ပအိုဝ်းတိုင်းရင်းသားများ၏ ရိုးရာ စုပေါင်းရဟန်းခံရှင်ပြုပွဲ
DVB
·
March 26, 2017
မွန်ပြည်နယ်၊ သထုံမြို့နယ်၊ နောင်ကုလားရှမ်းရွာမှာ မတ်လ ၂၆ ရက်နေ့က ပအိုဝ်းတိုင်းရင်းသားတွေရဲ့ ရိုးရာမပျက်စုပေါင်းရဟန်းခံရှင်ပြုပွဲကို ဆင်၊ မြင်းအကောင် ၁၀၀ လောက်နဲ့ ပြုလုပ်ကျင်းပခဲ့တယ်လို့ သိရပါတယ်။
နောင်ကုလားရှမ်းရွာအတွင်းရှိ ပအိုဝ်းတိုင်းရင်းသားတွေနဲ့ အဝေးရောက် ပအိုဝ်းတိုင်းရင်းသားတွေ စုစည်းပြီး စုပေါင်းသာသနာပြုနိုင်ဖို့အပြင် ပအိုဝ်းတိုင်းရင်းသားတွေရဲ့ ရှေးအစဉ်လာ တိုင်းရင်းသားရိုးရာအမွေအနှစ်တွေ မပျောက်ပျက်ဘဲ အစဉ်အမြဲ အမှတ်ရစေဖို့အတွက် ဖော်ထုတ်ခြင်း၊ ဘာသာသာသနာကို ပအိုဝ်းတိုင်းရင်းသားတွေက အစဉ်အမြဲချီးမြှောက်နိုင်စေဖို့ ပြုလုပ်ပေးရတာ ဖြစ်တယ်လို့ နောင်ကုလားရှမ်းရွာ တိုက်ကျောင်းဆရာတော် ဦးသူရိယ က မိန့်ပါတယ်။
“ရွာရဲ့စုပေါင်း ရဟန်းခံရှင်ပြုပွဲကို ၃ နှစ်တကြိမ်ရွာမှာ စုပေါင်းလုပ်တယ်။ ခုဆို ၆ ကြိမ်မြောက်ပေါ့။ လုပ်တဲ့နေရာမှာလည်း ပအိုဝ်းတိုင်းရင်းသားတွေရဲ့ ရိုးရာအမွေအနှစ်လည်း မပျောက်ပျက်အောင် လှည့်လည်တဲ့နေရာမှာ ရိုးရာဝတ်စုံကိုပဲ ဝတ်ဆင်ပြီး ဆင်တွေ၊ မြင်းတွေကို အသုံးပြုထားပါတယ်။ အရင်နှစ်တွေထက် ဒီနှစ်က ပိုစည်ကားတယ်။ အလှူဒါနပြုတဲ့နေရာမှာလည်း တတ်နိုင်သူဖြစ်စေ မတတ်နိုင်တဲ့သူဖြစ်စေ ခွဲခြားချင်းမရှိဘဲ ရှင်ရဟန်းပြုချင်တဲ့သူအားလုံးကို သာသနဘောင်အရောက်ချီးမြှင့်ပေးတာပါ။ အလှူပွဲအတွက် ကုန်ကျစရိတ်ကိုတော့ တတ်နိုင်သူက ထည့်ဝင်ကြပါတယ် ''လို့ ဆရာတော်က မိန့်ပါတယ်။
နောင်ကုလားရှမ်းရွာရှိ ပအိုဝ်းတိုင်းရင်းသားတွေရဲ့ စုပေါင်းရဟန်းခံရှင်ပြုမင်္ဂလာပွဲကို ၁၉၉၈ ခုနှစ်မှစတင်ကာ ၃ နှစ်တကြိမ်စည်ကားသိုက်မြိုက်စွာကျင်းပလျက်ရှိတယ်လို့ သိရပါတယ်။
"ရွာသားတယောက်အနေနဲ့ ဒီအလှူပွဲအပေါ်မှာ အင်မတန်ဝမ်းမြောက်ရပါတယ်။ ပအိုဝ်းတိုင်းရင်းသားတို့ရဲ့ စည်းလုံးမှုကိုပြသတဲ့ပွဲပါ။ ဆရာတော်က ဦးစီးပြီး ကျင်းပတဲ့ ထုံးတမ်းအစဉ်လာ ယဉ်ကျေးမှုမပျက်ဘဲ ပြုလုပ်တဲ့ပွဲတခုဖြစ်တယ်။ အနီးအနား ကျေးရွာတွေက ပအိုဝ်းတိုင်းရင်းသားအပြင် ရပ်ဝေးက ပအိုဝ်းတိုင်းရင်းသားတွေပါ စုပေါင်းပါဝင်ကြတဲ့အတွက် ပအိုဝ်းတိုင်းရင်းသားတွေရဲ့ ညီညွှတ်မှုအင်အားတခုပါပဲ။ ဒီပွဲမှာ သာသနဘောင်ကို ဝင်ချင်တဲ့ အယုတ်လတ်အမြတ်မရွေးပါဝင်ခွင့်ရတဲ့ အလှူပွဲတခုပါ''လို့ နောင်ကုလားရှမ်းရွာသားတဦးဖြစ်သူ ဦးခွန်ကြည်သန်းကပြောပါတယ်။
စုပေါင်းရဟန်းခံရှင်ပြုပွဲတွင် ရဟန်းအပါး ၃၀ ရှင်အပါး ၈၅ ပါးစုစုပေါင်း ၁၁၅ ပါး ပါဝင်ပြီး အလှူပွဲလှည့်လည်ရန် ဆင် ၁၀ ကောင်နဲ့ မြင်း အကောင် ၉၀ လောက် အသုံးပြုလှည့်လည်ခဲ့ခြင်း ဖြစ်ပါတယ်။
သတင်း-ယူမင်းစိုး