တောင်ကိုရီးယားသမ္မတသစ်က အခင်းအကျင်းသစ်ကို ဖန်တီးနိုင်လေမလား
DVB
·
May 15, 2017
မေလ ၉ ရက်နေ့က ကျင်းပသွားခဲ့တဲ့ တောင်ကိုရီးယားနိုင်ငံရဲ့ သမ္မတ ရွေးကောက်ပွဲမှာတော့ ဒီမိုကရက်ပါတီက အသက် ၆၄ နှစ်ရှိပြီး လူ့အခွင့်အရေး ရှေ့နေတယောက်ဖြစ်တဲ့ မွန်းဂျေအင်းက အနိုင်ရသွားခဲ့တဲ့အတွက် တောင်ကိုရီးယားနိုင်ငံရဲ့ ၁၂ ယောက်မြောက်သမ္မတ ဖြစ်လာခဲ့ပါပြီ။
သူ သမ္မတ ဖြစ်လာတဲ့အချိန်ဟာ ကိုရီးယားကျွန်းဆွယ်မှာ စစ်ပွဲဖြစ်လုလု ဖြစ်သွားပြီး ခုထိ ပြဿနာမအေးနိုင်ဘဲ လိပ်ခဲတည်းလည်းဖြစ်နေဆဲအချိန်ဖြစ်တော့ တောင်ကိုရီးယား သမ္မတသစ်အနေနဲ့ အတော်သတိထားရမယ့်အချိန်လို့ ပြောရမှာပါပဲ။
မြောက်ကိုရီးယားနိုင်ငံရဲ့ နျူကလီးယားဒုံးကျည် စမ်းသပ် ခြိမ်းခြောက်မှုတွေကြောင့် အမေရိကန်နဲ့ တရုတ်နိုင်ငံတွေနဲ့ ဆက်ဆံရေးတင်းမာမှုတွေ၊ အမေရိကန်နိုင်ငံနဲ့ မဟာမိတ်ဖြစ်တဲ့ တောင်ကိုရီးယားအပေါ် မြောက်ကိုရီးယားနိုင်ငံရဲ့ ရန်လိုမှုနဲ့ ဖြစ်လာနိုင်ခြေရှိတဲ့ အန္တရာယ်တွေ၊ ပြည်တွင်းမှာ မိသားစုပိုင်ကုမ္ပဏီကြီးတွေဖြစ်တဲ့ ချေဘောတွေနဲ့ အစိုးရအဖွဲ့ ဆက်ဆံရေးရှုပ်ထွေးခဲ့တဲ့ အခြေအနေတွေအပြင် ဒုတိယကမ္ဘာစစ်ကာလက ဂျပန်စစ်တပ်က တောင်ကိုရီးယား အမျိုးသမီးတွေကို လိင်ဖျော်ဖြေရေးမယ်တွေအဖြစ် သွတ်သွင်းစေခိုင်းခဲ့တဲ့အပေါ် တောင်ကိုရီးယား ပြည်သူတွေရဲ့ တောင်းဆိုမှုကို ဂျပန်နိုင်ငံရဲ့ တုံ့ပြန်ဆောင်ရွက်မှုတွေကြောင့် တောင်ကိုရီးယား-ဂျပန် ဆက်ဆံရေး တင်းမာနေတဲ့ကိစ္စကိုလည်း သမ္မတသစ် မွန်းဂျေအင်း တယောက် ရင်ဆိုင်ရပါလိမ့်မယ်။
သူက ဗုဒ္ဓဟူးနေ့က ကျင်းပခဲ့တဲ့ သမ္မတ ကျမ်းသစ္စာကျိန်ဆိုပွဲမှာပဲ သူ့အနေနဲ့ မြောက်ကိုရီးယား နျူကလီးယားစမ်းသပ်မှု အရေးကိစ္စကို ပြေလည်အောင် ဖြေရှင်းရာမှာ ဆွေးနွေးပြောဆို တိုက်တိုက်တွန်းတွန်း လုပ်သွားမယ့်အကြောင်းနဲ့ မြောက်ကိုရီးယား ခေါင်းဆောင် ကင်ဂျုံအန်းနဲ့လည်း သင့်လျော်ကောင်းမွန်တဲ့ အနေအထားရောက်ရင် တွေ့ဆုံဖို့ ဆန္ဒရှိတယ်လို့ ထည့်သွင်းပြောဆိုသွားခဲ့ပါတယ်။
