ဆိုင်ကယ်စီးလာသူ ၂ ဦး မိုးကြိုးပစ်ခံရ၊ ၁ ဦးသေဆုံး
2.8K
ဧရာဝတီတိုင်းဒေသကြီး ပုသိမ်-မော်တင်ကားလမ်း ကိုင်းချောင်းတံတာအနီးမှာ ဆိုင်ကယ်စီးလာသူ ၂ ဦး မေ ၂၈ နေ့ ညနေ ၄ နာရီခွဲက မိုးကြိုးပစ်ခံရလို့ ၁ ဦးသေဆုံးပြီး ၁ ဦး ဒဏ်ရာရရှိခဲ့ပါတယ်။
ငပုတောမြို့နယ် ကမ်းနီတမန်ချောင်းနေ မင်းထက်အောင်(ခ)ထက်ထက် (၁၈) နှစ် မောင်းနှင်ပြီး တရွာတည်းနေ နေမျိုးနိုင် (၁၇) နှစ် နောက်မှ စီးနင်းလာသူတို့ ပုသိမ်မှ ကန်းနီကျေးရွာကို ပြန်လာစဉ် ပုသိမ်-မော်တင်ကားလမ်း မိုင်တိုင်အမှတ် ၁၆/၆-၁၆/၇ ကြား ကိုင်းချောင်းတံတားအနီး လျှပ်စီး လက်စဉ် မိုးကြိုးပစ်ခံရတဲ့အတွက် ဆိုင်ကယ်တိမ်းမှောက်ကာ နေမျိုးနိုင်မှာ မိုးကြိုးလျှပ်စီးကြောင့် နား/မျက်လုံးတွေက သွေးစီးလျက်နေရာမှာပင် သေဆုံးခဲ့တာပါ။
မင်းထက်အောင်မှာ ခါးအောက်ပိုင်းလှုပ်မရ၊ ဝဲဒူး ပွန်းပွဲ ဒဏ်ရာရရှိတဲ့အတွက် ပုသိမ်ဆေးရုံကြီးကို ပို့ဆောင်ကုသခဲ့ရပါတယ်။
ပုသိမ်မြို့နယ် တလပ်ခွာနယ်မြေရဲစခန်းမှ သေမှုသေခင်းအမှတ်စဉ် (၃/၂၀၁၀၇)အရ အမှုဖွင့် ဆောင်ရွက်နေတယ်လို့ တာဝန်ခံ နယ်ထိန်း ကိုစိုးမိုးက ပြောပါတယ်။
မြန်မာနိုင်ငံမှာ မိုးဦးရာသီ လျှပ်စီးမိုးကြိုး အများအပြားဖြစ်နိုင်ကြောင်း ဒေါက်တာထွန်းလွင် မှ ကြိုတင်ပြောကြားထားသလို မြန်မာနိုင်ငံ အနှံ့အပြားမှာ မိုးကြိုးထိမှန် သေဆုံးမှုတွေ ရှိနေပါ တယ်။
သတင်း - ကျော်မင်းဟန်၊ ဟိန်းစိုးလင်း
