ချင်းမိုင်တွင် မွေးကာစ ချက်ကြိုးတန်းလန်းဖြင့် ကလေးငယ်ကို အမှိုက်ပုံတွင် စွန့်ပစ်ထား

ဓာတ်ပုံ - ချင်းမိုင်နယူးစ်
ထိုင်းနိုင်ငံမြောက်ပိုင်း ချင်းမိုင်မြို့ ဆုထစ်ရပ်ကွက်ရှိ အမှိုက်ပုံနားမှာ အောက်တိုဘာ ၈ ရက် မနက်က ချက်ကြိုးတန်းလန်းနဲ့ မွေးကာစ ကလေးငယ်တဦး လာစွန့်ပစ်ထားတာကို တာဝန်ရှိသူတွေ တွေ့ရှိခဲ့ပါတယ်။ အောက်တိုဘာ ၈ ရက် မနက် ၉ နာရီလောက်က ဆုထစ်ရပ်ကွက် ဆုကဆိမ်လမ်းရှိ အမှိုက်ပုံနားမှာ ကလေးငိုသံကြားကြောင်း ပြည်သူတွေက သတင်းပေးလာတဲ့အတွက် ချန့်ဖိုတ်နယ်မြေရဲစခန်း တာဝန်ရှိသူတွေက လိုက်လံကြည့်ရှုစစ်ဆေးခဲ့ပါတယ်။ တာဝန်ရှိသူတွေက အသံရှိရာနေရာကို စစ်ဆေးရာမှာ မိုးထဲရေထဲ အမှိုက်ပုံနားက သေတ္တာဟောင်းတလုံးတွင်း မွေးကာစကလေးငယ်ကို တွေ့ရပြီး ချက်ကြိုးတန်းလန်းနဲ့ ရှိနေဆဲမို့ မွေးမွေးချင်း လာစွန့်ထားတာဖြစ်နိုင်တယ်လို့ တာဝန်ကျ ရဲဝန်ထမ်းက သတင်းထောက်တွေကို ပြောပါတယ်။ အဲဒီကလေးငယ်ဟာ သမီးမိန်းကလေးဖြစ်ပြီး နို့ချိုတောင် စို့ရသေးဟန်မတူဘဲ မိခင်က ကိုယ်ဝန်ဆောင်ဖို့ အဆင်မသင့်ခင် ကလေးရှိလာလို့ တာဝန်မယူနိုင်ဘဲ လာစွန့်သွားတာ ဖြစ်နိုင်တယ်လို့ ရဲဝန်ထမ်းက ဆက်ပြောပါတယ်။ တာဝန်ရှိသူတွေက အဲဒီကလေးကို လန့်နားဆေးရုံ ပို့ဆောင်ပေးခဲ့ပြီး သူနာပြုတွေက ချက်ကြိုးဖြတ်ကာ လုံခြုံစွာ ပြုစုစောင့်ရှောက်ထားတဲ့အတွက် ကျန်းမာရေးအခြေအနေ ကောင်းမွန်နေကြောင်း၊ လောလောဆယ် ကလေးကို ကျွေးမွေးစောင့်ရှောက်မယ့် အဖွဲ့အစည်းတွေ လာအခေါ်ကို စောင့်ဆိုင်းနေပြီး တဖက်ကလည်း တာဝန်ရှိသူတွေက ကလေးရဲ့ မိဘအရင်းကို လိုက်လံစုံစမ်း ရှာဖွေနေတယ်လို့ ချန့်ဖိုတ်ရဲစခန်းက သတင်းထောက်တွေကို ပြောသွားပါတယ်။

More News
Up