ခရီးသွားများ လုံခြုံရေး ချင်းတွင်းမြစ် ရေကြောင်းရဲတပ်ဖွဲ့ ဖွဲ့စည်းမည်
Aung Ko Latt
·
July 12, 2018
ချင်းတွင်းမြစ်ကြောင်းအတွင်း ခရီးသွားပြည်သူတွေဘဝ လုံခြုံရေး၊ တရားမဝင် သစ်ဖောင်၊ ဝါးဖောင်၊ ရွှေမျော၊ လက်နက်၊ မူးယစ်ဆေးဝါး သယ်ယူတာတွေကို ထိန်းချုပ်နိုင်ဖို့ ရည်ရွယ်ပြီး ပြည်ထောင်စုရဲ့ ခွင့်ပြုချက်နဲ့ ပထမဆုံးအကြိမ်အဖြစ် ရေကြောင်းရဲတပ်ဖွဲ့ကို ဖွဲ့စည်းဖို့ လုပ်ဆောင်နေပါတယ်။
“အများကြီး အကျိုးရှိပါတယ်။ အဓိကကတော့ သက်ဆိုင်ရာ မြန်မာနိုင်ငံ ရဲတပ်ဖွဲ့တို့၊ သက်ဆိုင်ရာ ထွေအုပ်တို့နဲ့ ပူးပေါင်းပြီးလုပ်မှပဲ ထိရောက်မှာ။ ဒီအတွက် ပထမလိုအပ်ချက် ဖြစ်တဲ့ ထွေအုပ်ကတော့ ရစကလို ရေယာဉ်စစ်ဆေးရေးအဖွဲ့တွေထဲမှာ ပူးပေါင်းပါဝင်လာပြီ။ အခု မြန်မာနိုင်ငံရဲတပ်ဖွဲ့ရဲ့ တပ်ဖွဲ့ခွဲဖြစ်တဲ့ ရေကြောင်းရဲတပ်ဖွဲ့ ရှိလာပြီဆိုရင် ပိုပြီးတော့ ထိထိရောက်ရောက် အောင်အောင်မြင်မြင် ဆောင်ရွက်နိုင်လိမ့်မယ်။ နံပါတ် ၁ အနေနဲ့ ရေယာဉ် တွေ စနစ်တကျပြေးဆွဲနိုင်မယ်။ နောက်တချက်က သွားလာတဲ့ ခရီးသွား လုပ်သားပြည်သူတွေ ဘေးအန္တရာယ်လုံခြုံရေး ကာကွယ်နိုင်မယ်။ နောက်တခါ အရေးကြီးတဲ့ တရားမဝင်မှောင်ခိုသစ်၊ တရားမဝင် မူးယစ်ဆေးကုန်သွယ်မှု၊ တရားမဝင် ရွှေမျောတွေပေါ့ ဒါတွေကို လုပ်ဆောင်နိုင် လိမ့်မယ်လို့ ယုံကြည်ပါတယ်” လို့ စစ်ကိုင်းတိုင်းဒေသကြီး လျှပ်စစ်၊ လမ်းပန်း၊ စက်မှုဝန်ကြီး ဦးသန်းညွန့်ဝင်းက ပြောပါတယ်။
ချင်းတွင်းမြစ်နဲ့ပတ်သက်ပြီး သက်ဆိုင်ရာမြို့နယ်တိုင်းမှာ ရစကအဖွဲ့တွေ ဖွဲ့စည်းထား ရှိပေမယ့် ရေယာဉ်တွေ စနစ်တကျပြေးဆွဲရေးကိုပဲ အဓိကဆောင်ရွက်နေရတာ ဖြစ်လို့ တရားမဝင်သစ်ဖောင်ကိစ္စအပါအဝင် အခြားကိစ္စတွေမှာ လုပ်ဆောင်နိုင်တာ မရှိဘူးလို့ ဆိုပါတယ်။
“အခုကတော့ သင်တန်းတွေပေးနေပြီလို့ကြားတယ်။ ဘယ်အဆင့်ထိ တာဝန်ပေးမယ် ဆိုတာတော့ မသိသေးဘူး။ ၁ လလောက်နေရင်တော့ အကောင်အထည်ဖော်နိုင်တော့မယ့်ပေါ့။ လောလောဆယ်တော့ မြေနေရာတွေ ကြည့်နေတယ်။ ဒါရှိလာရင် မြစ်ကြောင်းအတွင်းက တရားမဝင်ကိစ္စတွေ၊ နောက်တစ်ခါ အိုဗာဝိတ်တင်တဲ့ကိစ္စတွေကို မိုဘိုင်းလှည့်နေမှာ ဖြစ်တဲ့အတွက် ပိုမိုလုပ်ဆောင်လာနိုင်မယ်။ ပြီးတော့ ရေယာဉ်မတော်တဆမှုတွေဖြစ်တဲ့အခါ အလျင်အမြန် ထိထိရောက်ရောက်ကာကွယ်ပေးနိုင်လာမယ်။ တရားဥပဒေစိုးမိုးရေးအတွက် အထောက်အကူပြုမှာပါ” လို့ ကနီမြို့နယ် လွှတ်တော်ကိုယ်စားလှယ် ဦးထွန်းထွန်းဝင်းကလည်း ပြောပါတယ်။
“ရေကြောင်းရဲထားမယ်ဆိုတာ ကြားတော့မကြားသေးဘူး။ ဒါပေမယ့် လုပ်သင့်တာတော့ ကြာပြီ။ စည်းကမ်းမဲ့ လုပ်နေတဲ့ကိစ္စတွေကို ပိုမိုထိန်းချုပ်လာနိုင်မယ်။ သာမန်ရဲတပ်ဖွဲ့ရှိပေမယ့် အခုလို ရေကြောင်းသတ်သတ်မှတ်မှတ်ထားတော့ ပိုမိုထိရောက်တာပေါ့” လို့ မင်းကင်းမြို့နယ် လွှတ်တော်ကိုယ်စားလှယ် ဦးကျော်ဆန်းကလည်း ပြောပါတယ်။
ချင်းတွင်းမြစ်အတွင်းမှာ မှတ်ပုံတင် ပြေးဆွဲနေတဲ့ ရေယာဉ်အသင်း၂၈ သင်းမှာ ရေယာဉ်အစီးရေ ၇ဝဝ နီးပါးရှိပါတယ်။ အခုလို ရေကြောင်းကောင်းတဲ့အချိန်၊ ရေတက်တဲ့ အချိန်တွေမှာ တရားမဝင် သစ်ဖောင်၊ ဝါးဖောင်တွေ သယ်ယူတာတွေလည်း ရှိနေပါတယ်။
ရေကြောင်းရဲတပ်ဖွဲ့ကို ချင်းတွင်းမြစ်ကြောင်းအတွင်း မုံရွာ၊ ကလေးဝ၊ ဟုမ္မလင်း စတဲ့ ဆိပ်ကမ်းမြို့ကြီးတွေနဲ့ ဧရာဝတီမြစ်အတွင်းမှာတော့ ကသာမြို့တို့မှာ ထားရှိသွားမယ်ဖြစ်ပြီး ကျန်တဲ့ ဆိပ်ကမ်းမြို့တွေမှာလည်း ရဲတပ်ဖွဲ့အင်အားအပေါ်မူတည်ပြီး လိုအပ်ရင် လိုအပ်သလို ထားရှိသွားမယ်လို့ စက်မှုဝန်ကြီး ဦးသန်းညွန့်ဝင်းက ပြောပါတယ်။
