A d v e r t i s e m e n t With Us

ရခိုင်ပြည်နယ် အိမ်မြေဈေးကွက်မြင့်တက်မှု၏ နောက်ကွယ်

“ကျနော်တို့ စစ်တွေကိုရောက်တာ နှစ် ၂၀ ကျော်ပါပြီ။ ခုထိ အိမ်ပိုင်မြေပိုင် မရှိသေးပါဘူး။ မြေဝယ်မယ်လို့ စုထားလိုက်၊ မြေဈေးတွေက တက်လိုက်၊ ဝယ်မယ်လို့ စဉ်းစားလိုက်၊ မြေဈေးတွေ ထပ်တက်လိုက်နဲ့ ကျနော်တို့ လက်လှမ်းမမီတဲ့ အရာကို ဖြစ်နေပါတယ်။ အရင် ဆယ်သိန်း၊ ငါးသိန်းနဲ့ ရနိုင်တာတောင် မဝယ်နိုင်ခဲ့တာ အခု ထောင်ချီ၊ သောင်းချီ ဖြစ်သွားတဲ့အခါ ပိုပြီး မဝယ်နိုင်တော့ပါဘူး။ ဒီတသက် အိမ်နဲ့ မြေ ဝယ်ဖို့ဟာ မဖြစ်နိုင်တော့ပါဘူး’’ ဟု စစ်တွေမြို့ ရူပရပ်ကွက်တွင် အိမ်ငှားနေထိုင်သော ဦးလှသာထွန်းမှ ပြောကြားသည်။ ဦးလှသာထွန်းတို့ စစ်တွေကို ရောက်စဉ်တုန်းက အိမ်ခြံမြေတကွက်ကို ပေ ၄၀ ပေ ၆၀ ဆိုလျှင် မြို့ပေါ်တွင် ၅ သိန်းခန့်သာရှိပြီး မြို့စွန်ရပ်ကွက်များဖြစ်သော မင်းကံရပ်ကွက်တို့တွင်ဆိုလျှင် အိမ်ရာမြေတကွက်ကို ၁ သိန်းမှသည် ၃ သိန်း စသည့် ပေါက်ဈေးသာ ရှိခဲ့သည်။ ထိုစဉ်က ငွေကြေးပမာဏသည် များသည်ဆိုသော်လည်း အလွန်တရာမှ ဝေးလွန်းသည်ဟု မထင်ခဲ့ဟု ဦးလှသာထွန်းမှ ဆိုသည်။ သူတို့က စုဆောင်းနေရင်း မြို့စွန်ရပ်ကွက်က မြေဈေးများတောင် သိန်း ၂၀၀၊ သိန်း ၅၀၀ စသည့်ကိန်းဂဏာန်းများ ရှိလာသည့်အခါ သူတို့ဘဝနှင့် လက်လှမ်းမမီသောအရာများ ဖြစ်လာသည်ဟု သူကဆိုသည်။ “မှန်းထားတဲ့ငွေပမာဏ ရလာပြီဆိုရင် မြေဈေးက ကြီးသွားတယ်။ သိန်းဆယ်ဂဏန်းကိုရရင် မြေကွက်က သိန်းရာချီပြီး တက်သွားတယ်။ သောင်းဂဏန်းတုန်းကလည်း သိန်းပြည့်အောင် ကြိုးစားခဲ့တယ်။ သိန်းပြည့်ရင် မြေကွက်ဈေးက ဆယ်သိန်းဂဏန်း ချီသွားတယ်။ ဒီလိုနဲ့ လိုက်လေဝေးလေ ဖြစ်နေတာ ခုချိန်ထိ အိမ်ငှားဘဝကကို မတက်ဘူးဖြစ်နေတာပါ’’ ဟု ပြောဆိုလာသူက စစ်တွေမြို့ ပေါ်ပလုတ်တောင်ရပ်ကွက်နေ အိမ်ငှား ဒေါ်ကျော့စိန်ဦး ဖြစ်သည်။ စစ်တွေမြို့ကို ဝင်လာလိုက်သည့် လမ်းတလျှောက်တွင် စိမ်းလန်းသည့် လယ်မြေများ၊ လယ်ကွင်းပြင်များကို တွေ့လိုက်လျှင် မြေနေရာများမှာ လူနေထူထပ်မှု ရှိလာသည့်တိုင် ရှားပါးသည့် ကုန်ပစ္စည်းဟု ထင်စရာမရှိပေ။ သို့သော် တကယ်တမ်း