ဧရာဝတီကမ်းလွန်လုပ်ကွက်မှ ဓာတ်ငွေ့ တနေ့ကို ကုဗပေ သန်း ၅၀ ထုတ်နိုင်ဟု စမ်းသပ်တွေ့ရှိ
DVB
·
August 7, 2017
မြန်မာနိုင်ငံ အနောက်ဘက် ကမ်းလွန်က ဇွန်လ ၁၅ ရက်နေ့က စတွေ့ခဲ့ပြီးနောက် မီတာ ၄၅၀၀ ကျော်အထိ တူးဖော်ခဲ့တဲ့ ကမ်းလွန်လုပ်ကွက်အမှတ် A(6) ဟာ သဘာဝဓာတ်ငွေ့ တနေ့ကို ကုဗပေသန်း ၅၀ နှုန်း ထုတ်ယူနိုင်တယ်လို့ စမ်းသပ်တွေ့ရှိခဲ့ကြောင်း အစိုးရက သတင်းထုတ်ပြန်ပါတယ်။
ဒီအမှတ် A(6) က အကဲဖြတ်တွင်း ပြည်သစ် ၁ ကို တူးဖော်နေတဲ့ တွင်းတူးစက်နေရာကို လျှပ်စစ်နှင့်စွမ်းအင်ဝန်ကြီးဌာနနှင့် ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးဝင်းခိုင်နဲ့ ဧရာဝတီတိုင်းဒေသကြီး အစိုးရအဖွဲ့ ဝန်ကြီးချုပ် မန်းဂျော်နီတို့ မနေ့က သွားရောက်စစ်ဆေးခဲ့ပါတယ်။
အကဲဖြတ်တွင်း ပြည်သစ်(၁)ကို လုပ်ကွက်A(6)ရဲ့ တတိယမြောက်တွင်း အဖြစ် ဧရာဝတီတိုင်းဒေသကြီး ပုသိမ်မြို့ရဲ့ အနောက်မြောက်ဘက် ကီလိုမီတာ ၉၀ ခန့်အကွာ ကမ်းလွန်ပင်လယ်ပြင်တွင် ရေအနက် မီတာ ၂ ထောင်လောက်မှာ တူးဖော်ခဲ့တာ ဖြစ်ပါတယ်။
မြန်မာ့ကမ်းလွန် လုပ်ကွက်အမှတ် A(6)ကို MPRL E&P ကုမ္ပဏီက ရင်းနှီး မြှုပ်နှံမှု ၂၀ ရာခိုင်နှုန်း၊ သြစတြေးလျနိုင်ငံ Woodside Energy (Myanmar) Pte.,Ltd က ၄၀ ရာခိုင်နှုန်း၊ ပြင်သစ်နိုင်ငံ Total E & P Myanmar ကုမ္ပဏီက ၄၀ ရာခိုင်နှုန်း အချိုးကျ ပါဝင်ကာ ရှာဖွေတူးဖော်ခြင်း လုပ်ငန်းများကို အကျိုးတူ ပူးပေါင်း ဆောင်ရွက်နေပါတယ်။
