အဂတိလိုက်စားမှုဖြင့် တရားစွဲဆိုခံရသူများကို ရုံးထုတ်စစ်ဆေး
DVB
·
October 17, 2017
၂၀၁၃ ခုနှစ် အဂတိလိုက်စားမှုတိုက်ဖျက်ရေး ဥပဒေပုဒ်မ ၅၆/၆၃ တရားဆွဲဆိုထားတဲ့ ကရင်ပြည်နယ်အစိုးရအဖွဲ့ အတွင်းရေးမှူး ဦးပြုံးချိုပါ ၅ ဦးကို အောက်တိုဘာ ၁၆ရက်နေ့က ရန်ကုန်တိုင်းဒေသကြီး တိုင်းတရားလွှတ်တော်မှာ ရုံးတင်စစ်ဆေးခဲ့ပါတယ်။
ဒီနေ့တရားခွင်မှာ အမှုရဲ့တရားလိုဖြစ်တဲ့ အဂတိလိုက်စားမှု တိုက်ဖျက်ရေးကော်မရှင်ရဲ့ ညွန်ကြားရေးမှူး ဦးစိန်တင်ကို စစ်ဦးပြုံးချိုရဲ့ရှေ့နေက ပြန်လှန်မေးခွန်းတွေ စစ်မေးခဲ့တာပါ။
ဒီမေးမြန်းစစ်ဆေးမှုတွေမှာ FMI က မြေကွက်ပိုင်ဆိုင်မှုတွေ ရောင်းချတာတွေနဲ့ ပတ်သက်ပြီး မေးမြန်းခဲ့တယ်လို့ စွပ်စွဲခံရသူတွေရဲ့ အကျိုးဆောင် တရားလွှတ်တော်ရှေ့နေတဦးက ဆိုပါတယ်။
“မြေကွက်အရောင်း အဝယ်စာချုပ်ကို ဦးပြုံးချိုရဲ့ ရုံးခန်းထဲမှာ စာချုပ်ချုပ်ဆိုတာတွေ၊ ကျပ်သိန်း ၆ ထောင် ပေးဆောင်ခဲ့တာတွေကို တရားလိုရဲ့အလို အလျှောက်ထွက်ဆိုချက်မှာ ထွက်ဆိုခဲ့ပေမယ့် လက်ရှိအချိန်ထိ တရားရုံးကို သက်သေအထောက်အထားတွေ တင်ပြထားခြင်း မရှိသေးဘူး” လို့ တရားလွှတ်တော်ရှေ့နေက ဆိုပါတယ်။
အရင်ပြည်ထဲရေးဝန်ကြီးဌာန ရုံးအဖွဲ့မှူးဖြစ်သူ လက်ရှိ ကရင်ပြည်နယ် စိုးရအဖွဲ့ အတွင်းရေးမှူးတာဝန် ထမ်းဆောင်နေသူ ဦးပြုံးချိုအပါအ၀င် ပြည်ထဲရေးဝန်ကြီးဌာနမှ အရာရှိ ၅ ဦးကို ရန်ကုန်မှာရှိတဲ့ မြေကွက်တကွက်နဲ့ပတ်သက်ပြီး သိန်းထောင်နဲ့ချီ အဂတိလိုက်စားမှုကြောင့် အဂတိလိုက်စားမှု တိုက်ဖျက်ရေးကော်မရှင်က ဖမ်းဆီးစစ်ဆေးအရေးယူခဲ့တာပါ။