မော်လမြိုင်တွင် မွတ်ဆလင်အမျိုးသား ၁ ဦးထံမှ ဘုရားဆင်းတုတော်များ သိမ်းဆည်းရမိ
DVB
·
February 7, 2018
မွန်ပြည်နယ် မော်လမြိုင်မှာ မွတ်ဆလင်အမျိုးသား ၁ ဦးဆီကနေ ဘုရားဆင်းတုတော်တွေ သိမ်းဆည်းရမိခဲ့လို့ ဖမ်းဆီးအရေးယူထားတယ်လို့ ပြည်ထဲရေးဝန်ကြီးဌာနက သတင်း ထုတ်ပြန်ပါတယ်။
ဖေဖော်ဝါရီ ၅ ရက် ည ၁၀ နာရီလောက်က မော်လမြိုင်မြို့၊ မြေနီကုန်းရပ်ကွက်ရှိ နဝရတ်တည်းခိုခန်းမှာ မွတ်ဆလင် ၁ ဦးဆီမှာ ဗုဒ္ဓဆင်းတုတော်တွေ ယူဆောင်လာပြီး တည်းခိုနေတယ်ဆိုတဲ့ သတင်းအရ မွန်ပြည်နယ် ရဲတပ်ဖွဲ့မှ သွားရောက်စစ်ဆေးရာခဲ့တာ ဖြစ်ပါတယ်။
စစ်ဆေးရာမှာ အခန်းအမှတ် (၁၁၈) မှာ တည်းခိုနေတဲ့ အောင်ကျော်ထွန်း(ခ)အောင်ထွန်း(ခ)မူတူး (၄၅-နှစ်)ဆီက ဉာဏ်တော် ၁ လက်မမှ ၁ ပေခန့်အတွင်းရှိ အင်္ဂတေ၊ သစ်သား၊ ကျောက်စိမ်းနဲ့ ပြုလုပ်ထားတဲ့ ထိုင်တော်မူ ဆင်းတုတော် ၆ ဆူ၊ ဉာဏ်တော် ၄ လက်မခန့်ရှိ ရွှေရောင်အုတ်ခွက် ဆင်းတုတော် ၁ ဆူ၊ ဉာဏ်တော် ၄ လက်မခန့်ရှိ ရှင်ဥပဂုတ္တမထေရ် ရုပ်ပွားတော် ၁ ခု၊ ဉာဏ်တော် ၅ လက်မခန့်ရှိ ရှင်သီဝလိ ရုပ်ပွားတော် ၁ ခု၊ ခြင်္သေ့ရုပ်ပုံ အောက်ခံပလ္လင် ၂ ခု သိမ်းဆည်းရမိခဲ့တယ်လို့ သိရပါတယ်။
တရားခံကို စစ်ဆေးမေးမြန်းချက်အရ မြဝတီမြို့မှာ ပြန်လည်ရောင်းချဖို့ မော်လမြိုင်မြို့ခံတဦးဆီကနေ ဆင်းတုတော်တွေ ဝယ်ယူခဲ့ကြောင်း ထွက်ဆိုခဲ့လို့ အောင်ကျော်ထွန်း(ခ)အောင်ထွန်း (ခ)မူတူး(ဖမ်းမိ)ကို ရာဇသတ်ကြီးပုဒ်မ ၃၈၀/၂၉၅/ကျင့် ၅၄(ခိုးမှု၊ ဘာသာသာသနာ စော်ကားမှု၊ မသင်္ကာမှုတို့နဲ့ အမှုဖွင့် အရေးယူထားတယ်လို့ ပြည်ထဲရေးက ထုတ်ပြန်ထားပါတယ်။
ဓာတ်ပုံ - ပြည်ထဲရေး
