ပြုပြင်ပြောင်းလဲမှုအရှိန်မြှင့်လုပ်ဆောင်ရန် သမ္မတတိုက်တွန်း
DVB
·
May 11, 2012
နိုင်ငံတော်သမ္မတ ဦးသိန်းစိန်က မြန်မာနိုင်ငံရဲ့ တိုးတက်ပြောင်းလဲမှု လုပ်ငန်းတွေကို အရှိန်တိုးမြင့် ဆောင်ရွက်ဖို့ အစိုးရအဖွဲ့ဝန်ကြီးတွေ၊ တိုင်းနယ်ပြည်နယ်က အစိုးရအဖွဲ့ ဝန်ကြီးချုပ်တွေကို ခေါ်ယူပြီး ဒီနေ့ မနက်က အထူးအစည်းအဝေးပွဲတခု ကျင်းပခဲ့ပါတယ်။
[caption id="attachment_25298" align="alignleft" width="300" caption="အစည်းအဝေး ပြုလုပ်နေစဉ် (photo-www.president-office.gov.mm)"][/caption]
မြန်မာနိုင်ငံ ဖွံ့ဖြိုးတိုးတက်ရေးအတွက် ပိုမိုထိရောက်တဲ့ ပြောင်းလဲမှုများ လုပ်ဆောင်ဖိ်ု့ သမ္မတ ဦးသိန်းစိန်ကနေ အစိုးရအဖွဲ့ဝင် ပြည်ထောင်စုဝန်ကြီးတွေ၊ ပြည်နယ်နဲ့တိုင်းက အစိုးရအဖွဲ့ဝင် ဝန်ကြီးချုပ်တွေကို ခေါ်ယူဆွေးနွေးခဲ့တာလို့ နိုင်ငံတော်သမ္မတရုံးရဲ့ အင်တာနက် စာမျက်နှာမှာ ဖော်ပြထားပါတယ်။
ဒီနေ့ ပြုလုပ်တဲ့အစည်းအဝေးမှာ သမ္မတ ဦးသိန်းစိန်ကနေ သူ့အစိုးရလက်ထက်မှာ သန့်ရှင်းတဲ့ အစိုးရဖြစ်ပေါ်လာဖို့အတွက် နိုင်ငံရေးဆိုင်ရာ ပြုပြင်ပြောင်းမှု လုပ်ခဲ့တာတွေနဲ့ နိုင်ငံတကာနဲ့ ပူးပေါင်း ဆောင်ရွက်နိုင်ခဲ့တာတွေကို ထောက်ပြ ပြောဆိုခဲ့ပါတယ်။
ဒါ့အပြင် စီးပွားရေး၊ လူမှုရေး၊ ပညာရေး၊ ကျန်းမာရေးနယ်ပယ် အသီးသီးမှာလည်း နိုင်ငံတကာ ငွေကြေးအထောက်ပံ့ကို ရယူပြီး လုပ်ဆောင်ဖို့ကိုလည်း ပြောကြားထားပါတယ်။ သမ္မတရဲ့ အစည်းအဝေးမှာ ပြည်ပရောက်နေတဲ့ မြန်မာတွေအတွက်လည်း မြန်မာနိုင်ငံကို ပြန်လာကြဖို့ ထပ်မံ ဖိတ်ခေါ်လိုက်ပြီးတော့ နိုင်ငံတွင်း အလုပ်အကိုင် အခက်အခဲရှိရင်လည်း အစိုးရကနေ စီစဉ်ဆောင်ရွက်မယ်လို့ အစည်းအဝေးမှာ ပြောကြားပါတယ်။
ဒါပေမယ့် ပြည်ပမှာရောက်နေတဲ့ နိုင်ငံရေးအဖွဲ့အစည်းနဲ့ နေရပ်ရင်း စွန့်ခွာခဲ့ရတဲ့ စစ်ဘေးဒုက္ခသည်တွေနဲ့ ပတ်သက်ပြီးတော့ ပြောကြားတာတော့ မရှိပါဘူး။ မကြာခင်ကမှ ပြည်ထောင်စုအစိုးရနဲ့ အပစ်အခတ်ရပ်စဲရေးလုပ်ထားတဲ့ တိုင်းရင်းသား လက်နက်ကိုင်အဖွဲ့တွေအတွက် စားဝတ်နေရေးနဲ့ အလုပ်အကိုင် အခွင့်အလမ်း ဖန်တီးပေးဖို့ ပြောကြားခဲ့ပါတယ်။
ပြည်တွင်းငြိမ်းချမ်းရေးနဲ့ ပတ်သက်ပြီး ပြောကြားရာမှာတော့ ပစ်ခတ် တိုက်ခိုက်မှုများ လုံးဝရပ်စဲပြီး ထာဝရတည်တံ့ခိုင်မြဲမည့် ငြိမ်းချမ်းရေး ဆွေးနွေးနေတဲ့ တိုင်းရင်းသားလက်နက်ကိုင် အဖွဲ့အစည်းတွေကိုလည်း ဥပဒေနှင့်အညီ တတ်နိုင်သမျှ အားပေးကူညီဖို့နဲ့ စစ်မှန်တဲ့ ထာဝရငြိမ်းချမ်းရေးရဖို့ နိုင်ငံတော် အစိုးရရဲ့ စေတနာကို နားလည်သဘောပေါက်အောင် ဝိုင်းဝန်းကြိုးပမ်း ဆောင်ရွက်ပေးကြဖို့ သမ္မတဦးသိန်းစိန်က အလေးထား ပြောကြားပါတယ်။
နိုင်ငံတော်သမ္မတအနေနဲ့ အုပ်ချုပ်ရေးကိစ္စမှာ အဂတိလိုက်စားမှုနဲ့ လာဘ်ပေးလာဘ်ယူတာတွေကို မလုပ်ဖို့ပြောကြားခဲ့ပြီး အဂတိလိုက်စားမှုအတွက် ဘယ်လို အပြစ်ပေးအရေးယူမယ် ဆိုတာကိုတော့ သမ္မတ ဦးသိန်းစိန်က ထောက်ပြတာ မရှိခဲ့ပါဘူး။
ဒီအစည်းအဝေးမှာ ထူးခြားချက် နောက်တခုကတော့ သမ္မတဦးသိန်းစိန် အနားမှာ ဒု-သမ္မတ သီဟသူရ ဦးတင်အောင်မြင့်ဦးရဲ့ ထိုင်ခုံနေရာ လစ်လပ်ထားတာကို အစည်းအဝေး သတင်းဓာတ်ပုံမှာ မြင်တွေ့ရတာပါ။
သမ္မတရုံးရဲ့ အစည်းအဝေး ပြောဆိုချက်တွေကို ခုရက်ပိုင်းအတွင်း တင်ထားတဲ့ နိုင်ငံတော် သမ္မတရုံးရဲ့ ဝက်ဆိုဒ်မှာ အချိန်နဲ့တပြေးညီ ပထမဦးဆုံး ဖော်ပြပေးတာလည်း ဖြစ်ပါတယ်။