ရခိုင်ပြည်နယ်တွင် လူ ၁၄၀၀ ကျော် သွေးလွန်တုပ်ကွေးဖြစ်ပွား၊ ၁၆ ယောက် သေဆုံး
ပိုင်စိုး
·
July 11, 2017
ရခိုင်ပြည်နယ်ထဲက မြို့နယ်တိုင်းလိုလိုမှာ သွေးလွန်တုပ်ကွေးရောဂါ ဖြစ်ပွားတဲ့ လူနာတွေ ရှိနေပြီး လူ ၁၆ ဦး သေဆုံးခဲ့တယ်လို့ ကျန်းမာရေးဌာန တာဝန်ရှိသူတဦးက ဒီဗွီဘီကို ပြောပါတယ်။
မင်းပြား၊ ကျောက်တော်၊ တောင်ကုတ်နဲ့ စစ်တွေမြို့တွေမှာ ရောဂါအများဆုံး ဖြစ်နေတာလို့ ရောဂါပိုးမျိုး သယ်ဆောင်တဲ့ ပိုးမွှားကောင်များမှတဆင့် ကူးစက်တတ်သော ရောဂါများ ကာကွယ်နှိမ်နင်းရေးအဖွဲ့က လက်ထောက်ညွှန်ကြားရေးမှူး ဒေါက်တာစံကျော့ခိုင်က ပြောပါတယ်။
“ပြီးခဲ့တဲ့ သောကြာနေ့ထိ စာရင်းတွေအရ လူပေါင်း ၁၄၀၀ ကျော် ဖြစ်နေတယ်။ ၁၆ ယောက် သေဆုံးသွားတယ်။ မာန်အောင်မှာတော့ ဒီနှစ်မှာ ၃ ယောက်ပဲ ဖြစ်တယ်။ ဘူးသီးတောင်နဲ့ မောင်တောကတော့ ပြီးခဲ့တဲ့ဇွန်မှာ ဖြစ်တာရှိပေမယ့် ဇူလိုင်လမှာတော့ စာရင်းတက်တာ မရှိဘူး” လို့ သူက ပြောပါတယ်။
ဒီနှစ် ၆ လအတွင်း ဖြစ်တာဟာ မနှစ်က တနှစ်လုံးဖြစ်တာထက် ပိုများပြီး မနှစ်က ၅၅၆ ဦး ဖြစ်ပွားပြီး ၅ ဦး သေဆုံးခဲ့တာပါ။
ရောဂါ ဖြစ်ပွားသူတွေထဲမှာ အငယ်ဆုံးက အသက် ၆ လဖြစ်ပြီး အကြီးဆုံးအရွယ်က ၇၆ နှစ် ဖြစ်ပါတယ်။
သွေးလွန်တုပ်ကွေးဟာ ရေကြည်ရေသန့်မှာ ပေါက်ဖွားတဲ့ ခြင်ကျားခေါ် ခြင်ပုန်းကတဆင့် ကူးစက်တတ်တာဖြစ်ပြီး ကလေးတွေမှာ ပိုပြီးရောဂါအဖြစ်များတာ ဖြစ်ပါတယ်။