Homeမြန်မာသတင်း
ထိုင်း-မြန်မာနယ်စပ် မြ၀တီ၊ တာချီလိတ်နှင့်ကော့သောင်းတို့တွင် နိုင်ငံကူးလက်မှတ်ရုံးခွဲ ဖွင့်လှစ်
ထိုင်း-မြန်မာနယ်စပ် မြ၀တီ၊ တာချီလိတ်နှင့်ကော့သောင်းတို့တွင် နိုင်ငံကူးလက်မှတ်ရုံးခွဲ ဖွင့်လှစ်
DVB
·
September 25, 2017
မြန်မာ-ထိုင်းနယ်စပ် မြ၀တီ၊ တာချီလိတ်နှင့် ကော့သောင်းမြို့တွေမှာ နိုင်ငံကူး လက်မှတ်ထုတ်ပေးရေးရုံးခွဲကို ဒီကနေ့ တပြိုင်နက်ဖွင့်လှစ်လိုက်ပါတယ်။
မြန်မာ-ထိုင်းနယ်စပ် ကရင်ပြည်နယ် မြ၀တီရုံးမှာတော့ နိုင်ငံကူးလက်မှတ် ထုတ်ပေးရေးရုံးခွဲကို မြ၀တီမြို့ အမှတ်(၄) ရပ်ကွက် ဓိဌာန်အောင်လမ်းမှာ ဖွင့်လိုက်ပါတယ်။
မြန်မာနိုင်ငံကူးလက်မှတ်ထုတ်ပေးရေးအဖွဲ့ရုံးခွဲဖွင့်လှစ်တာဟာ မြန်မာနိုင်ငံသားတွေ အဆင်ပြေရေးနဲ့ ကုန်ကျစရိတ် သက်သာရေးအတွက်ဖြစ်တယ်လို့ မြ၀တီမြို့ မြန်မာနိုင်ငံကူး လက်မှတ်ထုတ်ပေးရေးအဖွဲ့ရုံးခွဲ တာဝန်ခံ ဒုတိယရဲမှူးကြီး မြဒင်က ပြောပါတယ်။
“သာမန်နိုင်ငံကူးလက်မှတ် (စာအုပ်ကြီး) ကျနော်တို့ထုတ်ပေး မှာပေါ့လေ။ ဒါက နိုင်ငံတော်ရဲ့ အစီစဉ်နဲ့ ထိုင်းနိုင်ငံမှာရောက်နေတဲ့ ကျနော်တို့ မြန်မာနိုင်ငံသား အလုပ်သမားတွေရှိတယ်။ ဟိုမှာ ဥပဒေသစ်ပြင်လိုက်တဲ့အတွက် သူတို့မှာ အခက် အခဲတွေ ဖြစ်လာတယ်။ ရက်ပေါင်း ၁၈၀ တိုးပေးထားတယ်ပေါ့။ အဲဒီအချိန်မှာ လိုအပ်တဲ့ အထောက်အထား အပြည့်အစုံရအောင်ဆိုပြီးတော့ မြန်မာနိုင်ငံတွင်းကိုပြန်လာပြီးတော့မှ လုပ်ရတယ်။ လုပ်တဲ့အခါမှာ ရန်ကုန်တို့၊ ဘားအံတို့၊ မော်လမြိုင်တို့၊ တာချီလိတ်ဘက်ဆိုရင် လည်း ကျိုင်းတုံ၊ ကော့သောင်းဘက်ဆိုရင်လည်း ထားဝယ်အထိပေါ့၊ အဲလိုလာပြီးတော့ လုပ်ရ တယ်ပေါ့။ လုပ်တဲ့အချိန်မှာ အချိန်လည်း တအားကုန်တယ်။ ခရီးစရိတ်တွေလည်း တအားကုန်တယ်။ ဟိုမှာ ခွင့်တွေဘာတွေက တအားပိုတော့ ငွေကြေးတွေ အဖြတ်ခံရတယ်။ အဲတော့ နယ်စပ် မြ၀တီ၊ တာချီလိတ် ကော့သောင်းကို လာခြင်းအားဖြင့် ကုန်ကျစရိတ်တွေလည်း နည်းသွားတယ်။ လူလည်း ပင်ပန်းတာသက်သာမယ်။ အလုပ်လုပ်တဲ့အထဲမှာ ခွင့်ဘာညာက သတ်မှတ်ထားတဲ့တရက်အတွင်းမှာ ပြန်သွားနိုင်တာပေါ့။”
ဒါ့အပြင် ဒေသတွင်းက ပြည်သူတွေ ခရီးသွားအလည်အပတ်၊ အလုပ်သမား၊ ဘာသာရေး၊ သင်္ဘောလိုက်၊ လုပ်ငန်းရှင်တွေ၊ ပညာရေးပိုင်းဆိုင်ရာ နိုင်ငံကူး လက်မှတ်နဲ့ မှီခိုသွားချင်သူ အတွက်ပါ ဆောင်ရွက်ပေးနေတာဖြစ်ပါတယ်။
နိုင်ငံကူးလက်မှတ်ပြုလုပ်ရာမှာ အွန်လိုင်းကြေး ၂၀၀၀၀ ကျပ်၊ လျှောက်လွှာကြေး ၂၀၀ ကျပ်၊ ဓာတ်ပုံ ၂၀၀၀ ကျပ်၊ စာရွက်ထိန်းသိမ်းရေးနဲ့အခြား ၁၀၀၀ ကျပ်၊ စက်ပစ္စည်းဝန်ဆောင်မှု ၁၈၀၀ ကျပ် စုစုပေါင်းကုန်ကျစရိတ် ၂၅၀၀၀ ကျပ်ကုန်ကျမှာဖြစ်ပြီး တရက်တည်းအပြီး ဆောင်ရွက်ပေးသွားမယ်လို့ သိရပါတယ်။
မြ၀တီမြို့မှာ နိုင်ငံကူးလက်မှတ်လာလုပ်သူတဦးဖြစ်တဲ့ ကိုနိုင်က ဒီလို နယ်စပ်မှာ ဖွင့်လှစ်ပေးတဲ့အတွက် အရမ်းအဆင်ပြေတယ်လို့ ပြောပါတယ်။
“အဆင်အရမ်းပြေပါတယ်။ ကျနော်တို့အတွက် ဟိုးအောက်အထိ ကျနော်တို့သွားစရာမ လိုတော့ဘူး။ လမ်းစရိတ်လည်း သက်သာတယ်။ အများကြီးပြောပါတယ်။”
စာရွက်စာတမ်းတွေမှာ အမည်မှားယွင်းတာတွေ ရှိရင်တော့ စောင့်ရမှာဖြစ်ပြီး တရက်ကို အများဆုံး ၁၀၀ ဦးမှ ၅၀၀ ဦးအထိ လုပ်ပေးနိုင်လိမ့်မယ်လို့ ခန့်မှန်းနေကြပါတယ်။
အရင်က မြန်မာအလုပ်သမားတွေနေနဲ့ အလုပ်သမားပတ်စပို့ခေါ် (ယာယီနိုင်ငံကူး လက်မှတ်) အတွက် ထိုင်းနိုင်ငံတွင်းကနေ တာချီလိတ်နဲ့ ကော့သောင်းမြို့တွေကို သွားရောက်လုပ်ဆောင်ရပြီး လက်ရှိမှာတော့ သာမန်နိုင်ငံကူးလက်မှတ်တွေ နယ်စပ် ၃ မြို့မှာ ထုတ်ပေးနေတာဖြစ်ပါတယ်။