လင်မယားချင်း အဆင်မပြေဖြစ်ရာက ဇနီးကို ဓားဖြင့်လှီး၊ မီးရှို့မှုဖြစ်ပွား
DVB
·
August 7, 2017
စစ်ကိုင်းတိုင်းဒေသကြီး မုံရွာမြို့ ကမ္မကျေးရွာနှင့် မုံရွာ-သာစည်-နောင်ကြီးအိုင်လမ်း အဝိုင်းပတ် အကြား၊ မြို့ပတ်လမ်းပေါ်မှာ သြဂုတ် ၆ ရက်နေ့ ညနေပိုင်းက လင်မယားချင်း အဆင်မပြေ ဖြစ်ရာကနေ ဇနီးဖြစ်သူကို ဓားနဲ့ လှီး၊ မီးရှို့မှုဖြစ်ပွားခဲ့တယ်လို့ ပြည်တော်သာရပ်ကွက် အုပ်ချုပ်ရေးမှူးက ပြောပါတယ်။
ဓားနဲ့လှီး မီးရှို့ခံရသူ အမျိုးသမီးမှာ မဖြိုးဖြိုးအိ (ခ) မြတ်နိုး (၁၇နှစ်)ဖြစ်ပြီး လင်မယားချင်း အဆင်မပြေရာကနေ ဓာတ်ဆီလောင်း၊ မီးရှို့တဲ့အပြင် လည်ပင်းနဲ့ လက်ကောက်ဝတ်တို့မှာလည်း ဓားနဲ့ လှီးဖြတ်ထားလို့ လက်ကောက်ဝတ်မှာ ၂ လက်မခန့်ပြတ်ရှဒဏ်ရာ ၁ချက်၊ လည်ပင်းမှာ ၅ လက်မခန့် ပြတ်ရှဒဏ်ရာ ၁ချက်၊ ဝဲယာ လက်၊ ဝဲခြေသလုံးတို့မှာ မီးလောင်ဒဏ်ရာတွေရရှိခဲ့ပါတယ်။
ပြည်တော်သာရပ်ကွက် အုပ်ချုပ်ရေးမှုး ဦးရဲထွဋ်က “အဲဒီမှာ တဲကြီးကုန်း အုပ်ချုပ်ရေးမှူးရဲ့သားက မုံရွာကနေ မြို့ပတ်လမ်းအတိုင်းရွာ အပြန်မှာ တွေ့တာ။ ဆိုင်ကယ်ရပ်ပြီး ကူဖို့လုပ်တော့ ဓားကိုင်ထားတဲ့သူက သူ့ကိုပါ ရန်ရှာတယ်။ လိုက်တယ်။ အဲဒါကနေ သူကထွက်ပြေးပြီး အဝေးရောက်မှ ဦးလေးကို ဖုန်းလှမ်းဆက်တာ။ မနေ့က ညနေ ၅ နာရီ ၁၀ မိနစ်လောက်ကပေါ့ ဦးလေးက သာစည်ဈေးမှာ ဈေးဝယ်သွားနေတာ။ အဲဒါကနေ ဦးလေးကလည်း သက်ဆိုင်ရာ နယ်မြေရဲ၊ ကမ္မအုပ်ချုပ်ရေးမှူးတွေကို အကြောင်းကြားပြီး သွားကြတာပေါ့။ သူတို့က ဒေသခံတွေ မဟုတ်ဘူး။ လွင်ထုံးဖိုမှာ အလုပ်လာလုပ်နေကြတာ။ ကောင်လေးက အရာတော်နယ်က၊ ကောင်မလေးက တမူးနယ်က။ သူတို့ချင်း အဆင်မပြေရာကနေ ခုလိုဖြစ်တာပဲ။”လို့ ပြောပါတယ်။
ဓားနဲ့လှီးမီးရှို့ခံရသူ အမျိုးသမီးကို ပြည်တော်သာရပ်ကွက် စေတနာသုခ လူမှုကူညီရေးအသင်းကားနဲ့ မုံရွာဆေးရုံကြီး အရေးပေါ် ဌာနကို ပို့ဆောင်ကာ ကုသမှုပေးနေတယ်လို့သိရပါတယ်။
အခုလို ဓားလှီး၊ မီးရှို့ခဲ့သူ မောင်တင် (ခ) တင်ဌေး (၂၅ နှစ်ခန့်)ကို တာဝန်ရှိသူတွေက ဝိုင်းဝန်းဖမ်းဆီးခဲ့ပြီး ပြည်တော်သာရပ်ကွက်အုပ်ချုပ်ရေးမှုး ဦးရဲထွဋ်က တရားလိုပြုလုပ်ကာ (ပ) ၅၆၆/၂၀၁၇၊ ရာဇသတ်ကြီးဥပဒေပုဒ်မ ၄၃၆/၃၂၆ အရ မုံရွာနယ်မြေရဲစခန်းမှာ အမှုဖွင့်အရေးယူ ဆောင်ရွက်နေပါတယ်။