အမှန်အတိုင်းထွက်ဆိုခဲ့သည့်ကိစ္စ နောင်တမရဟု ဒုရဲမှူးမိုးရန်နိုင်ပြော
DVB
·
May 9, 2018
တရားရုံးမှာ အမှန်အတိုင်းထွက်ဆိုခဲ့တဲ့ကိစ္စ နောင်တမရတဲ့အကြောင်းနဲ့ ထောင်ဒဏ် ချမှတ်ခံရတာဟာ နောက်ထပ်ပေါ်ပေါက်လာမယ့် ရဲတပ်ဖွဲ့ဝင်တွေရဲ့ အမှန်တရားကို ခြိမ်းခြောက်လိုက်တာဖြစ်တယ်လို့ ဒုရဲမှူးဟောင်း မိုးရန်နိုင်ကပြောပါတယ်။
နိုင်ငံတော်အစိုးရလျှို့ဝှက်ချက်အက်ဥပဒေနဲ့ တရားစွဲဆိုခံထားရတဲ့ ရိုက်တာသတင်း နှစ်ယောက်ကို ဒီကနေ့မနက် ရန်ကုန် မြောက်ပိုင်းခရိုင်တရားရုံးမှာ ၁၇ ကြိမ်မြောက်ရုံး ထုတ်ရာမှာပြောကြားလိုက်တာပါ။
မြောက်ပိုင်းခရိုင်တရားရုံးမှာ ထောင်ဝတ်စုံနဲ့ ရုံးထွက်လာတဲ့ ဒုရဲမှူးဟောင်း ဦးမိုးရန်နိုင်က "ကျနော် ထွက်ဆိုခဲ့တဲ့ကိစ္စ နောင်တမရဘူး။ ကျနော့်ကို ထောင်ချလိုက်တာဟာ နောက်ထပ် ပေါ်ပေါက်လာမယ့် ရဲတပ်ဖွဲ့ဝင်တွေရဲ့ အမှန်တရားကို ခြိမ်းခြောက်လိုက်တာပါပဲ" လို့ သတင်းသမားတွေကို ပြောဆိုခဲ့ပါတယ်။
ဒုရဲမှူးဟောင်းမိုးရန်နိုင်ဟာ ရိုက်တာသတင်းမားတွေကို ရဲမှူးချုပ်တင်ကိုကိုက အမှုဆင် ထောင်ချောက်ဆင်ဖမ်းဆီးခဲ့တာဖြစ်တယ်လို့ တရားရုံးမှာ ထွက်ဆိုခဲ့ပြီးနောက်ပိုင်း ရဲစည်းကမ်း ကျင့်ဝတ် ထိန်းသိမ်းရေးဥပဒေနဲ့ ရဲတရားရုံးကနေ ထောင်ဒဏ်တစ်နှစ်ချမှတ်ခံထားရတာပါ။
ရိုက်တာသတင်းထောက် ကိုဝလုံးနှင့် ကိုကျော်စိုးဦးတို့ကို ဒီကနေ့ ၁၇ ကြိမ်မြောက် ရုံးထုတ်စစ်ဆေးရာတွင် တရားလိုပြသက်သေဖြစ်သူ ဒုရဲမှူးဟောင်း မိုးရန်နိုင်ကိုလည်း ဆက်လက်စစ်ဆေးခဲ့ပါတယ်။
သတင်းထောက် ကိုဝလုံးတို့ကို ထောင်ဖမ်းဖို့ ရဲမှူးချုပ်တင်ကိုကိုက စီစဉ်ခဲ့ရာမှာ မမှန်ပြုလုပ်တဲ့အတွက် မှားယွင်းနိုင်ကြောင်း၊ ဥပဒေနဲ့ မညီကြောင်း သူ့ကိုရဲအချုပ်မှာ စစ်ဆေးခဲ့တဲ့ အရာရှိကို ပြောဆိုခဲ့တယ်လို့လည်း ဒုရဲမှူးဟောင်း မိုးရန်နိုင်က ထွက်ဆိုခဲ့ပါတယ်။
ကိုဝလုံးတို့ကို စားသောက်ဆိုင်ထဲမှာ ၀င်ရောက်ဖမ်းဆီးပြီးနောက် နိုင်ငံတော် လျို့ဝှက် အက်ဥပဒေနဲ့ အမှုဖွင့်ဖို့အတွက် ရဲမှူးချုပ်တင်ကိုကိုက ညွှန်ကြားခဲ့တာဖြစ်ကြောင်းလည်း တရားခွင်မှာ ထွက်ဆိုခဲ့ပါတယ်။
အစိုးရရှေ့နေဘက်ကတော့ ဒုရဲမှူးမိုးရန်နိုင်ကို မယုံကြည်ထိုက်သောသက်သေအဖြစ် ကြေညာပေးဖို့ တရားရုံးမှာ လျှောက်ထားခဲ့ပေမယ့် တရားသူကြီးက အဲဒီလျှောက်ထားချက်ကို ပယ်ချပြီး ဒုတိယအကြိမ် တရားလိုပြသက်သေအဖြစ် အမှုစစ်ဖို့ ရန်ကုန်မြောက်ပိုင်းခရိုင် တရားရုံးက ခေါ်ဆိုခဲ့တာဖြစ်ပါတယ်။