တဆက်တည်းမှာပဲ အမေရိကန်ပြည်ထောင်စုနဲ့ မဟာမိတ်အဖြစ် ဆက်ဆံမှုကိုလည်း အင်အားကောင်းလာအောင်လုပ်ဖို့ သမ္မတ ဒေါ်နယ်ထရမ့်နဲ့လည်း စောစောတွေ့ဆုံ ဆွေးနွေးချင်တဲ့အကြောင်းလည်း ပြောကြားခဲ့ပါတယ်။
သမ္မတ မွန်းဂျေအင်းဟာ ဒီမိုကရေစီသမားတယောက် ဖြစ်သလို လူ့အခွင့်အရေး ရှေ့နေတယောက်ဖြစ်တဲ့အတွက် သဘောထား ပျော့ပျောင်းမယ်လို့ လေ့လာသူတွေက ယူဆကြပါတယ်။ နောက် တောင်ကိုရီးယားမှာ အမေရိကန် ဒုံးကျည်ကာကွယ်ရေးစနစ် လာတပ်ဆင်နေတဲ့အပေါ် တရုတ်နိုင်ငံရဲ့ မကျေမနပ် ဖြစ်နေတာကိုလည်း ပြေလျော့စေချင်တဲ့အတွက် ဒုံးကျည်ကာကွယ်ရေးစနစ် တပ်ဆင်တဲ့ကိစ္စကို ပြန်ပြီး သုံးသပ်လိုတဲ့ သဘောလည်း ရှိပါတယ်။ အရင်သမ္မတလက်ထက်က ဒီကိစ္စကို အလျင်စလို သဘောတူ လက်ခံလိုက်တယ်လို့ သူက ယူဆပါတယ်။ ဒါပေမယ့် တောင်ကိုရီးယား ထိပ်တန်းအရာရှိတွေကတော့ တပ်ဆင်နေပြီဖြစ်လို့ ဒီကိစ္စ ပြန်ပြင်ဖို့ မဖြစ်နိုင်လောက်တော့ဘူးလို့ ပြောကြတယ်လို့လည်း ဆိုပါတယ်။
မြောက်ကိုရီးယားရဲ့ နျူကလီးယားဒုံးကျည် စမ်းသပ်မှုကိစ္စကိုလည်း နိုင်ငံတကာ ချဉ်းကပ်မှုနဲ့ တွေ့ဆုံဆွေးနွေးမှု အရေးယူပိတ်ဆို့မှု ၂ နည်းစလုံးနဲ့ ပြေလည်အောင် ညှိနှိုင်း ဆောင်ရွက်ဖို့ သူက ဆန္ဒရှိပါတယ်။
အမေရိကန်သမ္မတကတော့ မွန်းကို မြောက်ကိုရီးယား ဒုံးကျည်စမ်းသပ်မှု ကိစ္စဟာ ကိုင်တွယ်ရ ခက်ခဲရှုပ်ထွေးတဲ့အကြောင်း ပြောခဲ့ပေမယ့် ဖြေရှင်းလို့မရတဲ့ ပြဿနာတရပ်တော့ မဟုတ်ပါဘူးလို့လည်း ပြောဆိုခဲ့ပါတယ်။ ဒေါ်နယ်ထရမ့် အနေနဲ့ တောင်ကိုရီးယားသမ္မတသစ် မွန်းဂျေအင်း တက်လာပြီး မြောက်ကိုရီးယားနဲ့ ဆက်ဆံရေးမှာ သဘောထားပြောင်း အခင်းအကျင်း ပြောင်းလဲလိုက်ရင် သူ့အနေနဲ့ ကာကွယ်ရေးကိစ္စတွေ စီစဉ်ရာမှာ သူ စီစဉ်ဆောင်ရွက်ချင်သလို လုပ်လို့ မရမှာကိုလည်း စိုးရိမ်ဟန်တူတယ်လို့ အကဲခတ်သူတွေက ဆိုပါတယ်။
သမ္မတ မွန်းကလည်း သူ့ရဲ့ကျမ်းသစ္စာပြုတဲ့နေ့မှာပဲ လုံခြုံရေးဆိုင်ရာ တင်းမာမှုတွေကို သူ့အနေနဲ့ ချက်ချင်း ကိုင်တွယ်ဆောင်ရွက်မယ်လို့ ပြောကြားခဲ့ပါတယ်။ သူ ပထမဆုံး စကားပြောခဲ့တာက တရုတ်သမ္မတ ရှီကျင်းပင်နဲ့ဖြစ်ပြီး နောက်ပိုင်းမှာ ဂျပန်ဝန်ကြီးချုပ် ရှင်ဇိုအာဘေးနဲ့ တယ်လီဖုန်းဆက်သွယ် စကားပြောဆိုခဲ့ပြီး ၂ ယောက်စလုံးနဲ့ စကားပြောဆိုမှုတွေမှာ လုံခြုံရေးကောင်စီရဲ့ ဆုံးဖြတ်ချက်တွေကို ချိုးဖောက်တာဖြစ်တဲ့ မြောက်ကိုရီးယားနိုင်ငံရဲ့ အလျင်အမြန် နျူကလီးယားလက်နက် ဖွံ့ဖြိုးမှုတွေနဲ့ တိုက်ချင်းပစ်ဒုံးကျည် စမ်းသပ်တဲ့ အစီအစဉ်တွေကို ဘယ်လိုတုံ့ပြန် ကိုင်တွယ်ကြမလဲဆိုတဲ့ ကိစ္စတွေသာ လွှမ်းမိုးနေခဲ့ပြီး သမ္မတ မွန်းက တရုတ်သမ္မတ ရှီကျင်းပင်ကို စကားပြောရာမှာ…
“မြောက်ကိုရီးယား နျူကလီးယားကိစ္စရဲ့ အဖြေဟာ ဖိအားပေးတာ၊ အရေးယူ ပိတ်ဆို့တာတွေနဲ့ တပြိုင်နက်တည်းမှာ ညှိနှိုင်းဆွေးနွေးတာတွေ လုပ်ပြီး အလုံးစုံခြုံငုံ ပါဝင်သလို စဉ်ဆက်မပြတ်ဖြစ်ဖို့လည်း လိုတယ်” လို့ ပြောဆိုခဲ့တဲ့အကြောင်း သူ့ရဲ့ ပြောရေးဆိုခွင့်ရှိသူ ယွန်းယောင်ချင်က ထုတ်ဖော်ပြောကြားခဲ့ပါတယ်။
ဗုဒ္ဓဟူးနေ့က သမ္မတ ဒေါ်နယ်ထရမ့်နဲ့ တယ်လီဖုန်း စကားပြောတဲ့ အချိန်မှာလည်း သမ္မတ ထရမ့်က ဒီလမှာ မြောက်ကိုရီးယားခေါင်းဆောင် ကင်ဂျုံအန်းနဲ့ တွေ့ဆုံဖို့ တံခါးဖွင့်ထားပေးတဲ့အကြောင်း၊ သင့်လျော်မှန်ကန်တဲ့ အခြေအနေမှာ သူ ကင်နဲ့ တွေ့ဆုံခွင့်ရမယ်လို့ ထင်တဲ့အကြောင်း ပြောကြားခဲ့တယ်လို့လည်း သမ္မတ မွန်းရဲ့ ပြောရေးဆိုခွင့်ရှိသူက ထုတ်ဖော်ပြောဆိုခဲ့ပါတယ်။
ဒါပေမယ့် အမေရိကန်ပြည်ထောင်စုက တာဝန်ရှိ အရာရှိတွေကတော့ ခုလောလောဆယ် အခြေအနေမှာ မြောက်ကိုရီးယားနိုင်ငံနဲ့ နိုင်ငံတကာတွေ့ဆုံဆွေးနွေးမှု ပြန်စလို့ကတော့ ဘာမှ တန်ဖိုးရှိလိမ့်မယ် မဟုတ်ဘူးလို့ ယူဆတဲ့အကြောင်းနဲ့ မြောက်ကိုရီးယားအနေနဲ့ နျူကလီးယားလက်နက် ထုတ်လုပ်မှုကို ရပ်ဆိုင်းပစ်ဖို့ ဆောင်ရွက်နေတယ် ဆိုတာကိုသာ ရှင်းရှင်းလင်းလင်း ပြသဖို့ လိုတယ်လို့ ပြောဆိုခဲ့တယ်လို့ သိရပါတယ်။
