ရန်ကုန်လွှတ်တော်ရေးရာကော်မတီဝင်များ တိုးချဲ့ တာဝန်ပေး
အာကာ
·
September 11, 2017
ဒုတိယအကြိမ် ရန်ကုန်တိုင်းဒေသကြီး လွှတ်တော်ရေးရာ ကော်မတီ ၄ ခုမှာ အဖွဲ့ဝင်သစ် ၅ ဦးကို ထပ်မံထည့်သွင်း တာဝန်ပေးအပ်လိုက်ပါတယ်။
စက်တင်ဘာလ ၁၁ ရက်နေ့က ပြုလုပ်တဲ့ ဒုတိယအကြိမ် ရန်ကုန်တိုင်းဒေသကြီး လွှတ်တော် ပဉ္စမပုံမှန်အစည်းအဝေး စတုတ္ထနေ့မှာ အဖွဲ့ဝင်သစ်တွေကို အတည်ပြုခဲ့တာ ဖြစ်ပါတယ်။
ရန်ကုန်တိုင်းလွှတ်တော် တိုင်းရင်းသားလူမျိုးများအရေးဆိုင်ရာ ကော်မတီမှာ အဖွဲ့ဝင်အဖြစ် တာမွေမြို့နယ် မဲဆန္ဒနယ်အမှတ် ၁ လွှတ်တော်ကိုယ်စားလှယ် ဦးလှသိန်း၊ တိုင်းဒေသကြီးအစိုးရအဖွဲ့ရဲ့ ကတိကဝတ်၊ အာမခံချက်များနှင့် လွှတ်တော်အခွင့်အရေးကော်မတီ အဖွဲ့ဝင်အဖြစ် ကျောက်တန်းမြို့နယ် မဲဆန္ဒနယ်အမှတ် ၁ လွှတ်တော်ကိုယ်စားလှယ် ဦးဇော်မိုးလွင်၊ တရားစီရင်ရေး၊ ဥပဒေစိုးမိုးရေးနှင့် တိုင်ကြားစာများ၊ အသနားခံစာများ စိစစ်ရေးကော်မတီ အဖွဲ့ဝင်တွေအနေနဲ့ လမ်းမတော်မြို့နယ် မဲဆန္ဒနယ် အမှတ်-၂ လွှတ်တော်ကိုယ်စားလှယ် ဦးကျော်ထွန်းနဲ့ သုံးခွမြို့နယ် မဲဆန္ဒနယ် အမှတ်၂ လွှတ်တော်ကိုယ်စားလှယ် ဦးမျိုးဆွေတို့ကို တာဝန်ပေးအပ်လိုက်တာပါ။
ပို့ဆောင်ရေး၊ ဆက်သွယ်ရေး၊ ဆောက်လုပ်ရေးနှင့် စက်မှုလက်မှုရေးရာကော်မတီမှာ အဖွဲ့ဝင်အဖြစ်ပါရှိတဲ့ တပ်မတော်သား လွှတ်တော်ကိုယ်စားလှယ် ဗိုလ်ကြီးရဲအောင်အစား ဒုတိယဗိုလ်မှူးကြီး သန့်ဇင်လှိုင်ကို အဖွဲ့ဝင်အဖြစ် ပြောင်းလဲအတည်ပြုခဲ့ပါတယ်။