ထိုင်းတက္ကစီသမားကို ပစ်သတ်မှုဖြင့် မြန်မာအလုပ်သမားတဦး အဖမ်းခံရ
DVB
·
December 17, 2016
ထိုင်းနိုင်ငံအလယ်ပိုင်း ဆမွတ်ဆာခွန်းမြို့မှာ ထိုင်းတက္ကစီသမားတဦးကို ပစ်သတ်ခဲ့မှုသံသယနဲ့ မြန်မာအလုပ်သမား လူငယ်တစ်ဦးကို ထိုင်းရဲတွေက ဖမ်းဆီးထားတယ်လို့ ခေါဝ်ဆွတ်သတင်းမှာ ဖော်ပြပါတယ်။
ဒီဇင်ဘာ၁၃ ရက် မနက် ၁ နာရီခွဲအချိန်က ဆမွတ်ဆာခွန်းမြို့ ဘန်ပေါ်ရပ်ကွက် အ၀င်လမ်းမှာ အသက် ၅၃ နှစ်ရွယ် တက္ကစီမောင်းသမား ထိုင်းလူမျိုးတစ်ဦး သေနတ်နဲ့ ပစ်သတ်ခံခဲ့ရပြီး ဒီအမှုနဲ့ ပတ်သက်လို့ ထိုင်းရဲတွေက ဆမွတ်ဆာခွန်းမှာ ပန်းရန်အလုပ်လုပ်နေတဲ့ မြန်မာအလုပ်သမား မင်းရဲအောင် ( အသက် ၂၂ နှစ် ) ကို လိုက်လံရှာဖွေနေတာပါ။
ဒီကနေ့ ဒီဇင်ဘာလ ၁၆ ရက် မနက် ၃ နာရီလောက်မှာတော့ ဘန်ကောက် ဆမဲဒမ်နယ်မြေ ဘန်ကရဒီလမ်းထဲမှာရှိ ဆောက်လုပ်ရေးအလုပ်သမားတွေနေတဲ့နေရာမှာ ပုန်းအောင်းနေတဲ့ မင်းရဲအောင်ကို ထိုင်းရဲတွေက ၀င်ရောက်ဖမ်းဆီးခဲ့ပါတယ်။
မင်းရဲအောင်က တက္ကစီသမားကို သေနတ်နဲ့ ပစ်ခဲ့ကြောင်း ၀န်ခံပြီး အဆိုပါသေနတ်ကို အခင်းဖြစ်ပွားရာနေရာအနီးရှိ ငါးမွေးမြူရေးကန်ထဲ လွှင့်ပစ်ခဲ့တယ်လို့ တာဝန်ရှိသူတွေကို ပြောပါတယ်။
ဒါပေမယ့် တက္ကစီသမားကို ပစ်သတ်ရတဲ့အကြောင်းရင်းနဲ့ သေနတ်ဘယ်ကရသလဲ ဆိုတာတွေကိုတော့ ဖွင့်ဟပြောဆိုခြင်းမရှိသေးဘူးလို့ ဆမွတ်ဆာခွန်းခရိုင်ရဲတပ်ဖွဲ့ တာဝန်ရှိသူတဦးက ပြောကြောင်း ထိုင်းသတင်းမှာရေးပါတယ်။
