မူးယစ်ဆေးဝါးနှင့် လက်နက်များ တောင်ငူမြို့တွင် ဖမ်းဆီးရမိ
DVB
·
August 12, 2018
ပဲခူးတိုင်းဒေသကြီး တောင်ငူမြို့နယ် ကံရိုးကျေးရွာ ရန်ကုန်၊ မန္တလေး ကားလမ်းမဟောင်း ဘေးရှိ သွန်းရွှေစင်စတိုးဆိုင်ရှေ့မှာ အမျိုးသားတဦးဆီကနေ WY စိတ်ကြွဆေးပြားတွေနဲ့ လက်နက်ခဲယမ်းတွေ ဖမ်းဆီးရမိခဲ့တယ်လို့ တောင်ငူခရိုင် ရဲတပ်ဖွဲ့က ပြောပါတယ်။
ဖားသုဟာ တောင်ငူအမှတ် ၃ နယ်မြေရဲစခန်းက မူးယစ်ဆေးဝါးများနှင့် စိတ်ကို ပြောင်းလဲစေသောဆေးဝါးများဆိုင်ရာ ဥပဒေပုဒ်မ ၁၅/၁၉(ဂ)/၂ဝ(က)/၂၂(ခ)/၂၁ နဲ့ အမှုဖွင့်ခံ ထားရတဲ့ တရားခံပြေးတဦးဖြစ်ပြီး ဖမ်းဆီးရမိရေးအတွက် အမာခံသတင်းပေးတွေ၊ မူးယစ် အထူးအဖွဲ့ငယ်တွေ၊ နယ်မြေခံရဲစခန်းတွေပေါင်းပြီး စောင့်ကြည့်ခဲ့တာလို့ ပဲခူးတိုင်းဒေသကြီး ရဲတပ်ဖွဲ့ မူးယစ်အထူးအဖွဲ့ငယ်မှ ရဲအုပ်တင်ဦးက ပြောပါတယ်။
“သူဟာ တောင်ငူမြို့ကို မကြာမကြာ လာရောက်တယ်လို့ သတင်းရရှိတယ်။ အဲ့ဒါကြောင့် ကျနော်တို့ရဲ့စောင့်ကြည့်တဲ့အခါမှာ ၁ဝ ရက်နေ့ညက လမင်းအိမ်တည်းခိုခန်းမှာ လာပြီးတော့ တည်းတယ်လို့ အမာခံသတင်းပေးကပြောပါတယ်။ သူ့မှာ လက်နက်တွေ၊ လက်ပစ်ဗုံးတွေ ပါတယ်လို့လည်း သတင်းရထားပါတယ်။ ဒီကောင်က လက်ကလည်း ယဉ်တယ်။ သူ့ကိုဖမ်းတာ နဲ့ လက်ပစ်ဗုံးနဲ့ခွဲမယ် သေနတ်နဲ့ပစ်မယ်လို့ သတင်းတွေလည်း ရတဲ့အတွက် သေချာစီမံပြီး ဖမ်းဆီးဖို့ဆောင်ရွက်ပါတယ်။ အဲ့အချိန်မှာ သူက လမင်းအိမ်တည်းခိုခန်းက ကားနဲ့ထွက်သွား ပါတယ်။ ကျနော်တို့ နောက်ယောင်ခံလိုက်ပြီး တောင်ငူမြို့နယ် ကံရိုးကျေးရွာက သွန်းရွှေစင် စတိုးဆိုင်ရှေ့မှာ ကားရပ်ပြီး ကားပေါ်က ဆင်းဆင်ချင်းမှာ ဖမ်းဆီးခဲ့ပါတယ်။”
တရားခံပြေး ဖားသုဆီကနေ ငွေ ၂၂ သိန်းကျော်၊ မူးယစ်ဆေးဝါး ၅၄၈၁ ပြား၊ M-38 ပစ္စတိုစတီးရောင် BABILON DOY CIAVITORIA (အင်္ဂလိပ်စာတမ်းပါ) ၁ လက်၊ 9MM ပစ္စတိုကျည် ၅ တောင့်၊ ၃၈ SUPER AUTO စာတမ်းပါ ကျည် ၇ တောင့်၊ ပွိုင့်တူးတူးကျည် ၆ တောင့်၊ ရွှေရောင်ဆေးမှုတ်ထားတဲ့ နာနတ်သီးဗုံး တလုံး၊ ငွေရောင်ခြောက်လုံးပြူးသေနတ် ပုံစံ ဂက်စ်မီးခြစ် ၁ ခုနဲ့ MARK-X အမျိုးအစား ခဲရောင်ဆလွန်းကားတစီးတို့ သိမ်းဆည်းရမိခဲ့တယ် လို့လည်း သိရပါတယ်။
သတင်း - သားကြီး (တောင်ငူ)
