ဖမ်းဝရမ်းထုတ်ထားသည့် ထိုင်းဘုန်းကြီးကို ရဲနှင့်စစ်တပ် အင်အား ၄ ထောင်ကျော်ဖြင့် ရှာဖွေ (ရုပ်သံ)

ငွေအလွဲသုံးစားမှု၊ ငွေမည်းခဝါချမှုတွေနဲ့ ဖမ်းဝရမ်းထုတ်ခံထားရတဲ့ ထိုင်းနိုင်ငံ ပထုန်ဌာနီခရိုင် ဓမ္မကာယကျောင်းတိုက်က ဓမ္မကာယ ဂိုဏ်းချုပ်ဆရာတော်ကြီး ထမ်မချိုင်းယိုးကို ဖမ်းဆီးရမိဖို့ ထိုင်းစစ်တပ်နဲ့ ရဲတပ်ဖွဲ့ အင်အား ၄ ထောင်ကျော် သုံးပြီး ရှာဖွေနေကြပါတယ်။ ဆရာတော်ကြီးကို ပြီးခဲ့တဲ့နှစ် ဇွန်လက ဖမ်းဝရမ်းထုတ်ပြီးတဲ့နောက် ကျောင်းတိုက်ကို ဝင်ရောက်စီးနင်း ရှာဖွေရာမှာ ဒီတကြိမ်ဟာ ၃ ကြိမ်မြောက်ဖြစ်ပြီး ဖေဖော်ဝါရီ ၁၆ ရက်နေ့က ပြန်လည်စတင်တဲ့ ရှာဖွေရေးလုပ်ငန်းမှာတော့ ဒီအက်စ်အိုင် (အထူးစုံစမ်းစစ်ဆေးရေးရဲတပ်ဖွဲ့)၊ ထိုင်းအမျိုးသားရဲတပ်ဖွဲ့နဲ့ ထိုင်းစစ်တပ် စတဲ့ အဖွဲ့ ၃ ဖွဲ့ပါ အင်အားစုစုပေါင်း ၄၂၄၀ ဦး ပါဝင်တယ်လို့ ဒီအက်စ်အိုင်ရုံး ညွှန်ကြားရေးမှူး ဗိုလ်မှူးကြီး ဝေါရနန် ဆီလမ်းက မနေ့ညနေပိုင်း သတင်းစာရှင်းလင်းပွဲမှာ ပြောပါတယ်။ ဓမ္မကာယကျောင်းတိုက်ကို ပုဒ်မ ၄၄ အရ ကန့်သတ်နယ်မြေအဖြစ် ဖေဖော်ဝါရီ ၁၅ ရက်နေ့က သတ်မှတ်ထုတ်ပြန်ပြီးတဲ့နောက် အဲဒီကျောင်းဝင်းထဲကို မနက် ၆ နာရီက စတင်ဝင်ရောက်ခဲ့ကြောင်း၊ ကျောင်းပိုင်ဧရိယာ ဧကပေါင်း ၂၀၀၀ ကျော်ကို ဇုန် ၃ ဇုန်ခွဲပြီး ရှာဖွေသွားမှာဖြစ်ကြောင်း၊ တံခါး ၈ ခုကနေ ဝင်ရောက်ရာမှာ တချို့အပေါက်က ကျောင်းတာဝန်ရှိသူတွေ လာဖွင့်မပေးတဲ့အတွက် သော့ကိုဖျက်ပြီး ဝင်ရောက်ခဲ့ရကြောင်း၊ ဆရာတော်ရှိတဲ့နေရာကို မေးရာမှာ ဘယ်သူကမှ ရေရာတိကျတဲ့ အဖြေမပေးကြဘူးလို့ ဒီအက်စ်အိုင်ညွှန်မှူးက ဆက်ပြောပါတယ်။ ချန်နယ်လ် ၃ တီဗွီသတင်းမှာတော့ ဆရာတော်ဟာ အဲဒီကျောင်းတိုက်ထဲမှာပဲ ရှိနေတယ်လို့ ထိုင်းရဲတွေက ယုံကြည်ကာ ဒီကနေ့မှာလည်း မနက် ၈ နာရီကစလို့ နေရာပေါင်း ၈ ခုခွဲပြီး ရှာဖွေနေကြောင်း၊ ဘယ်နေ့ထိ ရှာကြမယ် ဆိုတာတော့ မကန့်သတ်ထားဘူးလို့ ဆိုပါတယ်။ ထိုင်းနိုင်ငံမှာ လွန်ခဲ့တဲ့ ၂ နှစ်လောက်က နိုင်ငံတော်သံယာ့မဟာနာယက ဆရာတော်ကြီး ပျံလွန်တော်မူပြီးတဲ့နောက် သူ့နေရာမှာ အစားထိုးခန့်အပ်ဖို့ ဆရာတော်တွေ ရွေးချယ်ရာမှာ  သက်တော် ၇၃ နှစ်ရွယ် ဓမ္မကာယဂိုဏ်းချုပ် ဆရာတော်ကြီး ထမ်မချိုင်းယိုးဟာ အဲဒီနေရာမှာ အဆိုပြုခံခဲ့ရပါတယ်။ နိုင်ငံတော်သံဃာ့မဟာနာယအဖြစ် အဆိုပြုခံရသူတွေရဲ့ ကိုယ်ရေးရာဇဝင်တွေ ပြန်လည်စစ်ဆေးရာမှာ ဆရာတော် ထမ်မချိုင်းယိုးမှာ ဘတ်သန်းပေါင်းရာနဲ့ချီ ချမ်းသာတာ တွေ့ရှိရပြီး အဲဒီငွေတွေထဲမှာ အမည်မည်းစာရင်းရှိသူရဲ့ အလှူငွေတွေ လက်ခံထားတဲ့အတွက် ဒုစရိုက်မှုမှရလာတဲ့ အလှူငွေကို လက်ခံမှု၊ ငွေအလွဲသုံးစားလုပ်မှု၊ ငွေမည်းခဝါချမှုတွေနဲ့  ဖမ်းဆီးအရေးယူဖို့ ခံနေရတာ ဖြစ်ပါတယ်။ ဆရာတော်ရဲ့ ကျောင်းတိုက်ကို တာဝန်ရှိသူတွေ သွားရောက်စီးနင်းရှာဖွေတဲ့အခါတိုင်း သူ့ကို ကြည်ညိုလေးစားတဲ့ သိန်းနဲ့ချီတဲ့ သံယာနဲ့ ပြည်သူတွေက ဆန့်ကျင်ကန့်ကွက်ခဲ့လို့ မနှစ်က အဓိက ရုဏ်းဖြစ်ခဲ့ပြီး ရဲတွေက မျက်ရည်ယိုဗုံးနဲ့ လူစုခွဲခဲ့ပါတယ်။ ဒီနှစ်မှာတော့ အလားတူ အဓိကရုဏ်းမဖြစ်လေအောင် ကျောင်းတိုက်ဧရိယာတ၀ိုက်ကို မဆိုင်သူတွေ မ၀င်ရတဲ့ ပုဒ်မ ၄၄ အရင်ထုတ်ပြန်ပြီး ၀င်ရောက်စီးနင်းရှာဖွေနေတာဖြစ်ပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up