ထိုင်းတောင်ပိုင်းခရိုင် ၁၃ ခုတွင် မိုးသက်လေပြင်း ကျရောက်နိုင်ကြောင်း သတိပေး

ထိုင်းနိုင်ငံ တောင်ပိုင်းခရိုင် ၁၃ ခုမှာ နိုဝင်ဘာ ၁ ရက်နေ့မှ ၃ ရက်နေ့အတွင်း မိုးသည်းထန်နိုင်ပြီး လေပြင်းတွေပါ တိုက်ခတ်နိုင်ခြေရှိတယ်လို့ မိုးလေဝသဦးစီးဌာနမှ သတိပေးချက် ထုတ်ပြန်ထားပါတယ်။ နိုဝင်ဘာလ ၁ ရက်နေ့ မနက် ၁၀ နာရီအချိန် တိုင်းထွာချက်တွေအရ ဆောင်ခလာခရိုင်ရဲ့ အရှေ့ဘက် ၇၅၀ ကီလိုမီတာအကွာရှိ တောင်တရုတ်ပင်လယ်ပြင်မှာ လေဖိအား နည်းရပ်ဝန်းတခု ဖြစ်ပေါ်နေပြီး လေတိုက်နှုန်းဟာ ၁ နာရီကို ၅၅ ကီလိုမီတာထိ ရှိနေတယ်လို့ ဆိုပါတယ်။ အပူပိုင်းမုန်တိုင်းဟာ အနောက်ဘက်ကို တဖြည်းဖြည်း ရွေ့လျားနေပြီး ဒီကနေ့ညပိုင်းမှာ အင်ဒိုချိုင်းနားကို ဖြတ်ကျော်ကာ ထိုင်းပင်လယ်ကွေ့ဆီ ဦးတည်ရွေ့လျားလာနိုင်တယ်လို့ ထုတ်ပြန်ထားတာပါ။ နောက်ဆက်တွဲ အကျိုးသက်ရောက်မှုတွေအဖြစ် တောင်ပိုင်းခရိုင်ဒေသတွေမှာ မိုးသည်းသည်းထန်ထန် ရွာသွန်းပြီး ရေကြီးရေလျှံမှုတွေ ဖြစ်ပေါ်လာနိုင်တာမို့ ဒေသခံတွေကို ကြိုတင်ပြင်ဆင်မှုတွေ လုပ်နိုင်ဖို့ သတိပေးထားပါတယ်။ ဘေးအန္တရာယ်ကျရောက်နိုင်တဲ့ ဒေသတွေအဖြစ် နိုဝင်ဘာ ၁ ရက်နေ့မှာ နခွန်ဆီသမာရတ်၊ ဖက်သလန်၊ ဆောင်ခလာ၊ ပတ်ဌာနီ၊ ယာလနဲ့ နရာသီဝပ်ခရိုင်တွေလို့ ဖော်ပြထားပြီး ၂ ရက်နေ့နဲ့ ၃ ရက်နေ့တွေမှာတော့ ပရာချူရက်ခီရိခန်၊ ချန်ဖွန်၊ ဆူရတ်သနီ၊ နခွန်ဆီသမာရတ်၊ ဖက်သလန်၊ ဆောင်ခလာ၊ ရနောင်း၊ ဖန်င၊ ဖူးခက်နဲ့ ကရာဘိခရိုင်တွေ ဖြစ်တယ်လို့ ဖော်ပြထားတာ ဖြစ်ပါတယ်။ ထိုင်းပင်လယ်ကွေ့နဲ့ အန်ဒမန်ပင်လယ်ပြင်မှာ လှိုင်းအမြင့်ဟာ ၂ မီတာကနေ ၃ မီတာထိ ရှိနိုင်တယ်လို့ ဆိုပါတယ်။ လှေတွေ၊ သင်္ဘောတွေနဲ့ ရေယာဉ်တွေကိုလည်း သတိပေးထားပြီး ထိုင်းနိုင်ငံ အရှေ့ဘက်ကမ်းရိုးတန်းတလျှောက် တောင်ပိုင်းခရိုင်ဒေသတွင်းမှ ဒေသခံတွေကိုလည်း ရာသီဥတုနဲ့ သဘာဝဘေးအန္တရာယ်ဆိုင်ရာ သတိပေးချက်တွေကို စဉ်ဆက်မပြတ် နားထောင်ပြီး သတိနဲ့ နေထိုင်ကြဖို့ ထုတ်ပြန်ထားတာ ဖြစ်ပါတယ်။

More News
Up