ဖားကန့်တွင် ကျောက်တောင်ကမ်းပါးယံပြိုကျ ၊ လူ ၉ ဦး သေဆုံး
ဓာတ်ပုံ - ဇော်မိုးထက်
1.2K
ကချင်ပြည်နယ် ဖားကန့်မြို့နယ် ဆိပ်မူကျေးရွာအုပ်စုထဲမှာ ပြီးခဲ့တဲ့ သောကြာနေ့ညက ကျောက်တောင်ကမ်းပါးယံပြိုကျမှုဖြစ်ပွါးပြီး လူ ၉ ဦးသေဆုံး ၁ ဦးဒဏ်ရာရခဲ့ပါတယ်။
ဖေဖော်ဝါရီ ၉ ရက် ည ၁၀ နာရီလောက်က ဆိပ်မူအုပ်စု နတ်မော်ကျေးရွာ ရတနာစန်း ရွှင်လုပ်ကွက်ထဲမှာ ရေမဆေးကျောက်ရှာနေကြစဉ် ကားလမ်းအပေါ်က ကမ်းပါးယံပြိုကျလာခဲ့တာလို့ သေဆုံးဒဏ်ရာရသူတွေကို တူးဖော်ပြီး ဆေးရုံပို့ပေးခဲ့တဲ့ သင်္ခါနာရေးကူညီမှုအသင်း နာယက ဦးရွှေဆန်းတောင်က ဒီဗွီဘီကို ပြောပါတယ်။
“ကားလမ်းအပေါ်က ကမ်းပါးယံပြိုကျတာလေ၊ ကားလမ်းကို ကျော်ပြီးတော့မှ အောက်က လူတွေကို သွားထိတာပေါ့ ။ သူတို့က ညမှာ ရေမဆေးကျောက်ရှာနေကြတာ၊ အဲဒီညက အားလုံးပေါင်း ၇ ယောက် ဆေးရုံကိုပို့တယ်၊ တစ်ယောက်ဘဲရှင်တယ်။ ၆ ယောက်သေတယ် ။ နောက် တနေ့ ၁၀ ရက်နေ့မှာကျတော့ ၃ ယောက်ထပ်တွေ့တယ်၊ စုစုပေါင်း ၉ ဦး သေဆုံးတယ်ပေါ့ ”
သေဆုံးဒဏ်ရာရသူတွေဟာ လူငယ်လူရွယ်အများစုဖြစ်ပြီး အနယ်နယ်အရပ်ရပ်ကနေ ကျောက်လာ တူးနေ တဲ့သူတွေလို့ ဆိုပါတယ်။
ဒီတခေါက် မြေပြိုမှုဟာ ယခင်ကလို စွန့်ပစ်မြေစာပုံပြိုကျတာမဟုတ်ဘဲ ကြီးမားတဲ့တောင်ပေါ်ကနေ ပြိုကျလာတာကြောင်း ၊ ပြိုကျရတဲ့အကြောင်းကို မသိရဘဲ သဘာဝအရ သူ့ဖာသာကျလာတာလို့ ယူဆ ရ တယ်လို့ ဦးရွှေဆန်းတောင်က ပြောသွားပါတယ်။
