ဧပြီလ (၂၁) ရက်နေ့ မွန်းလွဲပိုင်းအချိန်ခန့်က ကလေးမြို့ အောင်မင်္ဂလာရပ်ကွက် နယ်မြေ (၃) အရှေ့တောင်ဘက် တစ်မိုင်ခွဲခန့်အဝေးက တာဝါတိုင်အနီး လယ်တောတဲမှာ ကြိုးဆွဲချ သေဆုံးခဲ့တဲ့ အမျိုးသားတဦးကို တွေ့ခဲ့တယ်လို့ ကလေးမြို့မရဲစခန်းက ဒုရဲအုပ်ရူပက ပြောပါတယ်။
“သေဆုံးခဲ့တဲ့အချိန်ကိုတော့ အတိအကျ မသိပါဘူး။ ရပ်ကွက်က အကြောင်းကြားလို့ သွားကြည့်တော့ အကာအရံမရှိတဲ့ တဲမှာ လွယ်အိတ်ကြိုးနဲ့ ချိတ်ပြီး သေဆုံးနေတာ တွေ့ရတယ်။ အဲ့ဒီလွယ်အိတ်ထဲမှာ မသေဆုံးခင် ရေးထားတဲ့စာရွက် တွေ့ရတယ်” လို့ ဆိုပါတယ်။
သေဆုံးသူရဲ့ မသေဆုံးခင် ရေးထားခဲ့တယ်လို့ ယူဆရတဲ့ စာရွက်မှာတော့ သူ့ရဲ့ အမျိုးသမီးအား မှာထားခဲ့တဲ့ စာရွက်တစ်ရွက်ကို နှစ်ဖက်ရေးသားထားတဲ့ စာတွေနဲ့အတူ တွေ့ရပြီး သေဆုံးသူမှာ ကလေး သုံးဦးရဲ့ ဖခင်လည်း ဖြစ်တယ်လို့ သိရပါတယ်။
သေဆုံးသူဟာ အောင်မင်္ဂလာရပ်ကွက်နေ အသက် (၃၄) နှစ်အရွယ် ထွန်းလှိုင်ဝင်းဆိုသူ ဖြစ်ပြီး ယာဉ်မောင်းအလုပ်လုပ်ကိုင်နေသူဖြစ်ပါတယ်။
ခုလို သေဆုံးမှုနဲ့ ပတ်သက်ပြီး ကလေးမြို့မရဲစခန်းက ဒုရဲအုပ်ရူပက တရားလိုပြုကာ သေမှုသေခင်း အမှတ်စဉ် (၆/၂၀၁၈) နဲ့ အမှုဖွင့်ထားကာ ဓမ္မတာအတိုင်းသေဆုံးခြင်း ဟုတ်မဟုတ် စစ်ဆေးဆောင်ရွက်နေတယ်လို့ သိရပါတယ်။
မင်းရဲစစ်နိုင်
