ရခိုင်ပြည်နယ်အရေးနဲ့ပတ်သက်လို့ ဒေါက်တာ ကိုဖီအာနန်ဦးဆောင်တဲ့ ရခိုင်ပြည်နယ်ဆိုင်ရာ အကြံပေးကော်မရှင်ရဲ့ အစီရင်ခံစာကို အမြန်ဆုံးအကောင်အထည်ဖော် ဆောင်ရွက်သင့်တယ်လို့ တိုင်းရင်းသားစည်းလုံးညီညွတ်ရေးပါတီ (တစည) ဒုဥက္ကဋ္ဌ ဦးဟန်ရွှေက ပြောဆိုလိုက်ပါတယ်။ ၂၉ နှစ်မြောက် တိုင်းရင်းသားစည်းလုံးညီညွတ်ရေး ပါတီနှစ်ပတ်လည်အခမ်းအနားကို စက်တင်ဘာ ၂၄ ရက်နေ့က ရန်ကုန်မြို့ တက္ကသိုလ်ရိပ်သာလမ်းရှိ တစည ပါတီရုံးချုပ်မှာ ကျင်းပနေတာဖြစ်ပြီး သတင်းစာရှင်းပွဲမှာ ပြောဆိုလိုက်တာပါ။ တိုင်းရင်းသားစည်းလုံးညီညွတ်ရေးပါတီအနေနဲ့ ဒေါက်တာကိုဖီအာနန်ကော်မရှင် အပြီးသတ်တင်သွင်းခဲ့တဲ့ အစီရင်ခံစာမှာ ၁၉၈၂ ခုနှစ် နိုင်ငံသားဖြစ်မှုဥပဒေကို ပြန်လည်ပြင်ဆင်သင့်တယ်ဆိုတဲ့အချက်ကိုသာ လက်မခံတာလို့ဆိုပါတယ်။ အဲဒီဥပဒေဟာ ၇ နှစ် နီးပါး တိုင်းရင်းသားပြည်သူ တွေဆီက သဘောထားမှတ်ချက်တွေကို ကောက်ခံပြုစုထားတာဖြစ်ပြီး နိုင်ငံ တကာဥပဒေနဲ့အညီ ပြဋ္ဌာန်းထားတာဖြစ်လို့ ပြင်ဆင်ဖို့မသင့်ဘူးလို့ ဆိုပါတယ်။ မြန်မာနိုင်ငံသားတွေအနေနဲ့ ရခိုင်အရေးနဲ့ပတ်သက်လို့ အားလုံးပူးပေါင်းဆောင်ရွက်ဖို့ လိုမယ်လို့ ဦးဟန်ရွှေက ပြောဆိုလိုက်ပါတယ်။