ဘန်ကောက်တွင် မြန်မာသူဌေးသား ၁ ဦး အမှု ၄ ခုဖြင့် တရားစွဲခံရ
DVB
·
April 18, 2018
ထိုင်းနိုင်ငံ၊ ဘန်ကောက်မြို့၊ ထောင်းလော်နယ်မြေထဲမှာ ပြီးခဲ့တဲ့ သင်္ကြန်တွင်းက လူတယောက် သူ့နောက်လိုက်နေလို့ ပြည်သူတွေကို အော်ဟစ်အကူအညီတောင်းခံကာ ထွက်ပြေးနေတဲ့ ယာဉ်ထိန်းရဲတဦးရဲ့ ရုပ်သံလူမှုကွန်ရက်မှာ ပျံ့နှံ့ခဲ့ပါတယ်။
Annie's Yezib အမည်ရှိ ဖေ့စ်ဘွတ်ခ် အကော့င်ပိုင်ရှင်တဦးက “ပြည်သူကို ကြောက်တဲ့ရဲ” ဆိုတဲ့ စတေးတပ် ရေးတင်ထားတဲ့ အချိန် ၁ မိနစ်စွန်းစွန်းရှိ ရုပ်သံဗွီဒီယိုမှာ တီရှပ်အဖြူရောင် ဝတ်ထားသူ လူရွယ်တဦးနဲ့ ထိုင်းယာဉ်ထိန်းရဲတဦးတို့ ရုန်းရင်းဆန်ခတ် လုံးထွေးနေပြီး ရဲက ထွက်ပြေးကာ အနီးနားရှိ လူတွေကို အကူအညီတောင်းနေပုံ၊ နောက်တော့ တက္ကစီတစ်စီးနောက် လိုက်သွားကာ အဆိုပါလူရွယ်ကလည်း တက္ကစီနောက် ပြေးလိုက်နေတဲ့ပုံတွေ မှတ်တမ်းတင် ရိုက်ကူးထားပါတယ်။
အနီးအနားရှိ လူတွေက အကျိုးအကြောင်း မေးမြန်းနေကြပေမယ့် ရဲက ထိတ်လန့်စွာနဲ့ သူ့ကို ခေါ်ပြေးဖို့သာ တွင်တွင်ပြောဆိုပြီး လူရွယ်ကလည်း ဘာတခွန်းမှ ပြန်မပြောတာကြောင့် ဒီဗွီဒီယိုကလစ်ဟာ လူတွေအတွက် ပဟေဠိဖြစ်နေပါတယ်။
ဒီကိစ္စနဲ့ပတ်သက်ပြီး Bright TVသတင်းဌာနက သက်ဆိုင်ရာနယ်မြေရဲစခန်းကို ဆ က်သွယ်မေးမြန်းရာမှာ ရဲစခန်းတာဝန်ရှိသူက အဆိုပါဖြစ်ရပ်မှာ ပြီးခဲ့တဲ့ ဧပြီလ ၁၅ ရက်နေ့ မနက် ၄ နာရီခန့်က ထောင်းလော်နယ်မြေ ဖရလမ်းဆီလမ်းမ ကလွေ့နမ့်ထိုင်းလမ်းဆုံမှာ ဖြစ်ပွား ခဲ့တာလို့ ဆိုပါတယ်။
ဒီမတိုင်ခင် ထွက်ပြေးလွတ်မြောက်လာသူ ရဲယာဉ်ထိန်းရဲဟာ အဲဒီလမ်းပေါ်မှာ တာဝန်အရ ယာဉ်သွားယာဉ်လာတွေ စစ်ဆေးနေကြောင်း၊ တီရှပ်အဖြူနဲ့ လူရွယ်ဟာ ဘီအမ်ဒဗလျူကား မောင်းနှင်လာပြီး ရဲက အယ်လ်ကိုဟောလ် (အရက်) သောက်ထားမှု ပမာဏကို တိုင်းကြည့်တော့ ၁၄၄ မီလီဂရမ်ရှိပြီး သတ်မှတ်ထားတဲ့ ပမာဏထက်များနေလို့ မှတ်တမ်းရေးယူကာ အဆိုပါလူရွယ်ရဲ့ ကားပေါ်တက်ပြီး ထောင်းလော်ရဲစခန်းကို မောင်းနှင်စေခဲ့ပါတယ်။
