စစ်ကိုင်းတိုင်းလွှတ်တော် အရေးပေါ်အစည်းအဝေး ကျင်းပ
Aung Ko Latt
·
September 5, 2018
ဌာန/အဖွဲ့အစည်းတွေရဲ့ ငွေလုံးငွေရင်းအသုံးစရိတ် ရန်ပုံငွေ လွှဲပြောင်းသုံးစွဲတာနဲ့ ပတ်သက်လို့ ဒုတိယအကြိမ် စစ်ကိုင်းတိုင်းဒေသကြီး လွှတ်တော် အရေးပေါ်အစည်းအဝေးကို စက်တင်ဘာ ၅ ရက်နေ့က ကျင်းပခဲ့ပါတယ်။
အရေးပေါ်အစည်းအဝေးလုပ်ရတာက ၂၀၁၈ ခုနှစ်၊ ဧပြီကနေ စက်တင်ဘာလအထိ တိုင်းဒေသကြီး ဘဏ္ဍာရန်ပုံငွေမှာ ပါဝင်တဲ့ ဌာန/အဖွဲ့အစည်းတွေရဲ့ ငွေလုံးငွေရင်းအသုံးစရိတ် ရန်ပုံငွေ လွှဲပြောင်း သုံးစွဲတာ၊ အထွေထွေပိုလျှံရန်ပုံငွေ လွှဲပြောင်းသုံးစွဲတာနဲ့ပတ်သက်ပြီး ပြုလုပ်တာလို့ အစည်းအဝေးတက်ရောက်လာတဲ့ လွှတ်တော်ကိုယ်စားလှယ်တွေက ပြောပါတယ်။
ဘဏ္ဍာငွေလွှဲပြောင်းတာနဲ့ပတ်သက်ပြီး တိုင်းအစိုးရအဖွဲ့ဝင် စီမံ/ဘဏ္ဍာဝန်ကြီးက ၂၀၁၈ ခုနှစ်၊ ဧပြီကနေ စက်တင်ဘာလအထိ အဖွဲ့အစည်း ၃ ခု ငွေလုံးငွေရင်းအသုံးစရိတ် ရန်ပုံငွေ ၃၄.၀၆၅ ကျပ်သန်း၊ အဖွဲ့အစည်း ၁ ခု အထွေထွေပိုလျှံရန်ပုံငွေ ကျပ်သန်း ၁၀.၅၀၀ သန်း စုစုပေါင်း ၄၄.၅၆၅ ကျပ်သန်း၊ တိုင်းပိုလျှံရန်ပုံငွေမှ အဖွဲ့အစည်း ၅ ခုအတွက် ၇၈၄.၄၄၀ ကျပ်သန်းတို့နဲ့ ပတ်သက်လို့ အသေးစိတ်ကို လွှတ်တော်ကိုတင်သွင်းခဲ့ပြီး လာမယ့် ၇ ရက်နေ့မှာ ပြန်လည်ဆွေးနွေးမှာဖြစ်ပါတယ်။
အရေးပေါ်အစည်းအဝေးကို လွှတ်တော်ကို တက်ရောက်ခွင့်ရှိသူ ၁၀၀ ဦးရှိတဲ့အထဲက ၉၆ ဦး တက်ရောက်ခဲ့ပါတယ်။
