၈ လေးလုံးအရေးတော်ပုံ ငွေတုအကြို နှစ်ပတ်လည်အခမ်းအနားကို ဒီနေ့မနက်က မန္တလေးမြို့ ချမ်းမြေ့သာစည်မြို့နယ် အလယ်တိုက်ကြီး ဒက္ခိဏာရာမ ဘုရားကြီးကျောင်းတိုက်မှာ အဖွဲ့အစည်း စုံစုံလင်လင်နဲ့ ကျင်းပသွားခဲ့ကြပါတယ်။
၈၈ မျိုးဆက်ကျောင်းသားခေါင်းဆောင်တွေနဲ့ အဖွဲ့အစည်းအသီးသီးက ခေါင်းဆောင်တွေဟာ မနက် ၆ နာရီမှာ ဆရာတော်သံဃာတော်တွေကို ဝါဆိုသင်္ကန်း ကပ်လှူပူဇော်ခဲ့ကြပါတယ်။ အဲဒီနောက် ၈ လေးလုံးမှာ အသက်ပေး ကျဆုံးသွားခဲ့ကြတဲ့ ရဟန်းရှင်လူ ကျောင်းသားပြည်သူတွေအတွက် ၁ မိနစ် ငြိမ်သက်ဂါရ၀ပြုခဲ့ကြပါတယ်။
ဒီအခမ်းအနားကို ကိုမင်းကိုနိုင်ဦးဆောင်တဲ့ ၈၈ မျိုးဆက်ကျောင်းသားခေါင်းဆောင်တွေ အနယ်နယ်အရပ်ရပ်က ၈ လေးလုံးအရေးတော်ပုံမှာ ပါဝင်လှုပ်ရှားခဲ့ကြတဲ့ ကျောင်းသားပြည်သူတွေ စာပေနယ်ကပုဂ္ဂိုလ်တွေနဲ့ နိုင်ငံရေးအင်အားစုတွေ ၂ ထောင်လောက် တက်ရောက်လာခဲ့ကြပါတယ်။
ဒီအခမ်းအနားမှာ ၈၈ မျိုးဆက်ကျောင်းသားအဖွဲ့က အချက် ၈ ချက်ပါ သဘောထားကြေညာချက် တစောင်ကိုလည်း ထုတ်ပြန်လိုက်ပါတယ်။
၈ လေးလုံးအရေးတော်ပုံ ငွေရတုအကြိုအထိမ်းအမှတ်အခမ်းအနား ဖြစ်မြောက်ရေး ကော်မတီကလည်း အချက် ၅ ချက်ပါ ကြေညာချက်တစောင်ကို ထုတ်ပြန်သွားပါတယ်။
ဒီအခမ်းအနားဟာ နှစ်ပေါင်း ၂၄ နှစ်အတွင်း ပထမဆုံး လွတ်လွတ်လပ်လပ် ကျင်းပနိုင်တဲ့ အခမ်းအနားဖြစ်သလို နိုင်ငံတော် ပြည်ထောင်စုအဆင့် ၀န်ကြီး ၂ ဦးကိုယ်တိုင် လာရောက်အသိအမှတ်ပြုပေးသွားတဲ့ အခမ်းအနားပွဲတခုလည်းဖြစ်ပါတယ်။ ၈ လေးလုံးအရေးတော်ပုံ ငွေရတုအကြို နှစ်ပတ်လည် အခမ်းအနားကို နံနက် ၈ နာရီခွဲမှာ ကျင်းပပြီးစီးသွားခဲ့ပါတယ်။
အခမ်းအနားအပြီးမှာ တက်ရောက်လာတဲ့ အဖွဲ့အစည်းအသီးသီးအပါအ၀င် နိုင်ငံရေးအင်အားစုတွေနဲ့ ၈၈ မျိုးဆက်ကျောင်းသားခေါင်းဆောင်တွေက နိုင်ငံပြောင်းလဲမှုဖြစ်စဉ်မှာ အနာဂတ်အတွက် ပူးပေါင်းဆောင်ရွက်မှု ဖော်ဆောင်ရေးကို ဆွေးနွေးတိုင်ပင်ခဲ့ကြပါတယ်။
Read more
