ဘားအံ ရေဘေးဒုက္ခသည်များကို အတိုင်ပင်ခံပုဂ္ဂိုလ် အားပေးစကားပြော
DVB
·
July 26, 2018
ကရင်ပြည်နယ်၊ ဘားအံမြို့ကို ဒီနေ့ မနက်ပိုင်းက နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရောက်ရှိလာပြီး ရေးဘေးကယ်ဆယ်ရေးစခန်းတွေမှာ ခိုလှုံနေတဲ့ ဒေသခံပြည်သူတွေကို တွေ့ဆုံအားပေးစကား ပြောကြားပြီး အကူအညီတွေပေးသွားပါတယ်။
ကယ်ဆယ်ရေးစခန်းတွေကိုရောက်ရှိ ခိုလှုံနေတဲ့ ဒေသခံပြည်သူတွေကို သွားရောက်ကြည့်ရှု အားပေးစကားပြောကြားပြီး ဌာနဆိုင်ရာတွေက ပေးအပ်လှူဒါန်းတဲ့ ထောက်ပံ့ငွေနဲ့ စားသောက်ဖွယ်ရာတွေကို လက်ခံခဲ့ပါတယ်။
ဇူလိုင် ၂၅ ရက်နေ့ ကရင်ပြည်နယ်မှာပြုလုပ်မယ့် လူငယ်နှင့် ငြိမ်းချမ်းရေး စကားဝိုင်းကို လာရောက်ဖို့ စီစဉ်ခဲ့ပေမယ့် ရာသီဥတုအခြေအနေ ဆိုးရွားနေတဲ့အတွက် ရက်ရွှေ့ဆိုင်းခဲ့ရပြီး ယနေ့မှာ မော်လမြိုင်လေဆိပ်ကနေ တဆင့် ဘားအံမြို့ကို လာရောက်ခဲ့တာပါ။
ဘားအံမြို့ပေါ်မှာရှိတဲ့ ရေဘေးကယ်ဆယ်ရေးစခန်းတွေမှာ ရောက်ရှိခိုလှုံနေတဲ့ ဒေသခံပြည်သူတွေကို နိုင်ငံတော်အတိုင်ပင်ခံပုဂ္ဂိုလ်က သွားရောက်အားပေးစကားပြောကြားပြီး ဌာနဆိုင်ရာက လွှဲပြောင်းလှူဒါန်းတဲ့ အလှူငွေနဲ့ ပစ္စည်းတွေကို လက်ခံခဲ့တာပါ။
ဆက်လက်ပြီး နိုင်ငံတော်အတိုင်ပင်ခံပုဂ္ဂိုလ်က ကယ်ဆယ်ရေးစခန်းတွေမှာ ရောက်ရှိ နေတဲ့ ဒေသခံပြည်သူတွေရဲ့ လိုအပ်ချက်တွေကို မေးမြန်းပြီး ပြည်နယ်ဝန်ကြီးချုပ်နဲ့ သက်ဆိုင်ရာ ဌာနတွေကို ပူးပေါင်းဆောင်ရွက်ပေးဖို့ လမ်းညွန်မှာကြားခဲ့ပါတယ်။
ကယ်ဆယ်ရေးစခန်းကိုရောက်ရှိနေတဲ့ ဘားအံမြို့ အမှတ် ၂ ရပ်ကွက်၊ ဆွမ်းလောင်းဓမ္မာရုံလမ်း၊ မဝင်းန္တာအေးက “ခုလို ဒေါ်အောင်ဆန်းစုကြည်ရောက်ပြီး အားပေးခဲ့တဲ့အတွက် အားရဝမ်းသာမိပြီး အမေ့ကိုယ်တိုင်လာပြီးအားပေးတာ ဝမ်းသာမဆုံး ကျေနပ်မိတယ်”လို့ ပြောပါတယ်။
နိုင်ငံတော်၏အတိုင်ပင်ခံပုဂ္ဂိုလ်ဟာ ဘားအံမြို့ရှိ ရွှေယဉ်မျှော် ရေဘေး ကယ်ဆယ်ရေး စခန်း၊ ဆိုင်ကလုံးရှပ်တာ၊ မိုးလုံလေလုံ အားကစားရုံမှာ ရောက်ရှိနေတဲ့ ဒေသခံပြည်သူတွေနဲ့ တွေ့ဆုံအားပေးခဲ့ပါတယ်။
ရဲမင်းခေါင်
