မြန်မာမေကောင်း သစ်အချောထည်စက်ရုံ အလုပ်သမားများဆန္ဒပြ
Aung Aung Naing
·
August 1, 2018
မန္တလေးတိုင်း၊ ပြည်ကြီးတံခွန်မြို့်နယ်၊ အနော်ရထာလမ်းနဲ့ မင်းကြီးရန်နောင်လမ်းရှိ မြန်မာမေကောင်း သစ်အချောထည်စက်ရုံက အလုပ်သမားသမား ၃၀ကျော်ဟာ ဒီမနက် အလုပ်သမားရပိုင်ခွင့်တွေအတွက် ဆန္ဒပြတောင်းဆိုခဲ့ကြပါတယ်။
မြန်မာမေကောင်းစက်ရုံက အလုပ်သမားတွေဟာ ကျွမ်းကျင်စရိတ်ရရှိရေး၊ လုံလောက်တဲ့ လေဝင်လေထွက်ကောင်းမွန်ရေး၊ အလုပ်သမားများနားနေဆောင်ထားရှိရေး၊ စက်ရုံ အလုပ်သမားသမဂ္ဂအဖွဲ့ဝင်တွေကို ခွဲခြားမဆက်ဆံရေး စတဲ့အချက် ၁၀ ချက်ကို တောင်းဆို ဆန္ဒထုတ်ဖော်ခဲ့ကြတာပါ။
စက်ရုံ အလုပ်သမား သမဂ္ဂအတွင်းရေးမှူး မတိုးတိုးအေးက “ကျမတို့အလုပ်သမားတွေက အလုပ်ရှင်နဲ့ ၂၀၁၄ခုနှစ်ကတည်းက စပြီးညှိနှိုင်းခဲ့တာ ခုအချိန်အထိမပြေလည်ခဲ့ဘူး။ ဒါကြောင့် ကျမတို့ကတောင်းဆိုချက်တွေ မရမချင်း ဆန္ဒထုတ်ဖော်သွားမှာပါ။ ကျမတို့အနေနဲ့ ရက်မှန်ကြေးနဲ့ နှစ်တိုးကြေးတွေကို ၂၀၁၇ ခုနှစ်ကတည်းက မပေးခဲ့ဘူး။ အဲဒါတွေလည်း ပြန်လိုချင်တယ်။ သောက်ရေဆိုရင်လည်း ဗွိုင်လာသုံးပြီးသား ရေတွေကို သောက်ရတယ်။ သန့်ရှင်းတဲ့ သောက်သုံးရေမဟုတ်ဘူး။ တခါလေတော့လည်း ရေတွေကအရမ်းနံနေတာကြောင့် သောက်သုံးရေကို သန့်ရှင်းတဲ့ သောက်သုံးရေရချင်တယ်”လို့ ပြောပါတယ်။
ကျန်းမာရေနဲ့ မညီညွတ်တဲ့ မိုတက်နေတဲ့ ကုန်ကြမ်းတွေကို ကိုင်တွယ် လုပ်ကိုင်နေရတာကြောင့် ကျန်းမာရေးစောင့်ရှောက်မှု ရချင်တယ်၊ ဆေးပေးခန်းနဲ့ ကျန်းမာရေးမှူး ထားရှိပေးဖို့ တောင်းဆိုရတာလို့ လည်း ဆန္ဒပြအလုပ်သမား မခိုင်ဇူးထက်ကပြောပါတယ်။
မြန်မာမေကောင်း သစ်အချောထည် စက်ရုံဟာ အလုပ်သမား ၁၀၀နီးပါးနဲ့ လည်ပတ်နေတဲ့စက်ရုံဖြစ်ပြီး အလုပ်သမားတွေ ခုလို ဆန္ဒပြတာနဲ့ ပတ်သက်ပြီး စက်ရုံ တာဝန်ရှိသူတွေကိုတော့ ဆက်သွယ်မေးမြန်းလို့ မရခဲ့ပါဘူး။