ပူးတွဲစောင့်ကြည့်ရေးကိစ္စ အပစ်မရပ်အဖွဲ့များ ချင်းမိုင်တွင် တွေ့ဆုံဆွေးနွေး
နော်နိုရင်း
·
November 18, 2016
ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (ဂျေအမ်စီ) နဲ့ပတ်သက်ပြီး အန်စီအေ လက်မှတ်မထိုးရသေးတဲ့ ယူအန်အက်ဖ်စီအဖွဲ့ရဲ့ နိုင်ငံရေးဆိုင်ရာ ညှိနှိုင်းဆွေးနွေးရေး ကိုယ်စားလှယ်အဖွဲ့ဝင်တွေ သုံးသပ်ဆွေးနွေးပွဲ ပြုလုပ်နေပါတယ်။
ဆွေးနွေးပွဲကို ထိုင်းနိုင်ငံ၊ ချင်းမိုင်မြို့မှာ ဒီကနေ့ နိုဝင်ဘာ ၁၈ ရက်နေ့ကစတင်ပြီး နိုဝင်ဘာ ၂၀ ရက်နေ့အထိ ၃ ရက်ကြာ ကျင်းပနေတာဖြစ်ပြီး ဆွေးနွေးနေတဲ့ အကြောင်းအရာ အသေးစိတ်ကိုတော့ မသိရသေးပါဘူး။
အလားတူ ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ အစည်းအဝေးကို ရန်ကုန်မြို့ အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးဗဟိုဌာနမှာလည်း မနေ့ကတည်းက စတင်ကျင်းပနေပါတယ်။
ဒီအစည်းအဝေးမှာ ဂျေအမ်စီ-ယူ ဥက္ကဋ္ဌ ဒု-ဗိုလ်ချုပ်ကြီးရာပြည့်က ဂျေအမ်စီအနေနဲ့ နိုင်ငံရေးဆွေးနွေးပွဲတွေကို ဆောင်ရွက်နိုင်ဖို့အတွက် အတတ်နိုင်ဆုံး ပစ်ခတ်မှုမရှိအောင် ဆောင်ရွက်ဖို့လိုတဲ့အကြောင်း ပြောကြားသွားပါတယ်။
''နိုင်ငံရေးဆွေးနွေးပွဲတွေ စနစ်တကျ ဆောင်ရွက်နိုင်အောင်၊ ပစ်ခတ်တိုက်ခိုက်မှုတွေ လျှော့ချနိုင်အောင် ဆွေးနွေးသွားမယ်။ နောက်တချက်ကတော့ ဖြစ်ပေါ်လာတဲ့ အခြေခံအကြောင်းရင်းတွေနဲ့ ပတ်သက်ပြီး နောင် ထပ်မံမဖြစ်ပွားနိုင်အောင် တကယ့်အခြေခံ အကြောင်းရင်း အစစ်အမှန်တွေကို ရှာဖွေဖို့လိုပါတယ်။ ရှာဖွေပြီးတော့မှ နှစ်ဘက်ညှိနှိုင်းပြီး ဖြေရှင်းဆောင်ရွက်သွားမှာ ဖြစ်ပါတယ်။"
၃ ရက်ကြာ ဒီအစည်းအဝေးမှာ ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီရဲ့ ဘဏ္ဍာရေးနဲ့ ဘတ်ဂျက်ကိစ္စတွေ၊ ချင်းပြည်နယ်ဆိုင်ရာ ဂျေအမ်စီ-အက်စ် ဖွဲ့စည်းရေး၊ ရှမ်းပြည်နယ်အတွင်း ဖြစ်ပွားခဲ့တဲ့ တိုက်ပွဲတွေကိစ္စအပြင် နယ်မြေသတ်မှတ်ရေးနဲ့ မိုင်းရှင်းလင်းရေး စတဲ့ကိစ္စ ဆွေးနွေးဖို့ရှိတယ်လို့ အစိုးရသတင်းထုတ်ပြန်ချက်အရ သိရပါတယ်။
