထမဆုံး အသုတ်အနေနဲ့ ၃၀ဝ၀ မကြာခင်ပို့မယ်။ အချိန်အတိအကျတော့မပါဘူး။ ဒါကို ကျနော်တို့ ဘက်ကတော့ မူလကတည်းကလည်း အမြန်ဆုံးလက်ခံနိုင်ဖို့ အသင့် လုပ်နေတာဖြစ်တယ်။ ဒါပေမယ့်လည်း အခြေအနေ အကြောင်းကြောင်းကြောင့် ကြန့်ကြာနေတယ်” လို့ ပြောပါတယ်။ အိုင်စီစီရဲ့ ဆုံးဖြတ်ချက်ကို မြန်မာအစိုးရက ပယ်ချသလို မြန်မာနိုင်ငံဟာ အိုင်စီစီရဲ့ အခြေခံဖွဲ့စည်းပုံဖြစ်တဲ့ ရောမသဘောတူညီမှု အဖွဲ့ဝင်မဟုတ်ဘူးလို့လည်း ထုတ်ပြန် ဖော်ပြထားပါတယ်။

//
More News
Up