“သူများကလေးတွေ ကျောင်းသွားကြတာတွေ့ရင် ကျမလည်း ကျမကလေးတွေကို ကျောင်းသွားစေချင်တာပေါ့… ဒါပေမယ့်… ကျမတို့ဘဝက ကြုံရာကျပန်း လုပ်ကိုင် စားသောက်ရတော့ ကျောင်းမထားနိုင်ဘူး။ ရင်ထဲမှာတော့ တော်တော်လေး မကောင်းဘူး။” ကလေးမိခင်တယောက်က ရင်ဖွင့်တာပါ။ မိသားစုမှာ အကြီးဆုံးဖြစ်တဲ့ မိန်းကလေးတယောက်ကလည်း သူ့ဘဝကို အခုလို ရင်ဖွင့်ပါတယ်။ “သမီးက မောင်နှမတွေထဲမှာ အကြီးဆုံးလေ… ဆရာဝန်ကြီး၊ အင်ဂျင်နီယာကြီးဖြစ်ဖို့ ငယ်ငယ်က စိတ်ကူးယဉ်ခဲ့ဖူးပါတယ်။ သမီးအောက်မှာ ၉ တန်းတက်တော့မယ့် ညီမလေးရယ်၊ ၇ တန်းတက်တော့မယ့် မောင်လေးရယ် ရှိတယ်။ ညီမလေးက စာတော်တယ်။ ဒီတော့… သမီးပဲ အနစ်နာခံပြီး ကျောင်းထွက်လိုက်ရတယ်။” “နာဂစ်က ကျမတို့ ဘဝတွေကို တဆစ်ချိုး ပြောင်းသွားစေခဲ့တယ်။ ကျမတို့ ဇာတိမှာလည်း လုပ်ကိုင်စားသောက်လို့ မရတော့… ရန်ကုန်ကို တက်လာတာ…၊ နေရတာက ကျူးကျော်တဲလေးမှာပါ။ စားသောက်ရတာကတော့ ဖြစ်သလို ကြုံသလို ဆိုသလိုပါပဲလေ…။ ကလေး ၃ ယောက်စလုံးကို ကျောင်းမထားနိုင်လို့ အငယ်ဆုံးကလေးကိုပဲ ထားရတယ်” နောက်ထပ် ကလေးမိခင်တယောက် ပြောပြခဲ့တာပါ။ [caption id="attachment_284653" align="alignleft" width="384"] Photo Credit: NATO Association Of Canada (NAOC)[/caption] နှစ်တနှစ်ရဲ့ စာသင်နှစ်အစဖြစ်တဲ့ ဇွန်လမှာ မြန်မာတနိုင်ငံလုံး အတိုင်းအတာနဲ့ ကျောင်းတွေ ပြန်စဖွင့်ပါပြီ။ ကျောင်းတွေ ပြန်ဖွင့်ပြီဖြစ်ပေမယ့် တချို့မိခင်တွေဟာ သူတို့ရဲ့ သားသမီးတွေကို စာသင်ကျောင်းခန်းဆီ မပို့နိုင်ပါဘူး။ အစိုးရသစ်လက်ထက်မှာ အထက်တန်းအထိ အခမဲ့ပညာရေးစနစ်ကို ကျင့်သုံးနေပြီ ဆိုပေမယ့် စားဝတ်နေရေးနွံထဲမှာ နစ်နေသူတွေအတွက်တော့ ပညာရေးထက် အသက်ရှင်သန်ရေးကိုပဲ ဦးစားပေးနေကြသူတွေ အများကြီး ရှိနေဆဲပါ။ ဒေါ်ခင်မွန်ဟာ ရန်ကုန်တိုင်းဒေသကြီး သာကေတမြို့နယ်ထဲက