မုံးကိုးတွင် ကျေးရွာအုပ်ချုပ်ရေးမှူး အပါအဝင် ၅ ဦး မိုင်းနင်းမိပြီး ဒဏ်ရာရ
နန်းမြနဒီ
·
January 10, 2018
ရှမ်းပြည်မြောက်ပိုင်း မူဆယ်ခရိုင်၊ မုံးကိုးမြို့အနီးမှာ ခရစ်ယာန် သင်းထောက်ဆရာနဲ့ ကျေးရွာအုပ်ချုပ်ရေးမှူး အပါအဝင် ရွာသား ၅ ဦး မိုင်းနင်းမိပြီး အားလုံး ဒဏ်ရာရကာ တယောက် ခြေထောက် ဖြတ်လိုက်ရပါတယ်။
မုံးကိုးမြို့တောင်ဘက် မန်ဂျပ်ရွာဟောင်းဘက်ကို ဇန်နဝါရီ ၈ ရက် မနက်က တောထဲ ထင်းသွားခုတ်ရာမှာ မိုင်းနှစ်လုံး၊ နှစ်ခါ ပေါက်ကွဲမှုနဲ့ ကြုံရတာလို့ တရုတ်ပြည် ယူနန်ပြည်နယ် မန်စီဆေးရုံရောက် ဒဏ်ရာရသူတဦးက ဒီဗွီဘီကို ပြောပါတယ်။
“ အဲဒီနေ့ မုံးကိုးမြို့ကနေ ၁၁ နာရီလောက် ထွက်လာတယ်။ ၁၁ နာရီခွဲလောက်ကျတော့ လမ်းမကြီးကနေ တောလမ်းထဲ ဝင်သွားတာ သိပ်မကြာဘူး။ အဲဒီမှာ ဗြုန်းဒိုင်းဆို ပေါက်ကွဲတဲ့အသံ ကြားပြီး ကျနော်တို့အားလုံး လဲသွားတယ်။ တယောက်၊ နှစ်ယောက် သတိမေ့သွားတယ်။ သင်းထောက်ဆရာ ဦးဇောင်းခေါင်က ပထမထိတဲ့အချိန် သိပ်မပြင်းထန်ဘူး။ ဒါကြောင့် သူက အနောက်ပြန်လာပြီး လဲနေတဲ့သူတွေကို ပြန်ကူတာ။ ခဏနေတော့ နောက်တလုံး ထပ်ပေါက်တယ်။ အဲဒီမှာ ဆရာဒေါင်းခေါင်က ပေါင်မှာ ထိသွားတယ်၊ ကျနော်တို့နဲ့ အနီးဆုံး တရုတ်ပြည် မံစီဆေးရုံမှာ လာကုကြတယ်။ အခု ဆေးရုံမှာ သူ့ပေါင်တဖက် ဖြတ်လိုက်ရပြီ”
ဒဏ်ရာရသူတွေထဲမှာ မန်ဂျပ်ကျေးရွာအုပ်စု အုပ်ချုပ်ရေးမှူး ဦးယိန်းယော်ပါ ပါပြီး သူက ခြေထောက်၊ ပေါင်နဲ့ ဝမ်းဗိုက်ညာဘက်မှာပါ မိုင်းစတွေ ဝင်သွားတယ်လို့ ဆိုပါတယ်။
မုံးကိုး အမှတ် (၇) ရပ်ကွက်စာရေး ဦးဒိုင်ဇေ ဆိုသူမှာလည်း မိုင်းစက ဘယ်ဘက်မျက်လုံးကနေ နောက်စေ့ထိ ပေါက်ထွက် ဒဏ်ရာရသွားတာကြောင့် ဒီနေ့ထိ သတိမရသေးဘဲ စိုးရိမ်ရတဲ့ အခြေအနေရှိနေပြီး ကျန်သူတွေမှာလည်း ခန္ဓာကိုယ်မှာ မိုင်းစဝင်ပြီး တချို့က ခွဲထုတ်လို့ မကုန်သေးဘူးလို့ ဆိုပါတယ်။
သူတို့အားလုံးမှာ အရင်က မန်ဂျပ်ရွာသားတွေ ဖြစ်ကြပြီး လွန်ခဲ့တဲ့နှစ်နှစ်က တိုက်ပွဲဖြစ်တော့ မုံးကိုးဘက်ကို စစ်ပြေးရှောင်လာကာ ရွာဟောင်းမှာ ထင်းပြန်ခုတ်ရာက ခုလို မိုင်းနင်းမိတာ ဖြစ်ပါတယ်။
သူတို့တွေဟာ စစ်ပြေးရှောင်တွေသာ ဖြစ်တာကြောင့် ဆေးဝါးကုသဖို့ ငွေကြေးအခက်အခဲတွေလည်း ရှိနေကြောင်း၊ လောလောဆယ် မံစီရှိ ကချင်အသိုင်းအဝိုင်းက လူနာ လာကြည့်ရင်း တယောက် တရာ၊ နှစ်ရာစီ လာပေးသွားကြပြီး နောက်ထပ် ဆေးဖိုးတွေ လိုအပ်နေတယ်လို့ ဆိုပါတယ်။
မိုင်းထိသူတွေကို ဆေးဖိုးဝါးခ ကူညီလိုပါက တရုတ်ဖုန်းနံပါတ် ၈၆- ၁၈၀၈၈ ၂၀၂၀၈၃ ကို ဆက်သွယ်ကူညီနိုင်ပါတယ်။
မုံးကိုးဒေသဘက်မှာ ၂၀၁၆ ခုနှစ်က မြောက်ပိုင်း တိုင်းရင်းသား လက်နက်ကိုင် မဟာမိတ်အဖွဲ့နဲ့ မြန်မာ့တပ်မတော်တို့ကြား တိုက်ပွဲတွေ အပြင်းအထန်ဖြစ်ပွားခဲ့ပြီး ရွာသားတွေဟာ မုံးကိုးမြို့ပေါ်ကို တိမ်းရှောင်လာကာ တချို့ကလည်း တရုတ်ပြည်ဘက် တိမ်းရှောင်သွားခဲ့ရပါတယ်။
ဓာတ်ပုံ - Helen Mai
