ရဲအရာရှိ အတတ်သင်တန်းကျောင်းတွင် နေထိုင်သူများကို အင်အားသုံးဖယ်ရှားခိုင်း
Aung Aung Naing
·
August 5, 2018
မန္တလေးမြို့ ချမ်းအေးသာစံမြို့နယ် ပြည်ကြီးမျက်မှန်ရပ်က ရဲအရာရှိ အတတ်သင်တန်း ကျောင်းက တိုက်ခန်းပေါင်း ၃ဝ မှာ နေထိုင်တဲ့ မိသားစုဝင်တွေကို ဒီနေ့ ရဲအင်အားသုံး ဖယ်ရှားခဲ့တဲ့အပေါ် မကျေမနပ် ဖြစ်နေကြပါတယ်။
“ကျမတို့နေထိုင်လာတာ နှစ်ကို ၂၀ ကျော်လာပြီလေ။ ခြင်္သေ့မင်းကုမ္ပဏီနဲ့ ကန်ထရိုက် ဦးတူးတူးတို့က အခန်း ၁၅ ခန်းဆီ ဆောက်ပြီးရောင်းခဲ့လို့ ကျမတို့က အဲဒီခတ်က သိန်း ၁၀၀ နဲ့ ဝယ်ခဲ့တာပါ။ မြန်မာနိုင်ငံ ရဲတပ်ဖွဲ့အနေနဲ့လည်း အခန်းလခ လာကောက်တယ်၊ မိခင်နဲ့ ကလေးစောင့်ရှောက်ရေးအသင်းအနေနဲ့လည်း ရန်ပုံငွေဆိုပြီး ကောက်တယ်။ အခုတော့ ကျမတို့ကို အင်အားအလုံးအရင်းနဲ့ မောင်းထုတ်တယ်၊ ကျမတို့ကို ဝိုင်းကူညီပေးကြပါ”လို့ ဒေါ်ချစ်က ပြောပါတယ်။
“ပြည်သူတွေကို ကူညီပေးရမယ့်အစား ပြည်သူတွေကို ဒုက္ခပေးနေတာက ပြည်သူရဲတွေပါ။ ကူညီပါရစေဆိုပြီး ဘာများကူညီပေးခဲ့တာရှိလဲ မေးချင်တယ်။ တာဝန်ခံမှု တာဝန်ယူမှုမရှိတဲ့ အစိုးရခေတ်မှာ လူလာဖြစ်ရတာကိုက ကံဆိုးလွန်းတယ်။ မဖယ်ရင် အိမ်မှာ ၅ ယောက်ရှိရင် ၅ယောက်လုံး ဖမ်းမယ် ထောင် ၃ နှစ်ချမယ်လို့လည်း ခြိမ်းခြောက်သွားတာ” လို့ မအဉ္ဖလီက ပြောပါတယ်။
တိုက်ခန်းရှင်တွေအနေနဲ့ သြဂုတ်လ ၃၁ ရက်နေ့ကို အပြီးအပိုင်ထွက်ပေးဖို့ ခံဝန်ကတိကို အမှတ် ၃ နယ်မြေရဲစခန်းကို သွားရောက်လက်မှတ်ထိုးကြရမယ်လို့ ရဲမှူးကြီး မင်းအောင်က ပြောပါတယ်။
အရင် မြန်မာနိုင်ငံရဲတပ်ဖွဲ့ ဗဟိုလေ့ကျင့်ရေးဌာနအမည်နဲ့ တည်ရှိခဲ့ပြီး ၂ဝ၁၂ ခုနှစ်ကျမှ မြန်မာနိုင်ငံ ရဲတပ်ဖွဲ့ ရဲအရာရှိ အတတ်သင်တန်းကျောင်အဖြစ် စတင်ပြောင်းလဲခဲ့တာပါ။ ၁၉၉၅ ခုနှစ်မှာ ကန်ထရိုက်နဲ့ အရောင်းအဝယ်စာချုပ်ဆိုခဲ့ပြီး ၁၉၉၇ ခုနှစ်မှာ ရဲအတတ်သင် သိပ္ပံကျောင်းသက်သာဆိုင်ခန်း ကြီးကြပ်မှုကော်မတီအနေနဲ့ စာချုပ်ကို ပြန်လည်ချုပ်ဆိုခဲ့တာ ဖြစ်ပါတယ်။
