အချုပ်ခန်းဖောက်ပြေးသူတဦးကို ပြန်လည်ဖမ်းမိ
Aung Ko Latt
·
September 3, 2017
မုံရွာမြို့၊ နယ်မြေရဲစခန်း အချုပ်ခန်းဖောက်ပြီး ထွက်ပြေးသူ ၃ ဦးထဲက ၁ ဦးကို စက်တင်ဘာ ၂ ရက်နေ့ ညနေပိုင်းက ချင်းတွင်းတံတားအနီးမှာ ပြန်လည်ဖမ်းဆီးရမိခဲ့ပါတယ်။
အရွယ်မရောက်သေးတဲ့ ကလေးသူငယ်ကို ခိုးယူမှု၊ အဓမ္မပြုကျင့်မှု၊ လုယက်မှု စတာတွေနဲ့ မုံရွာနယ်မြေရဲစခန်း အချုပ်ခန်းအမှတ် ၂ မှာ ဖမ်းချုပ်ထားသူ ၃ ဦး သြဂုတ် ၂၉ ရက်နေ့ညက ပုဆိုး၊ နှစ်ဖက်သွားပါ သံဖြတ်လွှတို့ကို အသုံးပြုပြီး ထွက်ပြေးခဲ့တာပါ။
"မနေ့က ညနေက နယ်ထိန်းခေါင်းဆောင်၊ ရဲကင်းမှူးတို့က ရှာဖွေဖမ်းဆီးရေးလုပ်နေတုန်း မုံရွာဘက်ကနေ ဆိုင်ကယ်စီးလာတဲ့တယောက်က ဓာတ်ပုံထဲကရုပ်နဲ့တူလို့ ဖမ်းလိုက်တာ ကနေ မိတာပါ။ လောလောဆယ်တော့ (ပ)၅၉၇/၂၀၁၆၊ ရာဇသတ်ကြီးဥပဒေပုဒ်မ ၃၉၂/၁၁၄ နဲ့ ချုပ်ရက် ၁၀ လရှိပြီဖြစ်တဲ့ ဆန်းမင်းသူ (ခ) အောင်ကို၊ ရန်ကင်းရပ်ကွက်၊ မုံရွာမြို့ တစ်ယောက်တည်းကိုသာ မိသေးတာပါ။ စစ်ဆေးချက်တွေအရတော့ ပခုက္ကူလမ်းခွဲဘက်မှာ လူစုကွဲသွားတယ်လို့သိရတယ်။ ကျန် ၂ ယောက်ကိုလည်း အမြန်ဆုံးဖမ်းဆီးရမိရေးကို ဆောင်ရွက်နေပါတယ်" လို့ မုံရွာမြို့မရဲတပ်ဖွဲ့စခန်းမှ စခန်းမှူး ဒုရဲမှူး ကျင်စိန်က ဒီဗွီဘီကိုပြောပါတယ်။
အချုပ်ခန်းဖောက်ထွင်းမှုဖြစ်တာ ၅ ရက်ရှိပြီဖြစ်ပြီး ရာဇသတ်ကြီးဥပဒေပုဒ်မ ၃၆၆၊၃၇၆၊ ၃၆၃၊ ၁၁၄ နဲ့ ချုပ်ရက် ၁၁ လရှိပြီဖြစ်တဲ့ မင်းထိုက်ဆွေနဲ့ ရာဇသတ်ကြီးဥပဒေပုဒ်မ ၃၇၉ ကျင့် ၅၄ နဲ့ ချုပ်ရက် ၈ ရက်သာရှိသေးတဲ့ မိုးဝင်း (ခ) ကိုနိုင်တို့ ၂ ဦးကတော့ ထွက်ပြေးလွတ်မြောက်နေဆဲဖြစ်ပါတယ်။
ပြီးခဲ့တဲ့ သြဂုတ်လ ၃၁ ရက်နေ့ကလည်း မုံရွာအကျဥ်းထောင်မှာ မြို့နယ်တရားရုံး ရာဇသတ်ကြီး အမှုအမှတ် ၃၃၀၀/၂၀၁၇၊ ရဲအက် ၃၅(ခ)နဲ့ ပြစ်ဒဏ် ၁ လ ကျခံနေရာတဲ့ ကျော်စိုးနိုင်က ခြံစည်းရိုးအုတ်တံတိုင်းကိုကျော်ပြီး ထွက်ပြေးမှုဖြစ်ပေါ်ခဲ့ပါသေးတယ်။ ထွက်ပြေးတဲ့ အကျဥ်းသားကိုတော့ အဲဒီနေ့မှာပဲ ပြန်လည်ဖမ်းဆီးရမိခဲ့ပါတယ်။ ဖမ်းဆီးရမိတဲ့ အကျဉ်းသားကို မုံရွာမြို့မရဲစခန်းက၊ ရာဇသတ်ကြီးဥပဒေပုဒ်မ ၂၂၄ အရ အမှုဖွင့်အရေးယူဆောင်ရွက်ထားတယ်လို့ သိရပါတယ်။