အဲဒီစစ်ဆေးရေးဂိတ်မှာ ရဲဝန်ထမ်းအင်အား တဦးတည်း ရှိတာကြောင့် ပြစ်မှုကျူးလွန်သူရဲ့ ကားကို အသုံးပြုပြီး ရဲစခန်းခေါ်ခဲ့ရတာလို့ ဆိုပါတယ်။
ဒါပေမယ့် လမ်းခုလတ်မှာ လူရွယ်က ရဲစခန်းကိုမမောင်းဘဲ တခြားလမ်းကြောင်းကို မောင်းသွားလို့ အဆိုပါရဲက ကားပေါ်က ခုန်ဆင်းခဲ့ကြောင်း၊ ရဲက ခုန်ဆင်းသွားတော့ လူရွယ်က သူ့ကားကိုရပ်ပြီး ရဲနောက်လိုက်ကာ ရဲလက်ထဲက မှုခင်းမှတ်တမ်းစာရွက်ကို လုယူဖို့ ကြိုးစားခဲ့ရာက ရုန်းရင်းဆန်ခတ် ဖြစ်သွားတာလို့ ဆိုပါတယ်။
စစ်ဆေးချက်အရ အဆိုပါလူရွယ်မှာ အသက် ၂၀ နှစ်ရွယ် (အချို့သတင်းတွင် ၃၁ နှစ်ဟု ဖော်ပြ) ရှိ Larry Zaw ဆိုသူ မြန်မာနိုင်ငံသားတဦး ဖြစ်ကြောင်း၊ သူဟာ မြန်မာနိုင်ငံက စီးပွားရေးလုပ်ငန်းရှင် လူကုံထံတဦးရဲ့သားဖြစ်ပြီး ထိုင်းနိုင်ငံကို ဗီဇာမှန်ကန်စွာနဲ့ ဝင်ရောက်လာတာလို့ ဆိုပါတယ်။
သူ့ရဲ့အပြုအမူတွေနဲ့ ပတ်သက်ပြီး ရဲစခန်းက သူ့ကို အရက်မူးနေစဉ် ယာဉ်မောင်းမှု၊ တာဝန်ရှိသူမှ ထိန်းချုပ်စဉ် ထွက်ပြေးတိမ်းရှောင်မှု၊ သက်သေအထောက်အထား ဖျောက်ဖျက်မှု၊ သက်သေ အထောက်ထား လုယူမှု စတဲ့ အမှု ၄ ခုနဲ့ တရားစွဲပြီး ရဲစခန်းမှာ လာရောက်ဖြေရှင်းဖို့ အကြောင်းကြားခဲ့ပါတယ်။
အဆိုပါ မြန်မာလူရွယ်ဟာ ဧပြီလ ၁၇ ရက်နေ့မှာတော့ ရဲစခန်းမှာ လာရောက် အဖမ်းခံခဲ့ကြောင်း၊ ဒါပေမယ့် သူ့အပြစ်တွေကိုတော့ ဝန်ခံခြင်းမရှိသေးဘဲ အာမခံငွေ ဘတ် ၁ သိန်းခွဲနဲ့ ပြင်ပကနေ အမှုရင်ဆိုင်မယ်လို့ ဆိုပါတယ်။
မြန်မာလူရွယ်နဲ့အတူ ကားပေါ်လိုက်ပါလာတဲ့ သူ့အပေါင်းအဖော် နှစ်ဦးကိုလည်း ဒီအမှုမှာ ပါဝင်ပတ်သက်ခြင်း ရှိ၊ မရှိ ရဲက ခေါ်ယူစစ်ဆေးနေတယ်လို့ BrightTV သတင်းမှာ ဖော်ပြသွားပါတယ်။
