ဦးပိုင်ထုတ်မည့် ဆေးဝါး ၆ မျိုးကို အစိုးရ ကန့်ကွက်
DVB
·
April 21, 2018
မြန်မာ့စီးပွားရေးဦးပိုင်က ထုတ်လုပ်မှတ်ပုံတင်မယ့် ဆေးဝါး ၆ မျိုးကို အစိုးရ၊ စက်မှုဝန်ကြီးဌာနက ကန့်ကွက်လိုက်ပါတယ်။
စီဗစ်သောက်ဆေးအပါအ၀င် ဆေး ၆ မျိုးဟာ အင်းစိန်ဘီပီအိုင်စက်ရုံက ထုတ်လုပ်နေပြီး ဈေးကွက်မှာလည်း မှတ်ပုံတင်ထားပြီးဖြစ်လို့ ကန့်ကွက်လိုက်တာ ဖြစ်ပါတယ်။
မြန်မာ့စီးပွားရေးဦးပိုင်လီမိတက်ဟာ ဧပြီ ၁၄ ရက်ထုတ် မြန်မာ့အလင်းသတင်းစာမှာ သူတို့ရဲ့ ပြင်ဦးလွင်ဆေးဝါးစက်ရုံကနေ စီဗစ်ဆေးအပါအ၀င် ဆေးဝါး ၅၁ မျိုးကို တဦးတည်းမူပိုင်ဖြစ်ကြောင်း မှတ်ပုံတင်မှာဖြစ်လို့ ၇ ရက်အတွင်း ကန့်ကွက်လိုသူရှိက ကန့်ကွက်နိုင်တယ်လို့ ကြေညာခဲ့ပါတယ်။
ဒီ ကြေညာချက်နဲ့ပတ်သက်ပြီး စက်မှုဝန်ကြီးဌာန၊ မြန်မာ့ဆေးဝါးလုပ်ငန်းက ဧပြီ ၂၀ ရက်ထုတ် မြန်မာ့အလင်းသတင်းစာမှာ ကြော်ငြာထည့်သွင်းပြီး ပြန်လည်ကန့်ကွက်ခဲ့တာ ဖြစ်ပါတယ်။
မြန်မာ့စီးပွားရေးဦးပိုင်လီမိတက်ဟာ မန္တလေးတိုင်း၊ ပြင်ဦးလွင်မြို့နယ်၊ အနီးစခန်းအနီးရှိ ပြင်ဦးလွင်ဆေးဝါးစက်ရုံကနေ ဆေးဝါး ၅၁ မျိုးထုတ်လုပ်ပြီး ကြေးတိုင်နဲ့မြေစာရင်းဦးစီးဌာနရှိ စာချုပ်စာတမ်းမှတ်ပုံတင်ရုံးမှာ တဦးတည်းမူပိုင်အဖြစ် မှတ်ပုံတင်သုံးစွဲဖို့ ပြင်ဆင်နေတာ ဖြစ်ပါတယ်။