ရေး၌ မူးယစ်ဆေးဝါးတချို့နှင့် လက်ပစ်ဗုံး ၁ လုံး ဖမ်းမိ
DVB
·
August 15, 2017
မွန်ပြည်နယ်၊ ရေးမြို့နယ်မှာ သြဂုတ် ၁၄ ရက်နေ့ မနက်က မူးယစ်ဆေးဝါးသတင်းအရ နေအိမ် ၃ အိမ်ကို ဝင်ရောက်ရှာဖွေရာ မူးယစ်ဆေးအချို့နဲ့ လက်ပစ်ဗုံးတလုံး ဖမ်းမိခဲ့တယ်လို့ လမိုင်းနယ်မြေခံရဲစခန်းက ပြောပါတယ်။
ရေးမြို့နယ် နှစ်ကရင်အကွက်-၅ မှာ နေထိုင်တဲ့ စိုးမင်းနိုင်(ခ)အလင်းရဲ့ နေအိမ် မီးဖိုချောင်ထရံကြားက ICE ၄ ခုနဲ့ မူးယစ်ဆေးဝါး သုံးစွဲရာမှာ အသုံးပြုတဲ့ ဆက်စပ်ပစ္စည်းတွေ သိမ်းဆည်းရမိခဲ့ပြီး မနက် ၁၁ နာရီခွဲမှာ ရဲတပ်ဖွဲ့ဝင်တွေနဲ့အတူ သက်သေတွေက နှစ်ကရင်ကျေးရွာ ရထားသံလမ်းအနီးက ရာဘာခြံထဲက လေးသိန်း(ခ)လေးမြင့်နဲ့ ကွန်ဘိုင်တို့ရဲ့ တဲအိမ်ကို ဝင်ရောက်ရှာဖွေရာ စိတ်ကြွဆေးပြား ၂ ပြားနဲ့ ICE ဆေးတွေ ထည့်တဲ့ ဆက်စပ်ပစ္စည်းတွေပါ ထပ်မံသိမ်းဆည်းရမိခဲ့တာပါ။
ကွင်းဆက်တရားခံတွေကို ရဲတပ်ဖွဲ့ဝင်နဲ့ သက်သေတွေက မွန်းလွဲ ၁ နာရီက စိုးခက်(ခ)ကျော်ခက်ရဲ့ နေအိမ်ကို ရှာဖွေရာ နေအိမ်ထဲက သစ်သားဗီရိုထဲမှာ အဝတ်နဲ့ ပတ်ထားတဲ့ အမေရိကန်လုပ် လက်ပစ်ဗုံး အမည်းရောင်နဲ့အတူ စိုးခက်ရဲ့ဇနီး မသီတာမွန်ကို ဖမ်းဆီးရမိခဲ့ပါတယ်။ စိုးခက်က ထွက်ပြေးတိမ်းရှောင်နေတယ်လို့ ရဲမှတ်တမ်းအရ သိရပါတယ်။
လမိုင်းနယ်မြေရဲစခန်းက မူးယစ်ဆေးဝါး ဥပဒေပုဒ်မတွေနဲ့အညီ စိုးမင်းနိုင်(ခ)အလင်း၊ လေးသိန်း(ခ)လေးမြင့်နဲ့ လက်နက် ဥပဒေပုဒ်မ ၁၉-က အရ မသီတာမွန်ကို သြဂုတ် ၁၄ ရက်နေ့ ညနေ ၄ နာရီ ၃၅ မိနစ်အချိန်က အမှုဖွင့် အရေးယူထားပြီး ကွင်းဆက်တရားခံ ထွက်ပြေးတိမ်းရှောင်နေသူ စိုးခက်ကိုလည်း ဖမ်းဆီးရမိနိုင်အောင် ဆောင်ရွက်နေတယ်လို့ ရဲတပ်ဖွဲ့ဝင်တွေက ပြောပါတယ်။
သတင်း - နေမျိုးထွဋ်(ရေး)
