ကျားဖောင်ပေါ်မှ ပြုတ်ကျသည့် ရေလုပ်သားအလောင်း ပြန်တွေ့

မွန်ပြည်နယ် ရေးမြို့နယ် အဘော်ကျေးရွာကျားတန်း ကျားဖောင်ပေါ်ကနေ ပြုတ်ကျပျောက်ဆုံးနေတဲ့ ရေအလုပ်သမား ကိုချစ်ဆန်းမောင်ရဲ့ ရုပ်အလောင်းကို ၃ ရက်မြောက်တဲ့နေ့မှာ ပြန်လည်တွေ့ရှိခဲ့ပါတယ်။ စက်တင်ဘာ ၂၄ ရက် ညနေ ၆ နာရီက ကျားဖောင်ပေါ်က ရုတ်တရက်ရေထဲပြုတ်ကျခဲ့တာဖြစ်ပြီး လုပ်ဖော်ကိုင်ဖက်တွေက လိုက်လံရှာဖွေခဲ့ပေမယ့် မတွေ့ရှိရဘဲ စက်တင်ဘာ ၂၇ ရက်နေ့ မနက်ပိုင်းမှာ ကိုချစ်ဆန်းမောင်ရဲ့ ရုပ်အလောင်းကို အဘော်ကျားတန်းမှရေမိုင် ၁ မိုင်လောက်မှာ တွေ့ရှိခဲ့တာလို့ ရေးမြို့မရဲစခန်းမှူးက ပြောပါတယ်။ အလောင်းတွေ့ရှိမှုကို ရေလုပ်ငန်းရှင်ဖြစ်သူ ကိုအောင်ဇော်လင်းက သက်ဆိုင်ရာရဲတပ်ဖွဲ့ဝင်ကို အကြောင်းကြားခဲ့တယ်လို့ ရေးမြို့မရဲစခန်းမှူး ဒုရဲမှူးစိုးမွန်က  ပြောပါတယ်။ သေဆုံးသူရဲ့ ရုပ်အလောင်းကို ရဲတပ်ဖွဲ့ဝင်က သက်သေတွေနဲ့အတူ သွားရောက်စစ်ဆေးရာ ပြင်ပဒဏ်ရာတွေမတွေ့ရှိရဘူးလို့ ဆိုပါတယ်။ ရေနစ်သေဆုံးတာ ဓမ္မတာအတိုင်း သေဆုံးခြင်းဟုတ် မဟုတ် စစ်ဆေးနေပြီး ရေးမြို့မရဲစခန်းက သေမှုသေခင်းနဲ့ အမှုဖွင့်ထားတယ်လို့ သိရပါတယ်။ နေမျိုးထွဋ် (ရေး)

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up