အမေရိကန်ပြည်ထောင်စု နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ အမျိုးသမီး ကာတီးနားအဒမ်ကလည်း “ကျမတို့ မြောက်ကိုရီးယားနိုင်ငံနဲ့ တွေ့ဆုံဖို့ တံခါးဖွင့်ထားဆဲပါပဲ။ ဒါပေမယ့် မြောက်ကိုရီးယားနိုင်ငံအနေနဲ့ သူ့ရဲ့ တရားမဝင် လှုပ်ရှားမှုအားလုံးနဲ့ ဒေသတွင်းမှာ ရန်လိုတဲ့ အပြုအမူတွေကို ရပ်ဆိုင်းပစ်လိုက်တယ် ဆိုတာကို ကျမတို့ သိဖို့ လိုအပ်ပါတယ်” လို့ ပြောကြားခဲ့တာကို တွေ့ရပါတယ်။
ဒေသဆိုင်ရာ ကျွမ်းကျင်သူတွေ လပေါင်း အတော်ကြာကတည်းက ယုံကြည်ထားခဲ့တာကတော့ မြောက်ကိုရီးယားနိုင်ငံဟာ သူ့ရဲ့ ၆ ကြိမ်မြောက် နျူကလီးယား စမ်းသပ်မှုကို ပြုလုပ်ဖို့ ပြင်ဆင်နေတယ် ဆိုတာပါပဲ။ မြောက်ကိုရီးယားက အမေရိကန်ပြည်ထောင်စုအထိ ရောက်နိုင်တဲ့ နျူကလီးယား ထိပ်ဖူးတပ် တိုက်ချင်းပစ် ဒုံးကျည် ဖွံ့ဖြိုးတိုးတက်ရေးကို လုပ်ဆောင်နေတယ်လို့လည်း သူတို့က အကဲဖြတ် သုံးသပ်ခဲ့ကြပါတယ်။ အဲဒီကိစ္စကြောင့်ပဲ သမ္မတ ဒေါ်နယ်ထရမ့်က သူ့နိုင်ငံရဲ့ လုံခြုံရေးဆိုင်ရာ ကိစ္စတွေကို အပူတပြင်း ပြောဆို ဆောင်ရွက်ခဲ့တာ ဖြစ်ပါတယ်။
ကြာသပတေးနေ့မှာလည်း အမျိုးသားထောက်လှမ်းရေးအဖွဲ့ ညွှန်ကြားရေးမှူး ဒင်ကုတ်စ်က အထက်လွှတ်တော် ထောက်လှမ်းရေးကော်မတီကို ပြောကြားရာမှာ မြောက်ကိုရီးယားဟာ ထူးခြားအရေးကြီးပြီး အင်အားအရ တည်ရှိနိုင်တဲ့ ခြိမ်းခြောက်မှုတခုကို ချမှတ်ဆောင်ရွက်နေတာ ဖြစ်တယ်။ ဒါကို အမေရိကန်ပြည်ထောင်စုက ကိုင်တွယ်ဖြေရှင်းရမှာ ဖြစ်တယ်လို့ ပြောကြားသွားခဲ့တယ်လို့ ဆိုပါတယ်။
အမေရိကန်သမ္မတ ဒေါ်နယ်ထရမ့်ကတော့ ရိုက်တာသတင်းဌာနရဲ့ အင်တာဗျူးကို ဖြေကြားရာမှာ လွန်ခဲ့တဲ့လက အမေရိကန်ပြည်ထောင်စုနဲ့ မြောက်ကိုရီးယားကြားမှာ အဓိက ပဋိပက္ခဖြစ်နိုင်ခြေ ရှိခဲ့ပြီး သူကတော့ သံတမန်ရေးအရ နည်းလမ်းရှာတာကိုပဲ ပိုသဘောကျခဲ့တဲ့အကြောင်း ပြောခဲ့ပါတယ်။