စုံစမ်းကြည့်လျှင် လူမနေဘဲ ပိုင်ဆိုင်မှုပြုထားသည့် ခြံကွက်တွေက သာမန်ဘဝများကို ခြိမ်းခြောက်လိုက်သလို ရှိနေသည်။ စစ်တွေမြို့စွန်ရပ်ကွက်များဖြစ်သည့် မင်းကံရပ်ကွက်တွင်လည်း အိမ်ရာလပ်များ မရှိတော့။ ကြည့်လိုက်လျှင် ခြံကွက်က လပ်လပ်နေသည့် လူမရှိသည့်ခြံကွက်၊ သို့သော် သာမန်လူများ မတို့မထိနိုင်သည့် ဈေးနှုန်းများဖြင့် တန်ဖိုးမြင့်အိမ်ရာမြေ ဖြစ်နေသည်။ လူဦးရေထူထပ်လာမှုသည် မြေဈေးကွက် ဈေးတက်ခြင်းနှင့် တိုက်ရိုက်အချိုးကျသော်လည်း ရခိုင်ပြည်တွင်တော့ ယင်းသီအိုရီနှင့် ပြောင်းပြန်ဖြစ်နေသည်။ လူဦးရေ ၃ ဒသမ ၂ သန်းသာရှိသည့် ရခိုင်ပြည်နယ်တွင် နေ့စဉ်နှင့်အမျှ လူဦးရေ ၃၀၀ ခန့် ပြည်ပကို ထွက်ခွာသွားနေကြသည်မှာ ဆယ်စုနှစ်တခုနီးပါး ကြာခဲ့ပြီဖြစ်သည်။ လူငယ်အရွယ်ကောင်းများက ပြည်ပကိုထွက်ခွာခြင်း၊ ကျန်ရစ်ခဲ့သော လူလတ်ပိုင်းများကလည်း စက်ရုံ၊ အလုပ်ရုံ ရှားပါးသည့်အတွက် မိသားစုအလိုက် ရန်ကုန်၊ ဖားကန့်၊ ထိုင်း၊ မလေး စသည့်နေရာများ၊ နိုင်ငံများသို့ မိသားစုလိုက် ရွှေ့ပြောင်းသူများကလည်း များလာသည်။ ဘူးသီးတောင်၊ ရသေ့တောင်၊ မောင်တောဒေသတွင်လည်း တိုင်းရင်းသား ရခိုင်လူမျိုးများမှာ လူနည်းစုသာ ဖြစ်နေသည်။ သည်လိုအခြေအနေများတွင် လူနေသိပ်သည်းမှု ကျဲပါးပြီး ကွက်လပ်ဖြစ်သည့် မြေများက ပိုလာသည်။ သို့သော် မြေဈေးက လူမနေသည့်အတွက် ကျသွားသည်ဟူ၍ မရှိဘဲ ဈေးက ခေါင်ခိုက်နေသည်။ အကြောင်းမှာ ယင်းမြေများကို လူတချို့က မိမိတို့၏ ငွေမည်းများကို ငွေဖြူဖြစ်အောင် လျှော်ဖွပ်ရန်အတွက် ရင်းနှီးမြှုပ်နှံကြခြင်းဖြစ်သည်ဟု အိမ်ရာမြေ ဈေးတက်သည့်ကိစ္စကို စိတ်ဝင်စားသူများမှ သုံးသပ်သည်။ တဖက်တွင်လည်း အစိုးရစီမံကိန်းများ၏ မက်လုံးများကြောင့် အိမ်ရာမြေဈေးကွက်များ၏ တန်ဖိုးများ မြင့်တက်လာသည်။ တချို့စက်မှုဇုန် အနီးတဝိုက်တွင်ရှိသည့် မြေနေရာများကို အစိုးရအသိုင်းအဝိုင်းမှ ပုဂ္ဂိုလ်များက ဈေးသတ်မှတ်ကာဝယ်ခြင်း၊ အကွက်ရိုက် ရောင်းချခြင်းများကို ပြုလုပ်ကြသည်။ လက်ရှိ ရခိုင်ပြည်နယ် အစိုးရအဖွဲ့ဝင်များ လုပ်ဆောင်သည့် ကက်ဘိနက်များတွင်လည်း မြေဈေးထိန်းညှိရန်အတွက် လုပ်ဆောင်ကြသည်ကို မတွေ့ရသေးဟု မြောက်ဦးမြို့နယ် ပြည်သူ့လွှတ်တော်ကိုယ်စားလှယ်တဦးဖြစ်သူ ဦးဦးလှစောမှ သုံးသပ်ပြောကြားသည်။ “မြောက်ဦးမှာဖြစ်တဲ့ ပြဿနာတွေဆိုရင် သက်ဆိုင်ရာအစိုးရကိုယ်တိုင်က ဒီအထဲမှာ ဝင်ကစားဖို့အတွက် ဘာစီမံကိန်းချမယ်၊ ဘာမြို့သစ်လုပ်မယ် ဘာညာဆိုပြီး လုပ်လိုက်တော့ ငွေနည်းနည်းရှိတဲ့သူတွေကလည်း ဝင်တယ်။ အဲဒီတုန်းကတော့ မြောက်ဦးမှာ မူးယစ်ဆေးဝါးတွေ ဘာတွေ မပေါ်သေးဘူး။ ဒါမျိုးတွေလည်း ရှိတယ်။ မူးယစ်ဆေးဝါးလုပ်ငန်းတွေကြောင့် ပိုက်ဆံရလာတဲ့သူတွေ အနေနဲ့လည်း မြေကို အဆမတန်ဈေးပေးပြီး ဝယ်ယူကြတာမျိုးရှိသလို အစိုးရစီမံခန့်ခွဲမှု အားနည်းတာကြောင့်လည်း ပါပါတယ်။ အစိုးရစီမံခန့်ခွဲမှု ညံ့ဖျင်းတယ်ဆိုတာက အစိုးရကက်ဘိနက်မှာ ကိုယ်တိုင်က ဒေသဆိုင်ရာဖွံ့ဖြိုးဖို့ မြို့ပြစီမံကိန်းတွေဆောက်ပြီး အများပြည်သူအတွက် အဆင်ပြေအောင် လုပ်ဆောင်ပေးမယ်ဆိုတဲ့ အိုင်ဒီယာမရှိဘဲ မြေကွက်တွေချမယ်၊ မြို့သစ်တွေချမယ်၊ ဒီလိုချလိုက်ရင် ငါတို့အတွက် ဘယ်လောက်ပိုက်ဆံရမလဲ၊ ဘယ်ခွင်က ဘယ်လိုရမလဲဆိုတဲ့ လုပ်နေကြသူတွေကြောင့်လည်း ပါပါတယ်’’ ဟု ၎င်း၏အမြင်ကို ပြောသည်။ မူးယစ်ဆေးဝါးလုပ်ငန်းနှင့် ငွေကြေးများစွာ ပိုင်ဆိုင်ထားသူများမှာလည်း ငွေမည်းကို ငွေဖြူလုပ်ရန်အတွက် မြေကွက်များကို ဈေးအဆမတန်ပေး၍ ဝယ်ယူခြင်းရှိလာသလို မြေဆိုသည်မှာ အလွန်တရာမှ တန်ဖိုးရှိသည့်ပစ္စည်းဖြစ်သည် ဆိုသည်ကို စစ်အုပ်ချုပ်ရေး လက်ထက်ကတည်းက သိမြင်လာကြသည့်အတွက် မြေဈေးကွက်ကို ကိုင်ပြီး လုပ်ကိုင်လာကြသူများလည်း ရှိသည်။ ဘူးသီးတောင်ဒေသခံတဦးဖြစ်သူ ဦးအောင်လင်းက “အရင်သုံးလေးနှစ်ကဆိုရင် စားဝတ်နေရေးအတွက်တောင် မနည်းရုန်းကန်နေရတာပါ။ အခုတော့ သိန်းကို သောင်းချီပြီး ချမ်းသာသွားကြပါပြီ။ နေ့ချင်းညချင်း အိမ်ခြံမြေတွေ တကွက်ပြီးတကွက် ပိုင်တယ်၊ တိုက်ကြီးတွေ ဆောက်ကြတယ်၊ စစ်တွေမှာရော ရန်ကုန်မှာရော၊ ချမ်းသာတာဟာ မုဒိတာပွားစရာ ဖြစ်ပေမယ့် သူတို့လုပ်တဲ့ဆေးဝါးတွေက ပြည်ထဲမှာပါ ပျံ့နှံ့နေတော့ လူငယ်တွေလက်ထဲ ရောက်ကုန်ပြီး အကုန်ဘဝပျက်ကုန်တာပေါ့’’ ဟု ပြောကြားသည်။ ဒေသခံ အထက်တန်းရှေ့နေတဦးဖြစ်သူ ဦးငြိမ်းချမ်းကတော့ မြေဈေးတွေတက်တာဟာ ပိုက်ဆံချမ်းသာသူတွေရဲ့ မြေကစားမှုကြောင့်ဖြစ်တယ်လို့ ဆိုပါတယ်။ “အဓိက တချို့မြို့တွေမှာဆိုရင် မြို့ပေါ်မှာ မြေဈေးတွေတက်လာတယ်၊ ဒါဟာ စီးပွားရေးဖွံ့ဖြိုးလာလို့လား၊ လူလတ်တန်းစားဖြစ်တဲ့ စီးပွားရေးလုပ်ကိုင်တဲ့သူတွေ၊ ဝန်ထမ်းတွေနှင့် အောက်ခြေလူတန်းစားအတွက် စီးပွားရေးတိုးတက်စရာတွေ သိပ်မတွေ့ရဘူး။ ဘယ်လိုလူမျိုးတွေက ဝယ်လဲဆိုတော့ အလွန်အကျွံ ပိုက်ဆံချမ်းသာတဲ့သူတွေက ဝယ်ယူကြတာကို တွေ့ရပါတယ်။ အလွန်အကျွံ ပိုက်ဆံချမ်းသာတယ် ဆိုတာမှာလည်း သမားရိုးကျ စီးပွားရေးလုပ်တဲ့လူတွေ ရှိတယ်၊ နောက်ပြီးရင် ဗြုန်းခနဲ ဒိုင်းခနဲနဲ့ ချမ်းသာလာတဲ့သူတွေ ရှိတယ်။ ကျေန်ာတို့မမြင်နိုင်တဲ့ ပိုက်ဆံတွေပေါ့၊ သူတို့က လိုက်ပြီးဝယ်ကြတယ်။ ပြီးရင် အချင်းချင်း မြေဈေးကစားကြတယ်။ ဒီလိုကစားတာကြောင့် ဈေးတွေမြင့်တက်လာတယ်’’ ဟု ပြောကြားသည်။ စစ်တွေမြို့ပေါ်တွင် သာမန်ရပ်ကွက်တခုမှာ မြေနှင့်အိမ် ဝယ်မည်ဆိုသော စိတ်ကူးမှာ အိပ်မက်တခုလို ဖြစ်သွားသည်။ လခစားဝန်ထမ်းများ၊ ဝင်ငွေ တလမှာ သုံးလေးငါးသိန်းရှိနေသော သူများအတွက်တောင် လွယ်ကူသည့်ကိစ္စ မဟုတ်တော့ပေ။ ဦးစီးအရာရှိတယောက်ဆိုလျှင် တလမှာ နှစ်သိန်းကျော်၊ ညွှန်ကြားရေးမှူး တယောက်ဆိုလျှင် ၅ သိန်း ၆သိန်းဝန်းကျင်၊ အိုင်အန်ဂျီအို၊ အန်ဂျီအို အဖွဲ့အစည်းများတွင် ၄ သိန်း ၅ သိန်းအထက်ရရှိသူများ ရှိသော်လည်း တနှစ်မှသည် လေးငါးခြောက်နှစ်ထိ စုဆောင်းသော်လည်း မြေတကွက်ဝယ်မည့်အရေးမှာ မလွယ်ကူကြောင်း၊ စုဆောင်းနေရင်း မြေဈေးကွက်များက မြင့်တက်သွားသည်ဟု သိရသည်။ ၂၀၁၂ ခုနှစ်တွင် စစ်တွေမြို့ မင်းကံရပ်ကွက်ရှိ မြေကွက်များမှာ သိန်း ၄၀-၇၀ နှင့် ရနိုင်ခဲ့သော်လည်း ယခုအချိန်တွင် သိန်း ၂၀၀- ၅၀၀ ခန့် ရှိလာပြီဖြစ်သည်။ မကြာသေးမီက ဖြစ်ပွားခဲ့သော ဆတ်ရိုးကျမြေယာပြဿနာတွင်လည်း သာမန် ဝန်ထမ်းအိမ်ရာများအတွက် တည်ထောင်ပေးခြင်းမျိုး မဟုတ်ဘဲ အစိုးရအရာရှိကြီးတချို့က စီးပွားရေးလုပ်ငန်းရှင်များနှင့် ပူးပေါင်းကာ အကွက်ရိုက်ရောင်းစားရန် ကြံဆောင်ခဲ့သည့်အတွက်သာ ဖြစ်သည်။ အဆိုပါ ဆတ်ရိုးကျမြေယာပြဿနာတွင် အစိုးရအရာရှိကြီးများ အပါအဝင် ရခိုင်အမျိုးသားပါတီမှ ခေါင်းဆောင်တချို့နှင့် ရခိုင်ပြည်နယ်လွှတ်တော်ဥက္ကဋ္ဌတို့လည်း ပါဝင်ခဲ့သည်။ လယ်သမားများဘက်မှ သုံးကြိမ်တိုင်အောင်ထိ ဆန္ဒပြခဲ့သည့်နောက်ပိုင်းတွင် ပြည်နယ်လွှတ်တော်ဥက္ကဋ္ဌ ဦးစံကျော်လှမှ ၎င်းပိုင်မြေအား ရခိုင်ပြည်နယ်အစိုးရထံ လွှဲပြောင်းပေးခဲ့သည်ကို တွေ့ရသည်ဟု ဦးငြိမ်းချမ်းမှ ဆိုသည်။ အဆိုပါမြေကွက်များကို သိမ်းဆည်းထားသူများထဲတွင် ဥပဒေအရာရှိကြီးများ၊ တရားရေးအရာရှိကြီးများနှင့် စီးပွားရေးလုပ်ငန်းရှင်များ ပါဝင်နေသည်ဟု သိရသည်။ ရခိုင်ပြည်၏ လက်ရှိစီးပွားရေး အခြေအနေမှာ စက်ရုံအလုပ်ရုံများ ရှားပါးခြင်းကြောင့် လူတန်းစားမျိုးစုံ အလုပ်အကိုင်ရရှိမှု အခွင့်အလမ်းများလည်း နည်းပါးနေသည်။ ၂၀၁၂ မှ အစပြုသော ဒေသမတည်ငြိမ်မှုများမှာလည်း ယခုထိ နေသားမကျသေးပေ။ ယင်းအခြေအနေများတွင် နေရပ်စွန့်ခွာသူများ တနေ့တခြား ပိုများလာသလို မူးယစ်ဆေးဝါး လုပ်ကိုင်သူများမှာလည်း တနေ့တခြား ပိုပိုပြီးများလာသည်။ နိုင်ငံရပ်ခြားကို သွားရောက်လုပ်ကိုင်သူများနည်းတူ တိုင်းပြည်ထဲတွင်နေရင်း တဟုန်ထိုး ချမ်းသာလိုသူများကလည်း ဖြတ်လမ်းနည်းနှင့် စီးပွားရေးကို ရှာလာကြသည်ဟု လေ့လာသူများက ဆိုသည်။ မူးယစ်ဆေးများနှင့် ဝင်ငွေအမြောက်အမြား ရှိသူများမှာ ၎င်းတို့၏ အမည်နာမများနှင့် မြေကွက်များ ဝယ်ယူမှုများ ရှိသည့်နည်းတူ နီးစပ်ရာမိသားစု၊ မိတ်ဆွေများ၏ နာမည်များနှင့် ပထမဝယ်ယူပြီးသူတို့မှ တဆင့် ပြန်ဝယ်ခြင်းများကိုလည်း ပြုလုပ်ကြသည်ဟု သိရသည်။ တဖက်တွင်လည်း မူးယစ်ဆေးဝါး ရောင်းဝယ်ဖောက်ကားမှုများနှင့် မြေယာများကို ဈေးမြင့်ပေးမှုများမှာ ဆက်စပ်နေသည်ဟု သုံးသပ်စရာဖြစ်သည်။ WY ဟုခေါ်သော ဆေးပြားများမှာ ဝဒေသမှ ထုတ်လုပ်သည်ဟု သိရပြီး ရခိုင်ပြည်မှတဆင့် ဘင်္ဂလားဒေ့ခ်ျဘက်ကို ပို့ဆောင်ပေးပြီး ထိုမှတဆင့် အာရပ်နိုင်ငံများဘက်သို့လည်း တင်ပို့သွားသည်ဟု သိရသည်။ သို့သော် အဆင့်ဆင့် ဖြတ်ကျော်လာနေသည့် လမ်းကြောင်းများကို လမ်းခုလတ်တွင် ဖြတ်တောက်နိုင်မှု အလွန်တရာမှ အားနည်းသည်ကို