ရပ်ကွက်တခုမှာ အိမ်ငှားနေထိုင်ရသူပါ။ သူမနဲ့ သားသမီး ၃ ယောက်ကို ရှာဖွေကျွေးမွေးနေတဲ့ ခင်ပွန်းသည်ဟာ လွန်ခဲ့တဲ့ ၅ နှစ်က ယာဉ်မတော်တဆဖြစ်မှုနဲ့ ကွယ်လွန်ခဲ့ပြီးနောက်ပိုင်း သူတို့ဘဝဟာ ကျပ်တည်းဆင်းရဲစွာ ရုန်းကန်နေရတာပါ။ နစ်နာကြေးအဖြစ် ရခဲ့တဲ့ ငွေကြေးလေးကို ခြစ်ခြုတ်စားသောက်ပြီး နောက်ပိုင်းမှာ အသုပ်ဆိုင်လေးဖွင့်ကာ မိသားစုဝမ်းရေးကို ဖြေရှင်းနေရပါတယ်။ သူမရဲ့မိဘတွေက အထက်အညာကျေးလက်က ဖြစ်တာကြောင့် မိဘတွေရဲ့ အကူအညီလည်း မရနိုင်သလို ယောက္ခမတွေကလည်း လှည့်မကြည့်နိုင်ကြတဲ့အခါ… လွန်ခဲ့တဲ့ ၂ နှစ်လောက်ကစပြီး ကလေးတွေကို ကျောင်းထုတ်ခဲ့ရပါတယ်။ “အသုပ်ဆိုင်ကလည်း ရောင်းမကောင်းဘူး..၊ အဲဒီတော့ ရပ်ကွက်ထဲမှာ အဝတ်လိုက်လျှော်ရတယ်။ အဝတ်တွေကို မီးပူတိုက်ပေးရတယ်။ အကြီးဆုံးသားကို ၁ဝ တန်းအထိတော့ ဖြစ်အောင် ကျောင်းထားပေးခဲ့တယ်။ ဒါပေမယ့် သူက စာမေးပွဲကျတယ်။ အမေ ပင်ပန်းနေပြီတဲ့။ နောက်နှစ် ဆက်မဖြေတော့ဘဲ စပယ်ယာလိုက်နေတယ်” (ရန်ကုန်မှာ YBS စနစ် ပြောင်းပြီး စပယ်ယာတွေ မထားတော့ပေမယ့် ဘတ်စ်ကားလိုင်းတချို့မှာ စပယ်ယာတွေ ရှိနေဆဲပါ) လို့ ပြောပြပါတယ်။ “အလတ်မလေးကိုလည်း ၈ တန်းအထိပဲ ထားနိုင်တယ်။ သူက သာကေတ (၁) ဈေးက ဆိုင်တခုမှာ ဆိုင်အကူ ဝင်လုပ်နေတယ်။ အငယ်ဆုံးကောင်လေးက ၆ တန်း။ နောက်နှစ်တော့ သူ့ကို ကျောင်းပြန်ထားနိုင်အောင် ကျမ ကြိုးစားမယ်။” ဒေါ်ခင်မွန်ရဲ့ လက်နှစ်ဖက်က အရေပြားတချို့ဟာ ဆပ်ပြာတွေစားထားလို့ ပေါက်နေပါပြီ။ အလုပ်ပင်ပန်းမှုနဲ့ စားဝတ်နေရေးအတွက် ရုန်းကန်နေရမှုတွေကြောင့် အသက်က ရှိရင်းစွဲထက် ပိုမိုရင့်ရော်နေပါတယ်။ “မအိအိမင်း”က မင်္ဂလာဈေးက အထည်ဆိုင်တဆိုင်မှာ အရောင်းစာရေးမ လုပ်နေရတာဖြစ်ပြီး တလလုံးမှာမှ လစာ ၁ သိန်း ၂ သောင်းကျပ်ပဲ ရပါတယ်။ သူနေတဲ့ မြောက်ဥက္ကာပကနေ မင်္ဂလာဈေးအထိ ဘတ်စ်ကားကြပ်ကြပ် တိုးစီးရပေမယ့် မညည်းညူနိုင်ပါဘူး။ ဘာလို့လဲဆိုတော့ လေဖြတ်နေတဲ့ ဖခင်ဖြစ်သူရယ်၊ ကျောင်းတက်နေတဲ့ မောင်လေးနဲ့ ညီမလေး ရှိနေလို့ပါပဲ။ ဈေးပိတ်ရက်တွေမှာ ဖခင်ကိုပြုစုရင်း တဖက်ကလည်း စာဖတ်တဲ့ အလေ့အကျင့်ကို ပျိုးထောင်ပါတယ်။ မအိအိမင်းအနေနဲ့ မိသားစုအရေးအတွက် အနစ်နာခံဖို့ ဖြစ်လာတာကို ဝမ်းနည်းမိပေမယ့် တခြားရွေးချယ်စရာလည်း မရှိပါဘူး။ သူ့ညီမလေးက ပညာရေးမှာ ထူးချွန်ပြီး အတန်းတိုင်းမှာ အမြဲတမ်း အဆင့် ၁ဝ ဝင်သူမို့ အမတယောက်အနေနဲ့ ညီမလေးကို ကျောင်းဆက်တက်နိုင်ဖို့ကိုပဲ ဦးစားပေးလိုက်ရတာပါ။ တကယ်လို့ သူ ကျောင်းဆက်တက်မယ်ဆိုရင်တော့ အမေဖြစ်သူအတွက် ဝန်ထုပ်ဝန်ပိုးတွေ ပိနေမှာကို သူ သိနေပါတယ်။ သူ့မိခင်ဖြစ်သူက ခင်ပွန်းသည်ကို ပြုစုရင်း အိမ်မှာ မိုးလင်းကနေ မိုးချုပ် စက်ချုပ်ရပါတယ်။   စက်ချုပ်တယ် ဆိုတာကလည်း ခေါင်းအုံးစွပ်တွေကို လက်ခစားနဲ့ ချုပ်ရတာလို့ ပြောပြပါတယ်။ “သမီးအမေလည်း ပင်ပန်းနေပြီ။ အဖေကလည်း ဘာမှမလုပ်နိုင်ဘူးလေ။ ပညာချွန်တဲ့ ညီမလေးကိုတော့ တက္ကသိုလ်ဆက်ထားပေးမယ်လို့ စိတ်ကူးထားတယ်။ မောင်လေးကိုတော့ အနည်းဆုံး ၁ဝ တန်း အောင်စေချင်တယ်” လို့ သူ့ရဲ့ ရင်တွင်းဆန္ဒကို ပြောပြပါတယ်။ “ဒေါ်လေးလေးမာ” ကတော့ ဧရာဝတီတိုင်းဒေသကြီး လပွတ္တာမြို့နယ်၊    သောင်ကလေးဝကျေးရွာက ဖြစ်ပါတယ်။ ၂ဝဝ၈ ခုနှစ်၊ နာဂစ်မုန်တိုင်းမှာ သူတို့အိမ် ပျက်စီးခဲ့ရသလို လယ်ယာမြေတွေမှာလည်း ဆားငံရည်တွေ ဝင်ရောက်ခဲ့တာကြောင့် ပျက်စီးခဲ့တာပါ။ နာဂစ်မဖြစ်ခင်ကတော့ သူတို့ဟာ မရှိမရှား နေထိုင်နိုင်ခဲ့ပေမယ့် နာဂစ်မုန်တိုင်းရဲ့ နောက်ဆက်တွဲအဖြစ် မိသားစုလိုက် ရန်ကုန်ကို ပြောင်းရွှေ့လာကြရပါတယ်။ အစောပိုင်းမှာတော့ လှိုင်သာယာမြို့နယ်မှာ အိမ်ငှားနေထိုင်နိုင်ခဲ့ပေမယ့် နောက်ပိုင်း အိမ်ငှားခတွေ ဈေးကြီးလာတာနဲ့ သူတို့မိသားစုဟာ တခြားရွှေ့ပြောင်းနေထိုင်သူတွေလိုပဲ စက်မှုဇုန်တခုမှာ ကျူးကျော်တဲထိုးပြီး နေထိုင်နေရတာပါ။ ဒေါ်လေးလေးမာရဲ့ခင်ပွန်းက ဆိုက္ကားနင်းပြီး သူမက ဒဂုံဧရာ အဝေးပြေးကားဝင်းမှာ ငုံးဥပြုတ်၊ ရေသန့်ဘူး၊ မြေပဲကြော် စတာလေးတွေ ရောင်းပါတယ်။ အဲဒီလို နေ့စဉ် ဝင်ငွေနည်းနည်းနဲ့ သားသမီး ၃ ယောက်စလုံးကို ကျောင်းထားဖို့ဆိုတာ “မမီတဲ့ပန်း တုံးခုလို့လှမ်း” ဆိုသလို ဖြစ်နေရတယ်လို့လည်း သူက ဆိုပါတယ်။ ပိုဆိုးတာက ဒေါ်လေးလေးမာတို့ မိသားစုဟာ ကျူးကျော်နေထိုင်သူတွေ ဖြစ်လို့ ရန်ကုန်မှာ အိမ်ထောင်စုစာရင်းလည်း မရတာပါ။ ယခင်နေခဲ့တဲ့ ကျေးရွာအုပ်ချုပ်ရေးမှူးရဲ့ ထောက်ခံစာလေးကြောင့်သာ အငယ်ဆုံး သမီးလေးတယောက်ကိုပဲ ကျောင်းထားလို့ရပါတယ်။ “အခမဲ့ပညာရေး ဆိုပေမယ့် ကျမတို့က တနေ့လုပ်မှ တနေ့စားရတာလေ။ ကလေးတွေ အကုန်လုံး ကျောင်းထားရင် ကျူရှင်စရိတ်လည်း ထပ်မပေးနိုင်ဘူး။ အခုတောင် အငယ်ဆုံးမလေးက ၄ တန်းရောက်နေပြီ။ ကျောင်းမှာလည်း ကျူးတဲကနေ ကျောင်းတက်ရတာဆိုတော့ သမီးလေးမှာ အနှိမ်ခံရရှာတယ်” လို့ စိတ်မကောင်းတဲ့ အသံအက်အက်နဲ့ ဒေါ်လေးလေးမာက ပြောပြပါတယ်။ “သူ့အထက်က သားနှစ်ယောက်။ တယောက်က လက်ဖက်ရည်ဆိုင် စားပွဲထိုး။ တယောက်ကတော့ ‘ဘောက်’ (ကြုံရာကျပန်း) လုပ်တာပေါ့။” စက်မှုဇုန်တွေအတွင်း ကျူးကျော်နေထိုင်သူတွေကို ရန်ကုန်တိုင်းဒေသကြီး အစိုးရက ဖယ်ရှားတော့မယ်ဆိုတဲ့ သတင်းတွေ ထွက်ပေါ်နေလို့ သူ့အနေနဲ့ ရတက်မအေးနိုင်ဘဲ ဖြစ်နေရတယ်လို့လည်း ဆိုပါတယ်။ အရပ်သားအစိုးရ တက်လာပြီးနောက်ပိုင်း ပညာရေးကဏ္ဍမှာ အသုံးစရိတ်တွေ တိုးမြှင့်သုံးစွဲနေပေမယ့် တဖက်က လူတဦးချင်းစီရဲ့ ဝင်ငွေ တိုးမြင့်မလာသေးပါဘူး။ ဥပမာအားဖြင့် ၂ဝ၁၄-၁၅ ဘဏ္ဍာနှစ်မှာ ပညာရေးအသုံးစရိတ်ဟာ နိုင်ငံအသုံးစရိတ်ရဲ့ ၅ ဒသမ ၉ ရာခိုင်နှုန်း ရှိခဲ့ပေမယ့် ၂ဝ၁၇-၁၈ ဘဏ္ဍာနှစ်မှာတော့ ၈ ဒသမ ၅၃ ရာခိုင်နှုန်းအထိ တိုးမြှင့်သုံးစွဲတာပါ။ မြန်မာနိုင်ငံသားတဦးရဲ့ တနှစ် ပျမ်းမျှဝင်ငွေဟာ အမေရိကန်ဒေါ်လာ ၁၇ဝဝ ဝန်းကျင်လို့ ခန့်မှန်းပါတယ်။ အဲဒီပမာဏကို လက်ရှိ ငွေလဲလှယ်နှုန်းဖြစ်တဲ့ ၁ ဒေါ်လာ ၁၃ဝဝ ကျပ်နဲ့ မြှောက်ကြည့်ရင် မြန်မာနိုင်ငံသားတဦးရဲ့ ၁ နှစ်ပျမ်းမျှ ဝင်ငွေဟာ ၂၂ သိန်း ၁ သောင်းကျပ်ပါ။ ၁ လ ပျမ်းမျှဝင်ငွေကို ဆက်ပြီးတွက်ကြည့်တော့ ၁၈၄၁၆၆ ကျပ်ဝန်းကျင်ပဲ ရှိတဲ့သဘောပါ။ ပျမ်းမျှအားဖြင့် ၁ လ ကျပ် ၂ သိန်းတောင် မပြည့်တဲ့ ဝင်ငွေဟာ မိသားစုရဲ့ ပညာရေး၊    ကျန်းမာရေးအတွက် ဘယ်လိုမှ လောက်ငအောင် သုံးစွဲလို့ မရနိုင်ပါဘူး။ မိဘတွေအားလုံးကတော့ ကိုယ့်သားသမီးကို ပညာသင်စေချင်ကြမှာပါ။ ငွေကြေး တတ်နိုင်သူတွေက သူတို့ရဲ့ ကလေးတွေကို နာမည်ကြီး ကျောင်းကောင်းကောင်းမှာထား၊    အကောင်းစားကားနဲ့ ကျောင်းပို့ ကျောင်းကြိုလုပ်၊ အိမ်မှာလည်း အကောင်းဆုံးဂိုက်ကို ငှားပြီး ပညာသင်ကြားပေးနိုင်ပေမယ့် ဆင်းရဲချို့တဲ့တဲ့ မိသားစုတွေမှာတော့ ကျောင်းထားဖို့ထက် မိသားစု အသက်ရှင်သန်ဖို့သာ ရုန်းကန်နေရပါတယ်။ ဒေါ်ခင်မွန်က နွမ်းယဲ့ယဲ့ လေသံနဲ့ အခုလို ပြောလိုက်ပါတယ်။ “ကလေးတွေအပေါ် မိခင်တယောက်အနေနဲ့ တာဝန်မကျေသလို ခံစားနေရတယ်။   အစိုးရကသာ ကျမတို့လို လူတွေအတွက် ဝင်ငွေများလာအောင် အစီအမံတွေ လုပ်ပေးနိုင်ရင် ကလေးတွေကို ကျောင်းထားနိုင်မှာပါ။ ပညာမတတ်တော့ အလုပ်အကိုင် ကောင်းကောင်းမရ၊    အလုပ်အကိုင်ကောင်းကောင်း မရတော့ ဝင်ငွေနည်း၊ ဝင်ငွေနည်းတော့ ကလေးတွေ ကျောင်းမထားနိုင်ဆိုတဲ့ သံသရာလည်နေတဲ့ နွံထဲက ရုန်းထွက်ချင်ပါပြီ။” မျက်ရည်စတွေ ဝေ့သီနေတဲ့ သူမရဲ့ မျက်ဝန်းအကြည့်တွေကတော့ လမ်းပေါ်မှာ ဖြတ်သွားတဲ့ အဖြူ၊ အစိမ်းဝတ် ကျောင်းသူ ကျောင်းသားလေးတွေရဲ့ ကျောပြင်ကို ငေးမောနေပါတော့တယ်။     ။ သွေး(စစ်ကိုင်း) (hiburma.net ဝက်ဘ်ဆိုက်မှ ပြန်လည်ဖော်ပြသည်။)