ပဲပုပ် အစားထိုးစိုက်ပျိုးနိုင်ရေး ဆွေးနွေးပွဲ ဘားအံတွင် ကျင်းပ

ပဲတင်ပို့မှုမှာ ကန့်သတ်ခံရတဲ့ ပဲ ၃ မျိုးထဲက မတ်ပဲနဲ့ ပဲစင်းငုံ စိုက်ဧကတွေမှာ ပဲပုပ်ပဲ အစားထိုးစိုက်ပျိုးဖို့အတွက် အလုပ်ရုံဆွေးနွေးပွဲတခု ပြုလုပ်ခဲ့ပါတယ်။ ဘားအံစိုက်ပျိုးရေးဦးစီးဌာနရုံးမှာ စိုက်ပျိုးရေးဦးစီးဌာနနဲ့ ရန်ကုန်မြို့က သီတာလွင် ပျိုးဥယျာဉ်တို့ ပူးပေါင်းစီစဉ်ပြီး နိုဝင်ဘာလ ၉ ရက်နဲ့ ၁၀ ရက် ၂ ရက်ကြာ ဆွေးနွေးပွဲ ကျင်းပနေတာပါ ဒီအတွက် ပဲပုပ်ပဲ စိုက်ပျိုးထုတ်လုပ်မှု ကျွမ်းကျင်တဲ့ ပညာရှင်တွေက သင့်တော်တဲ့ စိုက်ပျိုးမြေတွေကို ရွေးချယ်ထားပြီး ဘားအံမြို့က လှိုင်ကမ္ဘာကျေးရွာ၊ မိဇိုင်းကျေးရွာနဲ့ မင်းဇီးကျေးရွာအုပ်စုတို့ကို ရွေးချယ်ထားပြီး တောင်သူနဲ့ ဦးစီးဌာနက ဝန်ထမ်း အယောက် ၅၀ တက်ရောက်ခဲ့ပါတယ်။ ကရင်ပြည်နယ်မှာ ပဲမျိုးစုံစိုက်ဧက ခြောက်သောင်းကျော်ရှိပြီး ပဲတီစိမ်း၊ ပဲလွန်းဖြူ၊ မတ်ပဲနဲ့ ပဲစင်းငုံးစတဲ့ ပဲတွေကို စိုက်ပျိုးထုတ်လုပ်ပါတယ်။ ပဲပုပ်က ဒေသမရွေး စိုက်ပျိုးထုတ်လုပ်နိုင်တဲ့ ပဲမျိုးဖြစ်ပေမယ့်  ရှမ်းပြည်တောင်ပိုင်းဒေသမှာ အများဆုံးထုတ်လုပ်လျက်ရှိပါတယ်။ ပဲပုပ်ပဲမှာ အာဟာရမြင့်မားစွာပါဝင်ပြီး ပြည်ပဈေးကွက်ရှိတဲ့ သီးနှံတခု ဖြစ်ပါတယ်။ အဲဒီအပြင် မြန်မာပြည်ပဲပုပ် စိုက်ပျိုးထုတ်လုပ်မှုကနေ  ၆၀ ရာခိုင်နှုန်းကို ပဲပြားထုတ်လုပ်နေတယ်လို့ USAID ရဲ့ စစ်တမ်းမှာ ဖော်ပြထားပြီး ပဲပုပ်ဆီ၊ ပဲနို့စတဲ့ တန်ဖိုးမြင့် ထုတ်ကုန် အများဆုံး ထုတ်လုပ်နိုင်တဲ့ ပဲမျိုးဖြစ်ပါတယ်။

More News
Up