တွေ့ရသည်။ ရခိုင်ပြည်နယ်မြေအတွင်း ၂၀၁၇ ခုနှစ် ဇန်နဝါရီလမှ စက်တင်ဘာလအထိ  ဖမ်းဆီးရမိသော မူးယစ်ဆေးဝါးများစာရင်းကို ကြည့်လိုက်လျှင် WY စာရင်းက ပိုများနေသည်ကို တွေ့ရသည်။ စုစုပေါင်း အမှုပေါင်း ၆၆ မှု၊ WY ဆေးပြား ၅၉၁၉၁၉၅ ပြား၊ စုစုပေါင်း ကာလတန်ဖိုး သိန်းပေါင်း ၁၇၇၅၇၅၈၅၀၀၀ ကျပ်တို့ဖြစ်သည်။ ယင်းအရာများကိုကြည့်ခြင်းမှာ WY ၏ ခရီးလမ်းကြောင်းသည် ဝဒေသမှ စီးဆင်းလာပြီး ရခိုင်ဒေသထိ တိုးဝင်လာပုံကို တွေးဆကြည့်နိုင်သည်။ အထက်ပါ အချက်အလက်များကို ကြည့်ခြင်းဖြင့် နေရာအနှံ့ စိမ့်ဝင်ပျံ့နှံ့မှုများကို တွေ့ရှိလာရသည်ကို သိနိုင်သည်။ အလုပ်အကိုင် အခွင့်အလမ်း ရှားပါးမှု၊ လူတန်းစေ့နေထိုင်လိုမှု၊ တရားဥပဒေကို မသိနားမလည်မှုတို့ကြောင့် လုပ်ကိုင်လာကြသူများ ရှိသကဲ့သို့ ရလေလိုလေ အိုတစ္ဆေဘဝဖြင့် မြေများစွာကို ပိုင်ပြီးရင်းပိုင်ဆိုင်ဖို့ ယင်းလုပ်ငန်းကို မစွန့်လွှတ်ဘဲ နောက်ကွယ်က အကောင်ကြီးကြီးများလည်း ရှိနေသည်။ ကျောက်တော်မြို့နယ် ပြည်သူ့လွှတ်တော် ကိုယ်စားလှယ်တဦးဖြစ်သူ ဦးဦးထွန်းဝင်းက “ကျနော်တို့ ကျောက်တော်မြို့မှာဆိုရင်လည်း ခြံဈေးကွက်တွေက ဒီလေးငါးနှစ်အတွင်းမှာကို အံ့မခန်းလောက်အောင်အထိကို ခြံဈေးကွက်တွေ တက်နေတာကို မြင်ရပါတယ်။ ပြည်တွင်းမှာက အလုပ်အကိုင် အခွင့်အလမ်းတွေက နည်းပါတယ်။ အဲလိုနည်းပြီး ဘာကြောင့် အိမ်ခြံဈေးကွက်တွေက ဘာကြောင့်တက်နေလဲဆိုရင် ကျေန်ာတို့စဉ်းစားရင် အချက် ၂ ချက်ရှိပါတယ်။ တချက်က ငွေမည်းတလိုင်းပေါ့၊ နောက်တချက်က နောက်ဖြစ်လာမည့် အနေအထားတွေကိုကြည့်ပြီး စီးပွားရေးသမားတွေက ဝင်လာတာ ဖြစ်ကောင်းဖြစ်နိုင်ပါတယ်။ ကျနေ်ာတို့ ကျောက်တော်မြို့မှာဆိုရင် ကြားရတာက ဒေသခံတွေမဟုတ်ဘဲ နောက်ဖြစ်လာမယ့် အနေအထားတွေကိုကြည့်ပြီး လာဝယ်ကြတာတွေရှိတယ်လို့ သိရပါတယ်။’’ ဟု ပြောကြားသည်။ အဖမ်းအဆီးများ ရှိနေသော်လည်း မူးယစ်ဈေးကွက်က ပန်းပန်လျှက်ရှိနေဆဲသာ ဖြစ်သည်။ ထို့အတူ အိမ်ခြံမြေဈေးကွက်များကလည်း သာမန်လူတို့ အိပ်မက်များနှင့် ဝေးနေဆဲပဲဖြစ်သည်။ ကျော်လင်း(ရောင်စုံ)

A d v e r t i s e m e n t With Us

More News
Up