လယ်ဝေးမြို့နယ်တွင် ဆီတင်ကား ၁ စီးတိမ်းမှောက်မီးလောင်
DVB
·
March 18, 2018
နေပြည်တော်၊ လယ်ဝေးမြို့နယ်မှာ ဆီတင်ကားတစီးတိမ်းမှောက်မီးလောင်ပြီး ယာဉ်မောင်း အပါအဝင် အနီးအနားက အိမ်တွေ မီးလောင်ခဲ့တယ်လို့ ပြည်ထဲရေးက ထုတ်ပြန်ပါတယ်။
မနေ့က ညနေပိုင်းမှာ လယ်ဝေးမြို့နယ်၊ ရန်ကုန်-မန္တလေး ကားလမ်းဟောင်း ဇေယျာသီရိမြို့နယ် သိုက်ချောင်းလမ်းဆုံက ရပ်ကွက်အုပ်ချုပ်ရေးမှူးရုံးရှေ့မှာ ဖြစ်ပွားခဲ့တာပါ။
Moon Sun စက်သုံးဆီရောင်းဝယ်ရေး ကုမ္ပဏီက သက်ပိုင်ထွန်း (ခ)သက်ပိုင် မောင်းနှင်ပြီး ယာဉ်နောက်လိုက် ဇော်မျိုးဦးနဲ့ ထိန်လင်းတို့ လိုက်ပါလာတဲ့ ၂၂ ဘီး ဆီဘောက်ဆာတွဲယာဉ်ဟာ အရှိန်လွန်တိမ်းမှောက်ပြီး မီးလောင်ခဲ့ပါတယ်။
အဲဒီကားမှာ ဆီဂါလံ ၉၀၀၀ ပါလာပြီး မီးလောင်မှုကြောင့် နေအိမ် ၉ လုံးနဲ့ အုပ်ချုပ်ရေးမှူးရုံး ၁ ရုံးလည်း မီးလောင်သွားခဲ့တာပါ။
မီးလောင်နေတုန်းမှာ ယာဉ်နောက်လိုက် ဇော်မျိုးဦးနဲ့ ထိန်လင်းတို့က ခုန်ချထွက်ပြေးခဲ့ပြီး မျက်နှာနဲ့ ခါးတို့မှာ မီးလောင်ဒဏ်ရာတွေ ရခဲ့သလို ယာဉ်မောင်း သက်ပိုင်ထွန်းကတော့ ကားထဲမှာ ကျန်ခဲ့တယ်လို့ သိရပြီး ကားခေါင်းခန်းထဲက လူအရိုးစု ၁ ခုတွေ့ရတယ်လို့ ပြည်ထဲရေးက ထုတ်ပြန်ပါတယ်။
ဇော်မျိုးဦးနဲ့ ထိန်လင်းတို့ဟာ မြို့လှတိုက်နယ်ဆေးရုံမှာ ကုသနေပြီး သေဆုံးသူယာဉ်မောင်း သက်ပိုင်ထွန်းကို သာဝတ္ထိနယ်မြေရဲစခန်းက ပေါ့လျော့မှုကြောင့် လူသေမှု/ သာမန်နာကျင်စေမှု/ မီးပေါ့ဆမှု ရာဇသတ်ကြီးပုဒ်မ ၃၀၄-က/ ၃၃၇/ ၂၈၅ တွေနဲ့ အမှုဖွင့် စစ်ဆေးနေပါတယ်။