မြောက်ကိုရီးယားဘက်က တုံ့ပြန်ပြောဆိုမှုကတော့ မြောက်ကိုရီးယားနိုင်ငံအနေနဲ့ ဒေသတွင်းမှာ နျူကလီးယားစစ်ပွဲ ဖြစ်လုနီးနီး အခြေအနေရောက်အောင် တွန်းပို့နေတဲ့ အမေရိကန်ပြည်ထောင်စုရဲ့ရန်ကို မိမိကိုယ်တိုင် ကာကွယ်ဖို့ ဒီလက်နက်တွေကို လိုအပ်နေတယ်လို့ ဆိုပြန်ပါတယ်။
ဂျပန်နိုင်ငံဝန်ကြီးချုပ် ရှင်ဇိုအာဘေးကတော့ “မြောက်ကိုရီးယားနိုင်ငံရဲ့ နျူကလီးယားနဲ့ ဒုံးကျည် ဖွံ့ဖြိုးတိုးတက်မှုတွေဟာ အဆင့်သစ်တရပ်ကို ရောက်နေပါပြီ” လို့ တောင်ကိုရီးယားသမ္မတသစ် မွန်းကို တယ်လီဖုန်းနဲ့ ဆက်သွယ်စကားပြောတဲ့အချိန်မှာ ပြောခဲ့တယ်လို့လည်း သိခဲ့ရပါတယ်။
သူက သမ္မတ မွန်းကို “မြောက်ကိုရီးယားကို ဘယ်လို တုံ့ပြန်ရမယ်ဆိုတာက အရေးပေါ်ကိစ္စတရပ်ပါ။ ကျနော်ကတော့ မြောက်ကိုရီးယားနိုင်ငံမှာ နျူကလီးယားလက်နက် တည်ဆောက်မှုကို ရပ်ဆိုင်းသွားရေး အောင်အောင်မြင်မြင် ဖြစ်သွားအောင် သမ္မတနဲ့ အနီးကပ် ပူးပေါင်းဆောင်ရွက်သွားပါမယ်” လို့ ဆိုပါတယ်။
ဂျပန်ဝန်ကြီးချုပ်ကလည်း “တွေ့ဆုံဆွေးနွေးမှုလုပ်ဖို့ တွေ့ဆုံဆွေးနွေးမှု လုပ်နေရတာကတော့ အဓိပ္ပာယ်မရှိပါဘူး” လို့လည်း ပြောဆိုခဲ့ပြီး မြောက်ကိုရီးယားနိုင်ငံကိုလည်း ရိုးရိုးသားသားနဲ့ အခိုင်အမာ လုပ်ဆောင်ပြဖို့ တောင်းဆိုလိုက်ပါတယ်” လို့ တောင်ကိုရီးယားနိုင်ငံ သမ္မတသစ် မွန်းကလည်း သူ့အမြင်ကို လက်ခံဆွေးနွေးခဲ့တယ်လို့ သိရပါတယ်။
အထက်မှာ ကျနော် တင်ပြခဲ့တာတွေကတော့ လောလောလတ်လတ် အသစ်တက်ရောက်လာတဲ့ တောင်ကိုရီးယား လစ်ဘရယ် သမ္မတ မွန်းဂျေအင်းရဲ့ သဘောထား အပြောအဆိုနဲ့ အဓိကမဟာမိတ်နိုင်ငံဖြစ်တဲ့ အမေရိကန်ပြည်ထောင်စုသမ္မတရဲ့ ကြောင့်ကြမှု၊ အတော်အတန် ဆက်ဆံရေး တင်းမာနေတဲ့ တရုတ်ပြည်သူ့သမ္မတနိုင်ငံနဲ့ ဂျပန်နိုင်ငံဝန်ကြီးချုပ်တို့ရဲ့ သဘောထားတွေ ဖြစ်ပါတယ်။ အဲဒီလို ဆက်ဆံရေးအောက်မှာ တောင်ကိုရီးယားသမ္မတသစ် မွန်းက အခင်းအကျင်းသစ်တခုကို ဒေသတွင်း ငြိမ်းချမ်းရေးအတွက် အကောင်အထည်ဖော် ဆောင်ရွက်နိုင်မလား ဆိုတာကတော့ စောင့်ကြည့်ရဦးမှာ ဖြစ်ပါတယ်။ ။
