၁၄ နှစ်အရွယ် ၈ တန်းကျောင်းသူလေးအား ပထွေးဖြစ်သူက အဓမ္မပြုကျင့်
DVB
·
June 24, 2017
မွန်ပြည်နယ်၊ ရေးမြို့နယ် အစင်ကျေးရွာ နယ်မြေ ၉ အောင်ဆန်းရပ်ကွက်မှာ ၁၄ နှစ်အရွယ် ၈ တန်း ကျောင်းသူကို ပထွေးဖြစ်သူက အဓမ္မပြုကျင့်မှုနဲ့ပတ်သက်ပြီး မိခင်ဖြစ်သူရဲ့ တိုင်ကြားချက်အရ ဇွန် ၂၂ နေ့မှာ ရဲတပ်ဖွဲ့က ဖမ်းဆီးအမှုဖွင့် လိုက်ပါတယ်။
မယားပါသမီးဖြစ်သူကို ပြီးခဲ့တဲ့ မေ ၁၂ နဲ့ ဇွန် ၉ ရက်မှာ ၂ ကြိမ်တိုင် အဓမ္မပြုကျင့်ခဲ့တာ ဖြစ်ပါတယ်။
ဖြစ်စဉ်မှာ ၈ တန်းကျောင်းသူလေးရဲ့ မိခင်ဟာ မေလ ၁၂ ရက်နေ့က ဆေးရုံမှာ လူနာညစောင့် သွားအိပ်ပေးနေချိန် အိမ်မှာ သမီးဖြစ်သူ တူမဖြစ်သူနဲ့ ပထွေးဖြစ်သူ ညိုဝင်းတို့ ၃ ဦးကျန်ခဲ့တယ်လို့ ရဲမှတ်တမ်းမှာ ဖော်ပြထားပါတယ်။
ဒီနောက်မှာတော့ ပထွေးဖြစ်သူက မယားပါ သမီးဖြစ်သူကို ထမင်းစားဖို့ဆိုပြီး ဘဲဥကြော်ခိုင်းလို့ အိပ်ရာက ထလာစဉ် ပါးစပ်ပိတ်ပြီး အဓမ္မပြုကျင့်ခဲ့တာ ဖြစ်ကြောင်း၊ မုဒိမ်းကျင့်တာကို တွေ့ရှိခဲ့တဲ့ တူမဖြစ်သူကိုလည်း အခြားသူတွေကို ပြန်မပြောဖို့ ခြိမ်းခြောက်တာဖြစ်ပြီး ဇွန်လ ၉ နေ့ကလည်း မိခင်ဖြစ်သူ ပဲပြုတ်ရောင်းသွားစဉ် ပထွေးဖြစ်သူက နေအိမ် အိမ်ခန်းအတွင်း ၀င်ရောက်ပြီး အဓမ္မတကြိမ်ပြုကျင့်ခဲ့သေးကြောင်း ရဲမှတ်တမ်းအရ သိရပါတယ်။
“လက်ရှိနစ်နာတဲ့ ၈ တန်းကျောင်းသူနဲ့ တရားခံကို ဆေးစစ်ဆေးမှုခံယူထားသော်လည်း ထင်မြင်ယူဆချက်ပြန်လည်ရ ရှိခြင်းမရှိသေးပါဘူး။ မုဒိမ်းမှုမြောက်လား မမြောက်လား ဆိုတာကိုလည်း အတည်ပြုမပြောနိုင်သေးဘူး။ စွပ်စွဲခံရသူ ညိုဝင်းကို ရေးမြို့မရဲစခန်း (ပ)၁၆၄/၂၀၁၇ ရာဇသတ်ကြီးပုဒ်-မ၃၇၆ နဲ့အမှုဖွင့် အရေးယူစစ်ဆေးဆောင်ရွက်နေပါတယ်” လို့ ရေးမြို့မရဲစခန်းက ဒုရဲမှူးစိုးမွန်က ပြောပါတယ်။
နေမျိုးထွဋ် (ရေး)
