A d v e r t i s e m e n t With Us

ရန်ကုန်-မန္တလေးအမြန်လမ်းမကြီးကို နိုင်ငံတကာချေးငွေဖြင့် အဆင့်မြှင့်တင်မည်

  ရန်ကုန်-မန္တလေးအမြန်လမ်းမကြီးကို အဆင့်မြှင့်တင်ဖို့ နိုင်ငံတကာချေးငွေနဲ့ အထူး ရန်ပုံငွေတွေ ရရှိဖို့ ညှိနှိုင်းနေတယ်လို့ ဆောက်လုပ်ရေးဝန်ကြီးဌာန ဒုဝန်ကြီး ဦးကျော်လင်းက ပြောပါတယ်။ ဒီကနေ့ အမျိုးသားလွှတ်တော်အစည်းအဝေးမှာ ချင်းပြည်နယ်အမတ် ဦးလားလ်မင်းထန် မေးမြန်းတဲ့ ရန်ကုန်-နေပြည်တော်-မန္တလေး အမြန်လမ်းမကြီးကို အထူးဦးစားပေး အနေနဲ့ ၂၀၂၀-၂၁ ဘဏ္ဍာရေး နှစ်မကုန်မီ အပြီးသတ် ကတ္တရာထပ်ပိုးလွှာခင်းပေးဖို့ အစီစဉ်ရှိ မရှိ မေးခွန်းနဲ့ပတ်သက်ပြီး ပြန်လည်ဖြေဆိုတာပါ။ “ရန်ကုန်-မန္တလေးအမြန်လမ်းကြီး အဆင့်မြှင့်တင်ဖို့ ပြည်ထောင်စုရန်ပုံငွေအပြင် သီးသန့် အထူးဦးစားပေး အစီအစဉ်အနေနဲ့ နိုင်ငံတကာချေးငွေနဲ့ အထူးရန်ပုံငွေတွေ ရရှိဖို့ ညှိနှိုင်း ဆောင်ရွက်နေပြီး Public Private Partnership စနစ်နဲ့လည်း ဆောင်ရွက်ဖို့ လျာထားပါတယ်” လို့ ဦးကျော်လင်းကပြောပါတယ်။ ဒါ့အပြင် ရန်ကုန်-မန္တလေးအမြန်လမ်းကြီးရဲ့ မိုင်(၀/၀)မှ (၃၉/၀)ထိ (ရန်ကုန်-ဘောနတ်ကြီး အပိုင်း)မှာ လက်ရှိ ကွန်ကရစ်လမ်းကို ကတ္တရာကွန်ကရစ်ထပ်ပိုးလွှာခင်းဖို့၊ အတွင်းအပြင် လမ်းပုခုံးအကျယ် စုစုပေါင်း ၂ ဒသမ ၅ မီတာကိုလည်း ကတ္တရာကွန်ကရစ်လမ်းခင်းဖို့၊ ဘောနတ်ကြီးမှာ Interchange ၁ ခု ဆောက်လုပ်ဖို့နဲ့ လမ်းတလျှောက် ယာဉ်အန္တရာယ်၊ လမ်း အန္တရာယ်ကင်းရှင်းရေးတွေ လုပ်ဖို့အတွက် ၂၀၁၈ ဘဏ္ဍာနှစ်ကနေ ၂၀၂၀ ဘဏ္ဍာနှစ်အတွင်း အာရှဖွံ့ဖြိုးရေးဘဏ်၊ အာဆီယံအခြေခံအဆောက်အဦရန်ပုံငွေအဖွဲ့ ချေးငွေတွေနဲ့ ဆောင်ရွက်ဖို့ အစိုးရအဖွဲ့ စီးပွားရေးကော်မတီက ခွင့်ပြုချက်ရရှိပြီးဖြစ်လို့ အစိုးရအဖွဲ့အစည်းအဝေးကို ဆက်လက် တင်ပြထားပြီး အတည်ပြုချက်ရရှိရင် ပြည်ထောင်စုလွှတ်တော်ကို ဆက်တင်ပြသွား မယ်လို့ ဆိုပါတယ်။ ရန်ကုန်-မန္တလေးအမြန်လမ်းမကြီးဟာ လမ်းမိုင်အရှည် ၃၆၆ မိုင် ၃ ဖာလုံ၊ အသွား အပြန် ၇၃၂ မိုင် ၆ ဖာလုံရှိပါတယ်။ ၂၀၁၆-၁၇ ဘဏ္ဍာနှစ်အထိ ၂၅ ပေအကျယ် ကတ္တရာကွန်ကရစ်ခင်းတာ ၁၄၉ မိုင် ၅ ဖာလုံ ၄၄၄ ပေ ပြီးစီးပြီလို့ သိရပါတယ်။ “၂၀၁၇-၂၀၁၈ ဘဏ္ဍာနှစ်မှာ ၂၅ ပေအကျယ် ကတ္တရာကွန်ကရစ်ခင်းတာ ၁၃ မိုင် ၇ ဖာလုံ ၄၂၇ ပေ ဆောင်ရွက်မှာဖြစ်ပြီး ၂၀၁၇-၁၈ ဘဏ္ဍာနှစ်ကုန်မှာ ကတ္တရာကွန်ကရစ်ခင်းဖို့ ၅၆၉ မိုင် သုည ဖာလုံ ၄၄၉ ပေ ကျန်ရှိမှာဖြစ်ပါတယ် ” လို့ ဦးကျော်လင်းက ဆိုပါတယ်။ ဆောက်လုပ်ရေးဝန်ကြီးဌာနအနေနဲ့ ၂၀၂၁ ခုနှစ်ကစပြီး တည်ဆောက်ရေးလုပ်ငန်းတွေကို ကိုယ်တိုင်မဆောင် ရွက်တော့ဘဲ ကြီးကြပ်သူအနေနဲ့သာ ရပ်တည်သွားမယ်လို့ ဇန်န၀ါရီ ၂၄ ရက်နေ့ ပြည်ထောင်စုလွှတ်တော်မှာ ပြောကြားထားပါတယ်။

A d v e r t i s e m e n t With Us

More News
Up