H1N1 တုပ်ကွေးဖြင့် လူ ၂ ဦးထပ်မံသေဆုံး၊ လူနာ ၁ ဦးထပ်မံရောက်ရှိ
DVB
·
July 25, 2017
ရန်ကုန်ဆေးရုံကြီးမှာ ရာသီတုပ်ကွေး A(H1N1) ရောဂါနဲ့ လူနာ ၂ ယောက် ထပ်မံ သေဆုံးပြီး ဒီနေ့ပဲ သံသယ လူနာတယောက်ထပ်ရောက်လာတယ်လို့ ဒုဆေးရုံအုပ်က ဒီဗွီဘီကို အတည်ပြု ပြောပါတယ်။
မနေ့က ဆေးရုံကိုရောက်ရှိလာတဲ့ ကိုယ်ဝန်ဆောင်အမျိုးသမီးတယောက် ချက်ချင်း သေဆုံးခဲ့ပြီး ၂၁ ရက်နေ့ ကတည်းက ပဲခူးကနေလာရောက်ဆေးကုသမှုခံယူနေတဲ့ အမျိုးသားတယောက်လည်း သေဆုံးခဲ့တာပါ။
မနေ့က သေဆုံးသူနှစ်ယောက်လုံးမှာ H1N1 ရောဂါပိုးတွေ့ရှိခဲ့တယ်လို့ ဒုဆေးရုံအုပ် ဒေါက်တာမြင့်မြင့်အေးက ပြောပါတယ်။
ဒါ့အပြင် ဇူလိုင်လ ၂၅ ရက်နေ့မှာ ရန်ကုန်ဆေးရုံကြီးကို ရောက်ရှိလာတဲ့ အမျိုးသား လူနာတဦးဟာ ရာသီတုပ်ကွေးရောဂါဖြစ်နေသလို အသက်ရှူလမ်းကြောင်းဆိုင်ရာရောဂါ အပြင်းအထန် ခံစားနေရတဲ့အတွက် H1N1 ဟုတ်မဟုတ်သိနိုင်ဖို့အတွက် ဓာတ်ခွဲခန်းပို့ စမ်းသပ် စစ်ဆေးနေပြီး အဖြေကိုတော့ ဇူလိုင်လ ၂၆ ရက်နေ့မှာ သိရမယ်လို့ ပြောပါတယ်။
“ရာသီတုပ်ကွေးကနေပြီး အသက်ရှူကြပ်တာတို့၊ ချောင်းတအားဆိုးတာတို့ အဲလို ဖြစ်လာတဲ့ လူလောက်ပဲအစ်မတို့ဆီလာပြတယ်။ လတ်တလောလည်း နေ့တိုင်းတော့ တစ်ယောက် နှစ်ယောက်တက်နေတာပဲ။ ဒီနေ့လည်း တစ်ယောက် ရှိတယ်။ စစ်နေတယ်။ မနက်ဖြန်သိရမယ်” လို့ ဒေါက်တာမြင့်မြင့်အေးက ဆက်ပြောပါတယ်။
H1N1 ရောဂါဖြစ်ပွားသူတွေ များလာမယ်ဆိုရင်တော့ ရောဂါမကူးစက်အောင် ဝေဘာဂီဆေးရုံမှာ ထားရှိဖို့ကို ပြင်ဆင်ထားပါတယ်လို့ သိရပါတယ်။
လက်ရှိမှာ ရာသီတုပ်ကွေးရောဂါ H1N1 ကူးစက်ခံထားရသူ စုစုပေါင်း ၁၃ ဦးနဲ့ သေဆုံးသူ ၃ ဦးရှိနေပြီဖြစ်ပါတယ်။
လတ်တလောမှာ ရောဂါကူးစက်ခံ နေရသူတွေ ရှိနေတဲ့နေရာတွေကတော့ ရန်ကုန်တိုင်း၊ ပဲခူးတိုင်း၊ ချင်းပြည်နယ်၊ ဧရာဝတီတိုင်း၊ နေပြည်တော် တို့မှာ ဖြစ်ပါတယ်။
လက်ရှိဖြစ်နေတဲ့ တုပ်ကွေးဟာ Influenza A(H1N1)pdm09 ဗိုင်းရပ်စ်ပိုးကြောင့်ဖြစ်ပြီး ၂၀၀၉ ခုနှစ်က နိုင်ငံအားလုံးကို ကူးစက်ခဲ့ပြီး ကမ္ဘာလုံးဆိုင်ရာ ကပ်ရောဂါအသွင်ဖြစ်ပွားခဲ့တာပါ။
အဲဒါကြောင့် လူအများစုမှာ အဲဒီဗိုင်းရပ်စ်အတွက် ခုခံအား (Immunity) တချို့ရပြီးဖြစ်လို့ ၂၀၁၀ ခုနှစ် သြဂုတ် ၁၀ ရက်နေ့မှာ ကမ္ဘာလုံးဆိုင်ရာ ကပ်ရောဂါဖြစ်ပွားမှုပြီး နောက်ပိုင်းကာလ (Post – pandemic period) ကို ရောက်ပြီလို့ ကြေညာခဲ့ပါတယ်။
ဒါပေမယ့် ဗိုင်းရပ်စ်ပိုးဟာ နောင်နှစ်များစွာအထိ ရာသီတုပ်ကွေးရောဂါ (Seasonal Influenza) အသွင်နဲ့ ဆက်လက်ကူးစက်ပျံ့ပွားနိုင်တယ်လို့ ကမ္ဘာ့ကျန်းမာရေးအဖွဲ့က ကြေညာထားပါတယ်။