ရန်ကုန် ကားတင်သွင်းခွင့်မူဝါဒ ပြည်သူနှင့် လွှတ်တော်ကို ကြိုတင်အသိပေးမည်
DVB
·
February 20, 2018
ရန်ကုန် ကားတင်သွင်းခွင့် မူဝါဒကို တိုင်းအစိုးရက ပြန်လည်သုံးသပ်စိစစ်နေပြီး အသေးစိတ်ကို ပြည်သူနဲ့ တိုင်းလွှတ်တော်ထံ ကြိုတင်အသိပေးမယ်လို့ တိုင်းစီမံကိန်းနှင့် ဘဏ္ဍာရေးဝန်ကြီး ဦးမြင့်သောင်းက ပြောပါတယ်။
ဖေဖော်ဝါရီ ၂၀ ရက် တိုင်းလွှတ်တော်မှာ လသာမြို့နယ်၊ မဲဆန္ဒနယ်အမှတ်(၁) တိုင်းဒေသကြီးလွှတ်တော် ကိုယ်စားလှယ် ဦးဇော်ဝင်းနိုင် မေးမြန်းတဲ့ “လူပုဂ္ဂိုလ် တဦးချင်းစီအလိုက် မော်တော်ယာဉ် တင်သွင်းခွင့်(Free Permit)ကို ရန်ကုန်တိုင်းဒေသကြီးအတွင်း ပြန်လည်စိစစ်ခွင့်ပြုပေးရန် အစီအစဉ် ရှိ၊ မရှိ”မေးခွန်းကို ဝန်ကြီးက ဖြေကြားခဲ့တာ ဖြစ်ပါတယ်။
“၂၀၁၈ ခုနှစ်မှာ ရန်ကုန်တိုင်းဒေသကြီးအတွင်း မော်တော်ယာဉ်တင်သွင်းခွင့် မူဝါဒကို ရန်ကုန်တိုင်းဒေသကြီး အစိုးရအဖွဲ့က ပြန်လည်သုံးသပ်ပြီး စိစစ်ဆောင်ရွက်ဖို့ စီစဉ်ဆောင်ရွက်နေကြောင်း ဆောင်ရွက်မယ့် အစီအစဉ်အသေးစိတ်ကို တိုင်းဒေသကြီး လွှတ်တော်နဲ့ ပြည်သူတို့ထံ အချိန်မီ ကြိုတင်အသိပေး ကြေညာမည်ဖြစ်ပါကြောင်း” ဖြေကြားသွားပါတယ်။
ရန်ကုန်တိုင်းဒေသကြီးအတွင်း မော်တော်ယာဉ် တင်သွင်းမှုတွေအပေါ် အရင်အစိုးရ လက်ထက် ဆောင်ရွက်ခဲ့တဲ့ လူပုဂ္ဂိုလ်တဦးချင်း မော်တော်ယာဉ် လျှောက်ထားမှုတွေ၊ ကုမ္ပဏီတွေက မော်တော်ယာဉ် တင်သွင်းခွင့် လျှောက်ထားမှု၊ နယ်ဝင်လိပ်စာပြောင်း လျှောက်ထားမှုတွေအပေါ် ဆိုင်းငံ့ထားခဲ့ပါတယ်။
တခါ ၂၀၁၅ ဇန်နဝါရီကစပြီး ရန်ကုန်တိုင်း လိပ်စာနဲ့ မော်တော်ယာဉ် တင်သွင်းခွင့်၊ ကုမ္ပဏီတွေက မော်တော်ယာဉ် တင်သွင်းခွင့် လျှောက်ထားမှုတွေ၊ အခြား ပြည်နယ်၊ တိုင်းဒေသကြီးတွေက ရန်ကုန်သို့ လိပ်စာပြောင်း လျှောက်ထားမှုတွေကို ကားပါကင် ထောက်ခံချက် လျှောက်ထားစေခဲ့ပြီး တိုင်းအစိုးရအဖွဲ့ရဲ့ ခွင့်ပြုမိန့်ပါရှိမှ ခွင့်ပြုတဲ့စနစ်ကိုလည်း ကျင့်သုံးခဲ့ပြီး ထိရောက်မှု မရှိတဲ့အတွက် ၂၀၁၆ မတ်လအတွင်း ပါကင်ခွင့်ပြုမိန့် ထုတ်ပေးတာကို ရပ်ဆိုင်းခဲ့ပြန်ပါတယ်။
မြန်မာနိုင်ငံမှာ မော်တော်ယာဉ် တင်သွင်းခွင့်မူဝါဒတွေ နှစ်စဉ် ပြဋ္ဌာန်းထုတ်ပြန်ပြီး ပြည်ပက မော်တော်ယာဉ် တင်သွင်းခွင့်ပြုခဲ့ရာ စီမံချက် စတင်ဆောင်ရွက်တဲ့ ၂၀၁၁ စက်တင်ဘာလကနေ လက်ရှိကာလအထိ မော်တော်ယာဉ်စီးရေ ၈.၈ သိန်းကျော် တင်သွင်းခွင့်ပြုခဲ့ပါတယ်။
ကားအများစုဟာ ရန်ကုန်တိုင်းဒေသကြီးအတွင်း အသုံးပြုနေကြပြီး ရန်ကုန်မြို့မှာ လမ်းပိတ်ဆို့မှုနဲ့ ယာဉ်ကြော ကျပ်တည်းမှုတွေ နေ့စဉ်နှင့်အမျှ ကြုံတွေ့နေကြရပါတယ်။
